ឯកឧត្តមបណ្ឌិត ហ៊ុន ម៉ាណែត អញ្ជើញសម្ពោធដាក់ឱ្យដំណើរការជាផ្លូវការក្រុមហ៊ុនមជ្ឈមណ្ឌលទិន្នន័យ Uptime Design Tier III ដំបូងគេនៅកម្ពុជា ByteDC Solutions

ភ្នំពេញ៖ ពិភព​លោក​បាននឹង​កំពុង​បង្ហាញ​នូវ​ការ​ផ្លាស់​ប្ដូរយ៉ាង​លឿន ក្រោម​កម្លាំង​ជំរុញ​ពី​ប្រព័ន្ធ​បច្ចេកវិទ្យាឌីជីថល។ ត្បិត​ថា បច្ចេកវិទ្យា​ពិត​ជា​មាន​អនុភាព​ខ្លាំង ​ក្នុងការ​អភិវឌ្ឍ​សេដ្ឋកិច្ច ពាណិជ្ជកម្ម ក៏​ដូច​ជា​សង្គម​មួយ​ប្រកប​ដោយ​ប្រសិទ្ធភាព ប៉ុន្តែ​វា​ក៏​បាន​នាំ​មក​ជាមួយ​នូវ​ហានិភ័យ​នៃ​ការ​បែក​ធ្លាយ​ទិន្នន័យ​សំខាន់​ៗ​របស់​ស្ថាប័ន ក្រុម​ហ៊ុន​អាជីវកម្ម​នានា​ដែរ ដែល​មាន​ប្រតិបត្តិការ​លើ​ប្រព័ន្ធ​អនឡាញ។ មើល​ឃើញ​ពីបញ្ហានេះ ក្រុមហ៊ុន BYTEDC បាន​ចូល​ខ្លួន​មក​ផ្ដល់​ដំណោះ​ស្រាយ​ល្អ​ប្រសើរលើ​ការ​រក្សា​ទិន្នន័យ​សំខាន់​ៗ​នៅ​កន្លែង​មួយ​ដែល​មាន​សុវត្ថិភាព​បំផុត និង​ទុក​ចិត្ត​បាន។

BYTEDC គឺ​ជា​ក្រុមហ៊ុនដែលផ្តល់នូវ​មជ្ឈមណ្ឌល​ផ្ទុកទិន្នន័យ​ដ៏​ធំមួយ​ ក្រោមការវិនិយោគ​រវាងប្រទេសកម្ពុជា និងប្រទេសសឹង្ហបូរី។​ ពេល​នេះ​បាន​បើក​សម្ពោធជា​ផ្លូវ​ការហើយនៅ​ប្រទេស​កម្ពុជា​ នា​ថ្ងៃ​ទី១១ ខែឧសភា​ ឆ្នាំ២០២៣ ក្រោម​អធិបតីភាព​ដ៏​ខ្ពង់ខ្ពស់ ​ឯកឧត្តម​បណ្ឌិត ហ៊ុន ម៉ាណែត និងមានការចូលរួមពីឯកឧត្តម លោក​ជំទាវ​ អ្នក​ឧកញ៉ា លោក​ឧកញ៉ា ​ភ្ញៀវ​កិត្តិយសជាតិ និងអន្តរជាតិ​ជា​ច្រើន​រូប​ទៀត។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

