គូស្នេហ៍អ្នកនៅតែនិយាយជាមួយ អតីតដៃគូរបស់គេ? នេះជាវិធីដែលអ្នកគួរដោះស្រាយ!

ស្នេហា៖ ចរិតរបស់មនុស្សម្នាក់ៗគឺខុសៗពីគ្នា ហើយបើនិយាយពីរឿងអតីតមិត្តប្រុសឬមិត្តស្រីវិញ គឺអ្នកខ្លះបែកគ្នាជាមួយគេហើយតែនៅនិយាយ នៅទាក់ទងជាមួយគេធម្មតា ខណៈអ្នកខ្លះទៀតក៏កាត់ផ្ដាច់ទំនាក់ទំនងតែម្ដង។យ៉ាងណាមិញ បើសិនជាអ្នកសង្កេតឃើញថាគូស្នេហ៍របស់អ្នកចេះតែនៅក្រវែលៗអតីតមិត្តប្រុសឬមិត្តស្រីរបស់គេ ទាំងដែលកំពុងទាក់ទងជាមួយអ្នក គឺអ្នកត្រូវមានវិធានការច្បាស់លាស់ចំពោះបញ្ហានេះ ដើម្បីចៀសវាងកុំឲ្យសម័្ពន្ធភាពរបស់អ្នកវិវត្តទៅរកភាពបែកបាក់៖

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

១. ត្រូវស្វែងរកមូលហេតុធ្វើឲ្យគេនៅនិយាយជាមួយអតីតដៃគូ

ការពិតទៅការរក្សាមិត្តភាពជាមួយអតីតដៃគូ គឺជារឿងធម្មតាទេ បើសិនជាពួកគេអស់អារម្មណ៍ស្នេហាចំពោះគ្នា។ ចំណុចនេះ អ្នកត្រូវស្វែងរកហេតុផលដែលនាំឲ្យ គូស្នេហ៍របស់អ្នកនៅទាក់ទងគ្នាជាមួយគេ... តើពួកគេធ្វើកិច្ចការស្រាវជ្រាវជាមួយគ្នា? ជាមិត្តរួមការងារនឹងគ្នា? ឬមួយពួកគេធ្លាប់ព្រមព្រៀងគ្នាថានៅរក្សាភាពជាមិត្តក្រោយបែកគ្នា?បើសិនជាគេអស់ក្ដីស្រលាញ់ជាមួយអតីតដៃគូគេហើយ គឺមិនមានហេតុផលអ្វីដែលអ្នកត្រូវប្រច័ណ្ឌហួងហែងនោះឡើយ។

២. ទទួលស្គាល់ថាអ្នកកំពុងព្រួយបារម្ភពីរឿងនេះ

អ្នកមិនចាំបាច់ប្រឹងកុហកខ្លួនឯងថារឿងនេះមិនបានរំខានអ្នកនោះឡើយ។ ផ្ទុយទៅវិញត្រូវប្រឈមនឹងបញ្ហានេះត្រង់ៗ ដើម្បីងាយស្រួលឲ្យខួរក្បាលរបស់អ្នកត្រៀមការណ៍រួចជាស្រេចបើសិនមានបញ្ហាណាមួយកើតឡើង ហើយអ្នកក៏ត្រូវប្រាប់ពីអារម្មណ៍របស់អ្នកទៅកាន់មិត្តប្រុស ឬ មិត្តស្រីរបស់អ្នកផងដែរ និងយកចិត្តទុកដាក់សង្កេតទៅលើកាយវិការនិងប្រតិកម្មរបស់គេ។

៣.ឲ្យពេលវេលាខ្លួនឯង និង រក្សាចិត្តឲ្យនឹងនរ

បើសិនអ្នកដឹងរឿងនេះភ្លាម សូមកុំប្រកាន់ចិត្តខឹងច្រឡោតហើយទៅរករឿងឈ្លោះជាមួយដៃគូរបស់អ្នកទាំងដែលមិនទាន់ដឹងហេតុផលច្បាស់លាស់។ សូមឲ្យពេលវេលាខ្លួនឯងដើម្បីធ្វើចិត្ត និងនឹងនរជានិច្ច ដើម្បីទទួលយកគ្រប់ស្ថានការណ៍ ហើយអ្វីដែលមិនគួរធ្វើនោះគឺគិតតែខ្លួនឯង។

