មួយថ្ងៃញ៉ាំចេកបាន៣ផ្លែ ផ្ដល់អត្ថប្រយោជន៍ច្រើនដល់សុខភាព!

ចេក គឺជាផ្លែឈើមួយប្រភេទដែលសម្បូរមានលក់លើទីផ្សារ តម្លៃវិញក៏ធូរថ្លៃ មិនត្រឹមតែប៉ុណ្ណោះអត្ថប្រយោជន៍ក៏មានច្រើនសម្រាប់សុខភាពផងដែរ។ ការបង្កើតទម្លាប់ញ៉ាំចេកឲ្យបាន ៣ផ្លែក្នុងមួយថ្ងៃអាចជួយដល់សុខភាពរាងកាយ បង្កើនថាមពល ពិសេសសម្រាប់អ្នកហាត់កីឡា និងការប្រើប្រាស់កម្លាំង បែកញើសច្រើនជាប្រចាំតែម្ដង។

ចេកមួយផ្លែទម្ងន់ ១២០ក្រាម មានសារធាតុចិញ្ចឹមសំខាន់ៗដូចជា៖

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

• កាឡូរី ១០៦
• កាបូអ៊ីដ្រាត ២៧ក្រាម
• ជាតិសរសៃ៣,២ក្រាម
• ប្រូតេអ៊ីន ១,៤ក្រាម
• ប៉ូតាស្យូម ៤០០ មិល្លីក្រាម
• ម៉ាញ៉េស្យូម ៣៥ មិល្លីក្រាម
• ខ្លាញ់ ០,៤ក្រាម

រាងកាយរបស់យើងរាល់ថ្ងៃ រាប់ចាប់ពីវ័យ ១៦ឆ្នាំ ដល់៦០ឆ្នាំ ត្រូវការប៉ូតាស្យូមចន្លោះពី៣០០០ ទៅ ៤០០០ មិល្លី​ក្រាម និង ម៉ាញ៉េស្យូម ៤៥០មិល្លីក្រាម​ក្នុង​មួយ​ថ្ងៃ ខណៈដែលចេក៣ផ្លែអាចផ្ដល់ប៉ូតាស្យូមដល់ទៅ ១២០០មិល្លីក្រាម និងម៉ាញ៉េស្យូម ១០៥ មិល្លីក្រាម ដូច្នេះគឺជាអាហារូបត្ថម្ភល្អសម្រាប់សុខភាព។

អត្ថប្រយោជន៍ប៉ូតាស្យូម និងម៉ាញ៉េស្យូមក្នុងរាងកាយ

• គ្រប់គ្រងសម្ពាធឈាម និងជាតិស្ករក្នុងឈាម
• រក្សាមុខងារសរសៃប្រសាទ
• រក្សាចលនាចង្វាក់បេះដូង និងសាច់ដុំ
• គ្រប់គ្រងតុល្យភាពសារធាតុរាវក្នុងរាងកាយ
• ជួយបង្កើតកោសិកាសាច់ដុំឡើងវិញ

ម៉ាញ៉េស្យូម និងប៉ូតាស្យូម ក្នុងរាងកាយងាយនឹងបាត់បង់បំផុតតាមរយៈការបែកញើស ហាត់កីឡា ការប្រើប្រាស់ថាមពលខ្លាំង ដូច្នេះចេក គឺជាផ្លែឈើមួយប្រភេទដែលសម្បូរសារធាតុទាំងពីរ មិនត្រឹមតែប៉ុណ្ណោះ ក៏ជាប្រភេទអាហារ ដែលងាយស្រួលក្នុងការរំលាយបានរហ័សអាចឆ្លើយតបទៅនឹងការទាញយកថាមពលទៅប្រើប្រាស់តាមត្រូវការរាងកាយ។

បន្ថែមពីនេះ ចេកមានគុណប្រយោជន៍អាចប្រឆាំងនឹងអុកស៊ីតកម្ម ដោយសារធាតុម្យ៉ាងឈ្មោះថា Catechins ជាសារធាតុសំខាន់មួយ មានក្នុងរបបអាហារដែលធ្វើការដោយផ្ទាល់ជាមួយ នឹងប្រព័ន្ធប្រសាទនិងខួរក្បាល។ មិនត្រឹម​តែប៉ុណ្ណោះ ចេកក៏អាចជួយការពារ ពីជំងឺវង្វេងតាមវ័យផងដែរ។

  ក្នុងករណី​មាន​សំណួរ ឬ​មន្ទិលសង្ស័យ​ជុំវិញ​សុខភាព​អ្នក ជម្រើស​ល្អ​បំផុត សូម​ពិគ្រោះ និង​ប្រឹក្សា​យោបល់​ផ្ទាល់​ជាមួយ​ពេទ្យ​ជំនាញ។ Hello Health Group មិន​ចេញ​វេជ្ជបញ្ជា មិន​ធ្វើ​រោគវិនិច្ឆ័យ ឬ​ព្យាបាល​ជូន​ទេ៕ 

អត្ថបទផ្ដល់សិទ្ធិដោយ Hello Krupet

• អាហារ