ប្រវត្តិសាស្រ្តនៅកម្ពុជា! បទ «ស្រឡាញ់អ្វីដែលខ្មែរមាន» មានអ្នកទស្សនារហូត៦១លានដង ត្រឹមរយៈពេល២សប្តាហ៍ និងទទួលបានលិខិតសរសើរពីក្រសួងវប្បធម៌ និងវិចិត្រសិល្បៈ!

ភ្នំពេញ៖ ពិតជាមិនធម្មតាមែនត្រឹមរយៈពេល២សប្ដាហ៍ប៉ុណ្ណោះ បទ «ស្រឡាញ់អ្វីដែលខ្មែរមាន ឬ CAMBODIAN PRIDE របស់ផលិតកម្ម Galaxy Navatra មានអ្នកចូលទស្សនារហូតដល់ ៦១លានដងឯណោះ នៅលើ Youtube ផ្លូវការ Galaxy Navatra មានឈ្មោះថា Cam-Pop Galaxy Navatra ដែលចំនួននេះសឹងតែអាចនិយាយបានថា សម្រាប់បទចម្រៀងនៅប្រទេសកម្ពុជា មិនធ្លាប់មានឡើយកន្លងមក។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

លើទំព័រហ្វេសប៊ុកផលិតកម្ម Galaxy បានបង្ហោះពីដំណឹងដ៏រីករាយប្រកបដោយមោទកភាពមួយនេះផងដែរបន្ទាប់ពីបទចម្រៀងរបស់ខ្លួនមានអ្នកចូលទស្សនារហូតដល់ទៅ ៦១លានដង នេះផងដែរ។

ដើម្បីបុព្វហេតុជាតិ មាតុភូមិ សម្រាប់ការប្រកួតកីឡាស៊ីហ្គេម ២០២៣ ដែលកម្ពុជាធ្វើជាម្ចាស់ផ្ទះ ផលិតកម្ម Galaxy Navatra បានរៀបចំផលិតឡើងយ៉ាងយកចិត្តទុកដាក់បំផុត ក្រោមការចុះដឹកនាំផ្ទាល់ពីសំណាក់អ្នកឧកញ៉ា ឡេង ណាវ៉ាត្រា។ «ស្រឡាញ់អ្វីដែលខ្មែរមាន ឬ CAMBODIAN PRIDE» បានធ្វើការផ្សព្វផ្សាយតំបន់ទេសចរណ៍ ការអភិវឌ្ឍន៍ និងភាពរីកចម្រើនរបស់កម្ពុជា ក៏ដូចជាការថែរក្សាសិល្បៈវប្បធម៌ បេតិកភណ្ឌជាតិ ក្រោមការដឹកនាំប្រកបដោយគតិបណ្ឌិតរបស់សម្ដេចតេជោនាយករដ្ឋមន្រ្តី។

កំពូលតារា ៤ដួង ត្រូវបានជ្រើសរើសឲ្យច្រៀងបទចម្រៀងនេះ រួមមានកំពូលតារាចម្រៀង ឧកញ៉ា ព្រាប សុវត្ថិ កំពូលតារាចម្រៀង ឧកញ៉ា ខេមរៈ សិរីមន្ត កំពូលតារាចម្រៀង លោក ខេម និងកំពូលតារាចម្រៀងស្រីកញ្ញា តន់ ចន្ទសីម៉ា។ បទចម្រៀងមួយបទនេះ និពន្ធដោយអ្នកនិពន្ធល្បីៗមានដូចជា លោក សុខ ជំនោរ -លោក ខាំ ភូរិ -ឯកឧត្តម ហ៊ឹម នភា -ឧកញ៉ា យឹម តាស្រង់ និងឯកឧត្តម ខេមរៈ ភារុណ។

ជាមួយនឹងស្នាដៃធំអស្ចារ្យមួយនេះ មហាជនក៏ដូចជាថ្នាក់ដឹកនាំគ្រប់ស្ថាប័នក្រសួង មានការកោតសរសើរជាខ្លាំង ហើយថ្មីៗនេះលោកជំទាវ ភឿង សកុណណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ក៏បានចេញលិខិតមួយជូនអ្នកឧកញ៉ា ឡេង ណាវ៉ាត្រា ដោយខ្លឹមសារនៃលិខិតនោះបានកោតសរសើរផលិតកម្មGalaxy Navatra ជាខ្លាំង ជុំវិញការផលិតបទ «ស្រឡាញ់អ្វីដែលខ្មែរមាន ឬ CAMBODIAN PRIDE»៕