៤. ត្រូវដឹងពីពេលវេលាដែលពួកគេបែកគ្នា

អ្នកត្រូវស្វែងយល់ថាពួកគេឈប់ទាក់ទងគ្នាតាំងពីពេលណា? តើបែកគ្នាច្រើនឆ្នាំមកហើយមែនទេ? បើបែបនេះវាអាចមានន័យថា ដៃគូរបស់អ្នកព្រមព្រៀងនៅរក្សាមិត្តភាពជាមួយអតីតដៃគូរបស់គេ ប៉ុន្តែបើក្នុងករណី គេទើបតែឈប់ទាក់ទងគ្នាថ្មីៗ វាអាចមានន័យថាគេមិនទាន់ភ្លេចស្នេហ៍ចាស់ទាំងស្រុងឬបើសិនពួកគេបែកគ្នាព្រោះតែអ្នក នោះវាអាចមានហេតុផលផ្សេងក្រៅពីនោះ។

៥. បើកចិត្តនិយាយជាមួយគេ

ពេលអារម្មណ៍ល្អរៀងខ្លួនជំនួសឲ្យការទៅរករឿងឈ្លោះជាមួយគេ ពេលអារម្មណ៍អ្នកកំពុងខឹងសម្បាខ្លាំង គឺអ្នកត្រូវចេះឃាត់ចិត្ត បន្ធូរអារម្មណ៍ និងលើកយករឿងនេះមកជជែកជាមួយដៃគូរបស់អ្នក នៅពេលអ្នកទាំងពីរមានអារម្មណ៍ល្អរៀងខ្លួន ដើម្បីបញ្ចៀសកុំឲ្យមានជម្លោះណាមួយកើតឡើង។ អ្នកត្រូវបង្ហាញអារម្មណ៍ថាអ្នកមិនសប្បាយចិត្តទេពេលឃើញគេនៅជំពាក់ជំពិនជាមួយអ្នកចាស់ ហើយឆ្លៀតនិយាយថា អ្នកអរគុណគេណាស់ដែលអត់ធ្មត់នឹងអារម្មណ៍ឡើងចុះរបស់អ្នក។ អ្នកត្រូវតែប្រើភាពស្មោះត្រង់ជជែកជាមួយគេ។

៦. ដកខ្លួនពីគេរហូតដល់គេភ្លេចអ្នកចាស់

បើសិនជាអ្នកនិយាយជាមួយគេហើយ ប៉ុន្តែគេនៅតែទាក់ទងអ្នកចាស់ដោយមិនខ្វល់ពីអារម្មណ៍របស់អ្នក សូមរក្សាគម្លាតពីគេ រហូតដល់អ្នកប្រាកដចិត្តថាគេកាត់ចិត្តពីអ្នកចាស់បាន។ អ្នកមិនត្រូវទៅដើរលេងជាមួយគេ ឬមានទំនាក់ទំនងផ្លូវកាយជាមួយគេនោះឡើយ។ ជំនួសឲ្យខ្វល់ពីគេ គឺអ្នកត្រូវចាប់ផ្ដើមស្រលាញ់ខ្លួនឯង រកពេលវេលាសាកថ្មឲ្យជីវិតខ្លួនឯង ទៅណាឬញ៉ាំអីដែលខ្លួនឯងចង់បាន និងរកពេលហាត់ប្រាណដើម្បីសុខភាព។

៧. ធ្វើឲ្យគេខ្លាចនឹងការបាត់បង់អ្នក

ក្នុងករណីដែលអ្នកព្យាយាមដោះស្រាយជាមួយគេហើយ តែគេនៅតែមិនព្រមឈប់ទាក់ទងអ្នកចាស់ សូមជ្រើសរើសយកវិធីសុំចែកផ្លូវដើម្បីឲ្យគេភ្ញាក់ខ្លួន និងស្គាល់ពីតម្លៃរបស់អ្នក ប៉ុន្តែវិធីនេះមានភាពប្រថុយប្រថានបន្តិចហើយ ព្រោះគេអាចនឹងព្រមចែកផ្លូវមែនទែនជាមួយអ្នក។

៨. ដឹងថាពេលណាត្រូវដើរចេញ

ជួនកាល បើសិនជាអ្នកគិតថាអ្នកអស់ទ្រាំនឹងស្ថានភាពបែបនេះ សូមអ្នកដោះលែងគេឲ្យទៅតាមផ្លូវរបស់គេចុះ ព្រោះបើគេមិនខ្វល់ពីអ្នក និងបន្តទាក់ទងអ្នកចាស់ គឺមានន័យថាអ្នកមិនសំខាន់ចំពោះគេនោះឡើយ។ ការកាត់ចិត្តនិងដើរចេញអាចនឹងពិបាកបន្តិច តែវាអាចជាផ្លូវចេញដ៏ល្អបំផុត ព្រោះអ្នកសមនឹងទទួលបានស្នេហាដ៏ស្មោះត្រង់មួយ៕  

ប្រភព៖: hackspirit

• យុវវ័យ
• ជីវិត
• មេរៀនជីវិត