ព័ត៌មានថ្មី៖ រកឃើញដុំសាច់មនុស្ស នៅជាប់បំណែករបស់កូនកប៉ាល់មុជទឹក Titan ដែលបានផ្ទុះនៅក្រោមបាតសមុទ្រ!

អាមេរិក៖ សោកនាដកម្មផ្ទុះនាវាមុជទឹក Titan ដែលបានដឹកអ្នកដំណើរ ៥ នាក់ ចុះទៅទស្សនាការខ្មោចកប៉ាល់ Titanic នៅក្រោមបាតមហាសមុទ្រអាត្លង់ទិកខាងជើងជំរៅជិត៤ពាន់ម៉ែត្រ កាលពីថ្ងៃទី ១៨ ខែមិថុនា ឆ្នាំ ២០២៣ កន្លងទៅនេះ នៅតែជាដក់ជាប់ក្នុងអារម្មណ៍របស់មហាជនស្ទើតែពេញពិភពលោក ដែលមិនទាន់អាចបំភ្លេចបាននៅឡើយ។ 

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ជាក់ស្តែងនៅថ្ងៃទី ២៩ ខែមិថុនា ឆ្នាំ ២០២៣ នេះ គេហទំព័រព័ត៌មាន CNN បានរាយការណ៍ថា មន្ត្រីឆ្មាំសមុទ្រអាមេរិកបានរកឃើញដុំសាច់នៅជាប់នឹងបំណែកកូននាវាមុជទឹក Titan ដែលគេជឿជាក់ថា ជាសាច់សាកសពមនុស្ស។ 

មកដល់ពេលនេះឆ្មាំសមុទ្របានប្រាប់ឱ្យដឹងថា ក្រុម​អ្នក​ជំនាញ​វេជ្ជសាស្រ្ដ​មក​ពី​សហរដ្ឋ​អាមេរិក នឹងវិភាគបំណែកដែលបានរកឃើញនេះ ដើម្បី​ឱ្យដឹង​ថា តើវា​ជា​សាច់សពមនុស្ស​ ឬ​អត់ ហើយ​បើពិត​មែន តើ​វា​ជាដុំសាច់របស់ជនរងគ្រោះមួយរូប​ណា?

គណៈកម្មាធិការស៊ើបអង្កេតដែនសមុទ្រក៏បានបន្ថែមឱ្យដឹងដែរថា ភស្តុតាងដែលបានរកឃើញថ្មីនេះ នឹងជួយអ្នកស៊ើបអង្កេតទាំងក្នុងស្រុក និងមកពីអន្តរជាតិជាច្រើន ពិតជាអាចបំបែកសំណុំរឿងនៃការស្លាប់ដ៏រន្ធត់របស់មហាសេដ្ឋីទាំង ៥ នាក់នេះ កាន់តែច្បាស់ និងកាន់តែលឿនជាងមុនផងដែរ។

គួរឱ្យដឹងផងដែរថា បំណែករបស់កូនកប៉ាល់ Titan ត្រូវបានស្រង់ចេញពីទឹកដោយយានស្ទូច Horizon Arctic របស់ប្រទេសកាណាដា នៅកំពង់ផែ St. John's រដ្ឋ Newfoundland កាលពីព្រឹកថ្ងៃពុធ ម្សិលមិញនេះ ហើយ បំណែកនីមួយៗរបស់ Titan នឹងក្លាយជាភស្តុតាងដ៏សំខាន់ ដែលជំនួយទៅដល់ការស៊ើបអង្កេតរកមូលហេតុពិតប្រាកដនៃការផ្ទុះរបស់នាវាមុជទឹកមួយនេះ៕ 

សម្រាប់ព័ត៌មានថ្មីៗដែលបានកើតឡើង ក្រុមការងារខ្មែរឡូតនឹងធ្វើការ update ជាបន្តបន្ទាប់ទៀត!!