អ្វីដែលត្រូវធ្វើនៅពេល ឪពុកម្ដាយអ្នកមិ​នចង់ឲ្យអ្នករៀបការជាមួយដៃគូ

ស្នេហា៖ ចំណងស្នេហ៍ខ្លះបានឈានមកដល់ដំណាក់កាលមួយដែលគូស្នេហ៍ទាំងពីរចង់រៀបការសាងគ្រួសារជាមួយគ្នា ព្រោះម្នាក់ៗគិតថាដល់ពេលដែលត្រូវបញ្ចប់ភាពនៅលីវហើយ។​ ប៉ុន្តែពេលយករឿងនេះទៅពិភាក្សាជាមួយឪពុកម្ដាយ គឺបែរជាលោកទាំងពីរមិនយល់ព្រម មិនចង់ឲ្យអ្នករៀបការជាមួយដៃគូទៅវិញ ហើយអ្នកក៏ស្រលាញ់ដៃគូខ្លាំងរហូតមិនអាចអត់បាន​... តើអ្នកគួរធ្វើយ៉ាងណាទៅ?

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

​ ១. ទទួលស្ដាប់និងនិយាយជាមួយឪពុកម្ដាយរបស់អ្នក

មិនថាអ្នកមិនសប្បាយចិត្តនឹងឪពុកម្ដាយយ៉ាងណាទេ អ្វីដែលអ្នកគួរធ្វើដំបូងគេពេលដឹងថា ឪពុកម្ដាយអ្នកមិ​នអនុញ្ញាតឲ្យអ្នករៀបការជាមួយដៃគូ គឺបើកចិត្តនិយាយជាមួយពួកគាត់ត្រង់ទៅត្រង់មក និងទទួលស្ដាប់ពីហេតុផលរបស់ពួកគេ។ ការធ្វើនេះជាវិធីមួយបង្ហាញថាអ្នកនៅតែគិតថាឪពុកម្ដាយជាមនុស្សសំខាន់ ហើយអ្នករង់ចាំស្ដាប់លោកទាំងពីរជានិច្ច។​បើសិនជាឪពុកម្ដាយអ្នកប្រាប់ហេតុផលពិតដែលពួកគាត់មិនចង់ឲ្យអ្នករៀបការ គឺអ្នកប្រហែលជាអាចរកដំណោះស្រាយបាន។​ យ៉ាងណាមិញ បើសិនជាអ្នកស្វែងយល់បានថា ឪពុកម្ដាយអ្នកមិនចង់ឲ្យអ្នករៀបការ ដោយសារមានភ័ស្តុតាងដែលដៃគូអ្នកមិនស្មោះត្រង់នឹងអ្នក គឺអ្នកត្រូវតែគោរពតាមការសម្រេចចិត្តរបស់ឪពុកម្ដាយ។​

២. ជួយឲ្យឪពុកម្ដាយអ្នកស្គាល់ពីដៃគូអ្នកឲ្យកាន់តែច្បាស់

ជួនកាល អ្នកនិងដៃគូទើបតែទាក់ទងគ្នា ក៏សម្រេចចិត្តរៀបការ ទាំងដែលឪពុកម្ដាយអ្នកគ្មានឱកាសបានស្វែងយល់ពីអត្តចរិតនិងឫកពារបស់ដៃគូអ្នកផង។ ដំណោះស្រាយដ៏ល្អគឺ ធ្វើឲ្យដៃគូរបស់អ្នកបាននៅក្បែរឪពុកម្ដាយអ្នកកាន់តែច្រើនដូចជានាំពួកគេទៅញ៉ាំអាហារពេលល្ងាចជុំគ្នា ដើម្បីបើកឱកាសឲ្យដៃគូអ្នកបានរៀបរាប់ពីខ្លួនគេប្រាប់ឪពុកម្ដាយអ្នក។​

៣. រៀបគម្រោងសម្រាប់ថ្ងៃអនាគត

បើសិនជាឪពុកម្ដាយរបស់អ្នកនៅតែបន្តមិនយល់ព្រមឲ្យអ្នករៀបការទៀតនោះ គឺអ្នកត្រូវតែងាកមកជជែកជាមួយដៃគូពីការរក្សាគម្លាតពីឪពុកម្ដាយអ្នក ដោយមិនឲ្យដៃគូអ្នកធ្វើអីដែលឪពុកម្ដាយមិនពេញចិត្ត​ជាដើម។ អ្នកត្រូវកំណត់ថាបើសិនជាមានពិធីណាមួយទាក់ទងនឹងគ្រួសារអ្នក តើដៃគូរបស់អ្នកត្រូវចូលរួមឬមិន? តើគេអាចមកលេងផ្ទះឪពុកម្ដាយអ្នកដែរឬទេ?​ ប៉ុន្តែអ្នកមិនត្រូវបណ្ដោយឲ្យគូស្នេហ៍របស់អ្នកធ្វើឲ្យអ្នកនិងឪពុកម្ដាយមើលមុខគ្នាមិនចំនោះឡើយ។​

៤. មិនត្រូវឈរនៅម្ខាងៗទេ

កាលណាដែលឪពុកម្ដាយអ្នកមិនពេញចិត្តដៃគូរៀបការរបស់អ្នកគឺស្មើនឹង អ្នកត្រូវបែងចែកពួកគេចេញជាពីរខាង ម្ខាងជាឪពុកម្ដាយ ម្ខាងជាដៃគូ ប៉ុន្តែអ្វីដែលត្រូវប្រកាន់ខ្ជាប់នោះគឺ ដាច់ខាតមិនត្រូវកាន់ជើងតែម្ខាងៗឡើយ គឺត្រូវឈរនៅចំណុចកណ្ដាល ឃើញខាងនេះខុសថាខុស ឃើញខាងនេះត្រូវថាត្រូវហើយអ្នកក៏មិនត្រូវបណ្ដោយឲ្យដៃគូធ្វើឲ្យទំនាក់ទំនងអ្នកនិងឪពុកម្ដាយអ្នកមានភាពរកាំរកូសដែរ តែក៏មិនត្រូវឲ្យឪពុកម្ដាយមានឥទ្ធិពលជ្រៀតជ្រែកសម្ព័ន្ធអ្នកជាមួយដៃគូឲ្យបែកបាក់នោះដែរ៕

ប្រភព៖: verywellmind

• យុវវ័យ
• គ្រួសារ
• ស្នេហា
• ជីវិត
• មេរៀនជីវិត