មកដឹងវិធីសាស្ត្រទប់ទល់ជាមួយសាច់ថ្លៃ ដែលមិនសូវចូលចិត្តអ្នក

គ្រួសារ៖ ពិតណាស់ បន្ទាប់ពីរៀបការរួច គឺគូស្វាមីភរិយាតែងតែចង់រក្សាចំណងស្នេហ៍ និងចំណងគ្រួសារឲ្យស្ថិតស្ថេរយូរអង្វែង ហើយក៏ប្រាថ្នាចង់ចុះសម្រុងគ្នាជាមួយក្រុមគ្រួសារសាច់ថ្លៃ​ផងដែរ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ប៉ុន្តែជួនកាល សាច់ថ្លៃរបស់អ្នកមិនសូវចូលចិត្តអ្នកទេ ដូច្នេះអ្នកគួរប្រើវិធីសាស្ត្រទាំងនេះដើម្បីទប់ទល់៖

១. ត្រូវចាត់ទុកស្វាមី ឬភរិយាអ្នកជាមនុស្សសំខាន់

គូជីវិតគឺជាមនុស្សដែលរស់នៅជាមួយយើងដល់ចាស់ ដូច្នេះអ្នកត្រូវតែបង្កើតចំណងដ៏ស្អិតរមួតជាមួយស្វាមីឬភរិយារបស់អ្នក និងតែងតែចាត់ទុកគេជាមនុស្សសំខាន់របស់អ្នកជានិច្ច និងត្រូវមានទំនុកចិត្តទៅលើគ្នា ដូច្នេះហើយបើសិនមានរឿងអ្វីមួយកើតឡើង ស្វាមីនិងភរិយាអ្នក តែងតែយល់និងនៅក្បែរអ្នកជានិច្ច។​

២. ត្រូវចេះកំណត់ព្រំដែន

ការកំណត់ព្រំដែនគឺពិតជាសំខាន់ណាស់ ដើម្បីបង្ការកុំឲ្យមានអ្នកផ្សេងដូចជាគ្រួសាររបស់អ្នកឬគ្រួសារខាងគេ ជ្រៀតជ្រែកជីវិតអាពាហ៍ពិពាហ៍របស់អ្នក។ បើសិនជាអ្នកមិនចង់ទៅចូលរួមពិធីរបស់សាច់ថ្លៃអ្នកដោយសារតែកូនរបស់អ្នកឈឺជាដើម គឺត្រូវពិភាក្សាជាមួយស្វាមីឬភរិយាអ្នក។ ការកំណត់ព្រំដែន និងមិនធ្វើខ្លួនស្និទ្ធស្នាលជាមួយសាច់ថ្លៃពេក អាចជួយឲ្យពួកគេមិនសូវជាហ៊ានលូកដៃក្នុងរឿងគ្រួសាររបស់អ្នក។​​

៣. មានរឿងអ្វីក៏ដោយ កុំទៅនិយាយឬបង្កជម្លោះចំៗជាមួយសាច់ថ្លៃ

នៅពេលមានបញ្ហាអ្វីមួយ ដាច់ខាតចៀសវាងកុំយករឿងនោះទៅស្ដីបន្ទោសឬបង្កជម្លោះជាមួយសាច់ថ្លៃឲ្យសោះ តែគួរឲ្យស្វាមីឬភរិយា យកបញ្ហានេះទៅជជែកជាមួយម្ដាយឪពុកឬបងប្អូនគេដោយខ្លួនឯង។​

៤. ឈប់មានក្ដីរំពឹងទៅលើពួកគេ

មុនរៀបការ អ្នកតែងតែរំពឹងទុកថាសាច់ថ្លៃរបស់អ្នកនឹងជួយអ្នកលើរឿងនេះ ឬរឿងនោះជាដើម... ប៉ុន្តែជាក់ស្ដែង បើសិនពួកគេមិនបានធ្វើរឿងអស់ទាំងនោះទេ អ្នកក៏មិនគួរមានការថ្នាំងថ្នាក់ចិត្តអ្វីដែរ។ កត្តាដែលសំខាន់បំផុតគឺកុំមានក្ដីរំពឹងទុក ឬសង្ឃឹមទៅលើពួកគេ។​

៥​. កុំលើកយករឿងដែលសាច់ថ្លៃមិនចូលចិត្តមកនិយាយ

ក្នុងរង្វង់គ្រួសារនីមួយៗតែងតែមាន ប្រធានាបទខ្លះដែលមិនសមគួរឲ្យលើកយកមកនិយាយមិនថាទាក់ទងនឹង នយោបាយ, សាសនា ឬទស្សនៈផ្សេងៗ ដូច្នេះអ្នកត្រូវចៀសកុំលើកយករឿងអស់នោះមកនិយាយឲ្យសោះ ដើម្បីបង្ការកុំឲ្យមានជម្លោះ និងខ្វែងគំនិតគ្នា។​

៦. តែងតែចិត្តល្អដាក់អ្នកដទៃ

ធ្វើជាស្វាមីឬភរិយា និងមាតាបិតារបស់កូនៗ គឺត្រូវប្រកាន់ខ្ជាប់ក្ដីមេត្តាជានិច្ច និងត្រូវចិត្តល្អដាក់អ្នកជុំវិញខ្លួន មិនថាសាច់ថ្លៃ ឬអ្នកដទៃនោះឡើយ៕  

ប្រភព៖: familyeducation

• គ្រួសារ
• ជីវិត
• អប់រំចិត្ត