គួរធ្វើខ្លួនបែបណា ពេលទៅជួបឪពុកម្ដាយរបស់គូស្នេហ៍ជាលើកដំបូង?​

ស្នេហា៖ ស្នេហាខ្លះបានឈានដល់ដំណាក់កាលមួយដែលអ្នកត្រូវទៅស្គាល់និងចួបឪពុកម្ដាយរបស់ដៃគូរបស់អ្នក ព្រោះអ្នកគិតថាអ្នកទាំងពីរចង់ចាប់ដៃគ្នាក្លាយជាគូអនាគត។​

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ការចួបជាមួយឪពុកម្ដាយរបស់ដៃគូអ្នកចាត់ទុកជារឿងមួយមានសម្ពាធដែរ ព្រោះអ្នកតែងតែបារម្ភខ្លាចគ្រួសារខាងគេមិនសូវពេញចិត្តនឹងអ្នក ឬអ្នកអាចធ្លោយបង្ហាញកាយវិការឬប្រតិកម្មមិនសូវល្អណាមួយជាដើម ជាងនេះទៅទៀត អ្នកមិនដឹងថាត្រូវរៀបឫកយ៉ាងម៉េចនោះឡើយ។​

យ៉ាងណាមិញ ខាងក្រោមនេះជាវិធីសាស្ត្រខ្លះៗដែលជួយឲ្យអ្នកត្រៀមខ្លួនបានល្អ ពេលចួបឪពុកម្ដាយរបស់ដៃគូអ្នក៖​

១​. សួរដៃគូរបស់អ្នកពីអ្វីគួរធ្វើ និង អ្វីមិនគួរធ្វើ

បើសិនជាអ្នកចង់ឲ្យឪពុកម្ដាយគេពេញចិត្តអ្នក អ្នកត្រូវដឹងជាមុនថាពួកគាត់មិនចូលចិត្តអ្វីនិងចូលចិត្តអ្វី ដូច្នេះអ្នកអាចធ្វើខ្លួនបានត្រូវ​។ ចំណុចនេះ​សូមអ្នកស្វែងរកការពិភាក្សាជាមួយដៃគូរបស់អ្នក ដោយសួរគេផ្ទាល់ពីច្បាប់នៅក្នុងផ្ទះរបស់គេ ឬប្រធានបទដែលមិនគួរនិយាយ ហើយតើឪពុកម្ដាយគេចូលចិត្តនារីដែលស្លៀកពាក់បែបណាជាដើម។​ ២. ធ្វើខ្លួនធម្មតា

ចំណុចនេះមានន័យថា អ្នកគ្រាន់តែធ្វើខ្លួនធម្មតានិងបណ្ដោយឲ្យរឿងរ៉ាវកើតឡើងដោយខ្លួនឯង។ បើសិនពួកគេចង់និយាយអ្វី គ្រាន់តែញញិមនិងបញ្ចេញយោបល់របស់អ្នក ប៉ុន្តែត្រូវតែមិននិយាយពី​ប្រធានបទដែលត្រូវហាម ដូចជាទាក់ទងនឹងនយោបាយ ឬសាសនា ជាដើមដែលអ្នកនិងឪពុកម្ដាយរបស់គេអាចនឹងមានទស្សនៈខុសគ្នា។ បើក្នុងករណីពួកគេលើកយករឿងរបស់អ្នកមកនិយាយ ដែលជាចំណុចរសើបបែបអ្នកមិនសូវពេញចិត្ត សូមរក្សាភាពស្ងៀមស្ងាត់ កុំច្រឡោត។​

៣. ធ្វើតាមច្បាប់ទម្លាប់ក្នុងគ្រួសាររបស់គេ

ជាទូទៅ ក្នុងគ្រួសារនីមួយៗតែងតែមានច្បាប់មានទម្លាប់ ដែលខុសប្លែកពីគ្រួសារដទៃ​។ បើសិនជាអ្នកទៅចួបឪពុកម្ដាយគេនៅផ្ទះរបស់គេ សូមអ្នកធ្វើខ្លួនឲ្យបានសមរម្យ មិនត្រូវធ្វើអីខុសនឹងច្បាប់ទម្លាប់របស់ផ្ទះគេទេ។​

៤. កុំជ្រុលខ្លួនផឹកច្រើនពេក

កំហុសដ៏ធំបំផុតក្នុងការទៅចួបឪពុកម្ដាយរបស់ដៃគូ គឺបណ្ដោយខ្លួនឲ្យសប្បាយជ្រុលហួសហេតុពេក បើទោះបីជាឪពុកម្ដាយរបស់គេរួសរាយរាក់ទាក់ដាក់អ្នកក៏ដោយ។ សូមផឹកក្នុងបរិមាណមួយដ៏តិច គឺពីរទៅបីកែវបានហើយ ដើម្បីបើកឱកាសឲ្យអ្នកបានស្វែងយល់ពីគ្រួសាររបស់គេ ព្រោះបើអ្នកស្រវឹងខ្លាំង អ្នកមុខជាបង្កើតរូបភាពដ៏អាក្រក់ក្នុងខ្សែភ្នែកឪពុកម្ដាយគេហើយ។​

៥. កុំភ្លេចរឿងកាដូ

ដើម្បីឲ្យការណាត់ចួបឪពុកម្ដាយគេជោគជ័យ អ្នកត្រូវត្រៀមជាកាដូសម្រាប់ពួកគាត់ ដែលមិនចាំបាច់ជារបស់ថ្លៃៗទេ ត្រឹមផ្លែឈើ ឬទឹកត្រចៀកកាំ និងអាហារសម្រន់សុខភាពនានាសម្រាប់មនុស្សចាស់គឺគ្រប់គ្រាន់ហើយ។ បើសិនមានមីងពូនៅជាមួយដែរ សូមរក្សាកាដូនោះទុកមួយឡែក រង់ចាំទាល់តែមានឱកាសនៅជាមួយឪពុកម្ដាយគេ សឹមហុចកាដូឲ្យ។

​ ៦. បង្ហាញភាពស្មោះត្រង់

គ្មានអ្នកណាក្នុងលោក ដែលចូលចិត្តមនុស្សពូកែកុហកនិងក្រឡិចក្រឡុចទេ។ ត្រង់ចំណុចនេះ អ្នកត្រូវធ្វើជាខ្លួនឯង មិនចាំបាច់លាក់ពុតនោះឡើយ ព្រោះឪពុកម្ដាយដៃគូអ្នកអាចជាមនុស្សដែលអ្នកត្រូវប្រឈមជាមួយ មួយជីវិតតែម្ដង។ ការមានភាពជាខ្លួនឯងពិតជាគុណសម្បត្តិមួយដ៏ទាក់ទាញ៕  

ប្រភព៖: purewow

• យុវវ័យ
• ស្នេហា