ចេះតែឃ្លានផ្អែម តែចង់ផ្ដាច់របស់ផ្អែម? សាកល្បងតាមវិធីសាស្ត្រងាយៗទាំងនេះ

យល់ដឹង៖ ពិតណាស់ រសជាតិផ្អែមជារសជាតិដែលអណ្ដាតយើងពេញចិត្តបំផុត ហើយមនុស្សមួយចំនួនចូលចិត្តញ៉ាំតែរបស់ផ្អែម មិនថាបង្អែម ​ភេសជ្ជៈគ្រឿងកំប៉ុង ឬពពួកកាហ្វេនិងតែបៃតង ដាក់ទឹកដោះគោជាដើម ដែលកំពុងពេញនិយមខ្លាំងក្នុងស្រទាប់យុវវ័យ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

អ្នកខ្លះផឹកភេសជ្ជៈផ្អែមមួយថ្ងៃមួយទៅពីរកែវ ដើម្បីបំពេញចំនូលចិត្តរបស់ខ្លួន ធ្វើឲ្យយូរៗទៅក្លាយទៅជាញៀន អត់របស់ផ្អែមមិនបាន ស្រាប់តែងាកមកមើលគីឡូខ្លួនឯងក៏ឡើងស្រឺតៗ ទើបភ្ញាក់ខ្លួនចង់តមរបស់ផ្អែមវិញ។​

ទាំងនេះគឺជាវិធីសាស្ត្រក្នុងការទប់ស្កាត់កុំឲ្យអ្នកចេះតែឃ្លានរបស់់់ផ្អែម៖

១. ត្រួវធ្វើយ៉ាងណាឲ្យជាតិស្ករក្នុងឈាមរបស់អ្នកមានលំនឹង (មិនឡើង មិនចុះ)

ការរក្សាស្ថេរភាពជាតិស្ករក្នុងឈាមធ្វើឲ្យអ្នកលែងមានអារម្មណ៍ចង់ញ៉ាំរបស់ផ្អែម ហើយដើម្បីរក្សាលំនឹងជាតិស្ករក្នុងឈាមអ្នក គឺត្រូវតែញ៉ាំបាយគ្រប់បីដងក្នុងមួយថ្ងៃ ដោយបញ្ចូលអាហារដែលមានសារធាតុ low-glycaemic (GI) ដែលជួយរក្សាស្ថេរភាពរបស់ជាតិស្ករក្នុងឈាម។ អាហារប្រភេទ GI នេះមានដូចជា ទឹកដោះគោ, គ្រាប់សណ្ដែក, ទឹកដោះគោជូរ និងផ្លែឈើមួយចំនួនដូចជា ចេក, គីវី , ស្វាយ និង សារីក្រអូបជាដើម។​

២. ញ៉ាំអាហារដែលមានជាតិសរសៃ (ហ្វាយប៊ឺ) ច្រើន

អាហារដែលមានជាតិសរសៃ មិនត្រឹមតែជួយសម្រួលដល់ពោះវៀនរបស់អ្នកទេ តែក៏អាចធ្វើឲ្យអ្នកញ៉ាំឆាប់ឆ្អែតផងដែរ ដែលនាំមកនូវការរក្សាលំនឹងជាតិស្ករក្នុងឈាម ដែលអាចជួយកាត់បន្ថយការចង់ញ៉ាំរបស់ផ្អែម។ កុំភ្លេចបញ្ចូលអាហារមានជាតិសរសៃក្នុងរបបអាហារប្រចាំថ្ងៃរបស់អ្នក!​

៣. ចៀសវាងរក្សាទុកគ្រឿងផ្អែមក្នុងផ្ទះរបស់អ្នក

មិនថាជានំ ភេសជ្ជៈគ្រឿងកំប៉ុង ស្ករគ្រាប់ ឬទឹកដោះគោខាប់ទេ ដាច់ខាតសូមកុំរក្សាពួកវាទុកនៅក្នុងផ្ទះ មិនដូច្នេះទេ​អ្នកមុខជាមិនអាចគ្រប់គ្រងខ្លួនឯង និងញ៉ាំវាតាមចិត្តចង់មិនខាន។​

៤. ស្វែងរកមូលហេតុបណ្ដាលឲ្យអ្នកឃ្លានរបស់ផ្អែម

តើអ្នកឃ្លានផ្អែមដោយសារតែ អ្នកមិនបានញ៉ាំអាហារ ឬក៏ព្រោះអ្នកគ្រាន់តែចង់រករបស់មកញ៉ាំកំដរមាត់? ឬក៏មកពីអ្នកតប់ប្រមល់ពេក ឬហត់នឿយ ឬធុញទ្រាន់?​

ពេលខ្លះ អ្នកមិនឃ្លានរបស់ផ្អែមទេ តែអ្នកចង់ញ៉ាំដើម្បីកំដរមាត់កុំឲ្យអផ្សុកទៅវិញ ដែលនេះជាទម្លាប់មួយដ៏អាក្រក់។​

បើសិនជាអ្នកស្ត្រេស សូមសាកល្បងដើរហាត់ប្រាណ ឬចេញទៅខាងក្រៅដើរលេងជាមួយមិត្តភក្តិ និងស្ដាប់ចម្រៀងជាដើម។​

៥. ទទួលទានអាហារដែលមានជាតិប្រូតេអ៊ីន

ប្រូតេអ៊ីនជួយឲ្យជាតិស្ករក្នុងឈាមមានលំនឹង និងធ្វើឲ្យអ្នកមានអារម្មណ៍ថាឆ្អែត ដែលអាចជួយកាត់បន្ថយចំណង់ឃ្លានផ្អែមរបស់អ្នក។

៦. កុំនិយាយថាទេ ចំពោះផ្លែឈើ

ក្នុងផ្លែឈើមានជាតិស្ករធម្មជាតិ មានលាយឡំជាមួយជាតិសរសៃ ,វីតាមីន និងជាតិរ៉ែជាច្រើន។​

៧. ហាត់ប្រាណ និងកម្រើកខ្លួនប្រាណឲ្យបានច្រើន

បើសិនជាអ្នកស្រាប់តែឃ្លានផ្អែមនាពេលណាមួយ សាកល្បងរត់ហាត់ប្រាណ ឬដើរ ដែលការធ្វើចលនារាងកាយជួយឲ្យរាងកាយបញ្ចេញសារធាតុ អង់ដូហ្វ៊ីន និងបង្កើនជាតិសេរ៉ូតូនីន ដែលធ្វើឲ្យអ្នកសប្បាយចិត្ត ឈានដល់ការបំបាត់ការឃ្លានរបស់ផ្អែម។ កាលណាដែលអ្នកឃ្លានរបស់ផ្អែមគឺត្រូវជំនួសវាដោយការដើរ ឬហាត់ប្រាណជានិច្ច។​

៨​. ផឹកទឹកឲ្យបានច្រើន

បើអ្នកផឹកទឹកមិនគ្រប់គ្រាន់ នោះអ្នកនឹងបាត់បង់ជាតិទឹក ដែលការបាត់បង់នេះតែងតែធ្វើឲ្យអ្នកច្រឡំថាអ្នកឃ្លានរបស់ផ្អែម។ បើសិនជាអ្នកស្រាប់តែឃ្លានរបស់ផ្អែម សូមផឹកទឹក​មួយកែវពេក ហើយគិតថាអ្នកឃ្លានរបស់ផ្អែមពិតមែនឬគ្រាន់តែស្រេកទឹក?

ប្រភព៖: bupa

• ជីវិត
• មេរៀនជីវិត