មាន​ប្រសាសន៍​នៅ​ក្នុង​ថ្ងៃ​បើក​សម្ពោធ​នេះ លោក​ BOB LIM (ប៊ប លីម) ​នាយក​ប្រតិបត្តិ​ក្រុមហ៊ុន BYTEDC Solutions បាន​រំលឹក​​ថា បច្ចុប្បន្ន​យើងកំពុងរស់នៅក្នុងពិភពលោកមួយដែល​ពឹងផ្អែកយ៉ាងខ្លាំងលើបច្ចេកវិទ្យា ហើយការរីកចម្រើនយ៉ាងឆាប់រហ័សនៃប្រព័ន្ធទិន្នន័យធំៗ (big data) ការរក្សាទិន្នន័យនៅលើប្រព័ន្ធក្លោដ (cloud computing) និងការតភ្ជាប់បណ្តាញ អ៉ីនធឺណិត បាននាំមកនូវការផ្លាស់ប្តូរគួរឱ្យកត់សម្គាល់។ ការរាតត្បាតជាសកលនៃជំងឺកូវីដ-១៩ បានពន្លឿនដល់ការផ្លាស់ប្តូរនេះបន្ថែមទៀត ជាពិសេសនៅក្នុងវិស័យមួយចំនួន ដូចជា​ពាណិជ្ជកម្មតាមប្រព័ន្ធអេឡិចត្រូនិក និងការធ្វើការងារពីចម្ងាយ ដែលធ្វើឱ្យ​យើងមានអារម្មណ៍ថា យើងបានបោះជំហានយ៉ាងលឿនឆ្ពោះទៅរកទសវត្សរ៍មួយនៅក្នុងវឌ្ឍនភាពឌីជីថល។ នៅក្នុងបរិបទនេះការមានមជ្ឈមណ្ឌលទិន្នន័យដែលអាចទុកចិត្តបាន និងមានសុវត្ថិភាពសម្រាប់ការរក្សាទុក និងគ្រប់គ្រងទិន្នន័យ កាន់តែមានសារៈសំខាន់ជាងពេលណាៗទាំងអស់។

ក្នុង​ន័យ​នេះ​លោកថ្លែង​ថា៖

វាគឺជាសក្ខីភាពមួយ ដើម្បីបង្ហាញពីការប្តេជ្ញាចិត្តយ៉ាងមុតមាំរបស់យើង ក្នុងការបន្តស្ថិតនៅជួរមុខជានិច្ច ក្នុងការផ្តល់នូវបទដ្ឋានគុណភាពខ្ពស់ នៃសេវាកម្មមជ្ឈមណ្ឌលទិន្នន័យរបស់យើង។

តប​ទៅ​នឹង​ការ​លើក​ឡើង​ពី​បេសកកម្ម​របស់ BYTEDC Solutions នៅ​កម្ពុជា​នា​ពេល​នេះ ឯកឧត្តម​បណ្ឌិត ហ៊ុន ម៉ាណែត បាន​ថ្លែង​អបអរសាទរ និងកោតសរសើរចំពោះថ្នាក់ដឹកនាំ និងបុគ្គលិក​ទាំង​អស់​នៃក្រុមហ៊ុន BYTEDC Solutions ចំពោះកិច្ចខិតខំប្រឹងប្រែងរហូតសម្រេច​បាននូវ​សមិទ្ធផល​ដ៏សំខាន់នេះ ដែលជាការបើកដំណើរការនៃការផ្តល់សេវាកម្មឌីជីថល និងសេវាកម្ម​មជ្ឈមណ្ឌល​ទិន្នន័យ (Data Center) ឈានមុខគេមួយ នៅក្នុងព្រះរាជាណាចក្រកម្ពុជា ជាមួយនឹងវិញ្ញាបនបត្រ Uptime Design Tier III។

ឯកឧត្តម​បានបន្តថា សមិទ្ធផលនេះក៏បានឆ្លុះបញ្ចាំងផងដែរ អំពីការរីកចម្រើនជឿនលឿនផ្នែកសង្គម-សេដ្ឋកិច្ចកម្ពុជា ដែលមានភាពទំនើប និងទាន់សម័យ ក៏ដូចជាអំពីភាពរួចរាល់​របស់កម្ពុជា​ក្នុងការ​ចាប់យកបច្ចេកវិទ្យាឌីជីថល និងបរិវត្តកម្មឌីជីថល សម្រាប់ជាប្រយោជន៍ដល់ការ​លើកកម្ពស់​ប្រសិទ្ធភាព និងផលិតភាពសេដ្ឋកិច្ច។

ក្នុង​ន័យ​នេះ ឯកឧត្តមក៏​បាន​ថ្លែង​អំណរគុណ​ម្ដង​ទៀតចំពោះក្រុមហ៊ុន BYTEDC Solutions ដែល​មានទំនុកចិត្តលើសក្តានុពលនៃសេដ្ឋកិច្ចកម្ពុជា និងបានប្តេជ្ញាចិត្តចូលរួមគាំទ្រដល់ការអភិវឌ្ឍវិស័យឌីជីថលក្នុងរបត់នៃដំណើរឆ្ពោះទៅរកការអភិវឌ្ឍសេដ្ឋកិច្ចប្រកបដោយភាពរឹងមាំនៅក្នុងយុគសម័យឌីជីថល។ ពិតណាស់ទន្ទឹមនឹងការប្រែប្រួលនៃរចនាសម្ព័ន្ធសេដ្ឋកិច្ចរបស់កម្ពុជា និងការធ្វើពិពិធកម្មទាំងនៅក្នុងវិស័យកសិកម្ម ឧស្សាហកម្ម ទេសចរណ៍ សំណង់ និងហិរញ្ញវត្ថុ រាជរដ្ឋាភិបាល ដែលមានសម្តេចតេជោនាយករដ្ឋមន្ត្រីជាប្រមុខ ក៏បាននិងកំពុងយកចិត្តទុកដាក់ខ្ពស់លើវិស័យឌីជីថល ដើម្បីបង្កើតឱ្យមាននូវចន្ទល់កំណើនថ្មីមួយបន្ថែមទៀត ក៏ដូចជាដើម្បីគាំទ្រដល់ការធ្វើបរិវត្តកម្មឌីជីថលក្នុងវិស័យដទៃផ្សេងទៀតឱ្យកាន់តែទំនើប ប្រកបដោយប្រសិទ្ធភាព និងផលិតភាពកាន់តែខ្ពស់។

ក្រុមហ៊ុន BYTEDC Solutions មាន​ទីតាំង​នៅ​តំបន់​បឹងកក់​ជិត អេឌិនហ្គាឌិន ស្ថិត​ក្នុង​អគារ​ដ៏​ធំ​ស្កឹមស្កៃ​ក្រោម​ទុនវិនិយោគ​រាប់រយលាន​ដុល្លារ​អាមេរិក។ នៅ​ទី​នោះ ត្រូវ​បានរៀប​ចំ​ហេដ្ឋារចនាសម្ព័ន្ធ​ដើម្បី​ធានាសុវត្ថិភាព​ល្អ​ឥតខ្ចោះ ជាមួយ​ការ​តម្លើង និងការគ្រប់គ្រងឧបករណ៍ IT មានភាពងាយ​ស្រួល ប៉ុន្តែ​មានភាព​គួរឱ្យ​ទុក​ចិត្ត។ ប្រព័ន្ធរក្សាភាពត្រជាក់ និងលំហូរខ្យល់ប្រកបដោយប្រសិទ្ធភាពក៏ត្រូវបានធានាផងដែរ ដែលជាហេតុធ្វើឱ្យការថែទាំ និងការកែលម្អមិនជួបប្រទះការលំបាក។ 

BYTEDC ក៏​ផ្ដល់​ផង​ដែរ​នូវ​សេវាកម្មជួលទីតាំងផង ដោយផ្តល់ជូនដល់ធុរកិច្ចនានានូវទីធ្លា ការផ្គត់​ផ្គង់ថាមពល និងបច្ចេកវិទ្យាម៉ាស៊ីនត្រជាក់ ដើម្បីរៀបចំដំណើរការឧបករណ៍ IT ផ្ទាល់ខ្លួន​របស់​ពួកគេ និងស្របពេល​ជាមួយគ្នានោះ ក៏នៅតែទទួលបាន​អត្ថប្រយោជន៍ពីហេដ្ឋារចនាសម្ព័ន្ធ​ឌីជីថល​បច្ចេកវិទ្យាចុងក្រោយរបស់យើងផងដែរ ពោលគឺបច្ចេកវិទ្យាដែលបានទទួល​វិញ្ញាបនបត្រកម្រិត Uptime Design Tier III ក្នុងតម្លៃសមរម្យ។ ByteDC ក្នុងនាមជាមជ្ឈមណ្ឌលរក្សា​ទិន្នន័យ​អព្យាក្រឹតនឹង​ផ្តល់ឱ្យអតិថិជននូវជម្រើស និងភាពបត់បែនជាច្រើន ដែលនាំឱ្យសមត្ថភាព​បំពេញ​ការងារកាន់តែប្រសើរជាងមុន កាត់បន្ថយការចំណាយ និងបង្កើនភាពជឿជាក់៕