បើគេធ្វើរឿង៦យ៉ាងនេះ មានន័យថាគេចង់រៀបការជាមួយអ្នកហើយ

ស្នេហា៖ ការទាក់ទងគ្នាជាគូស្នេហ៍ គឺភាគីទាំងពីរតែងតែសង្ឃឹមថាថ្ងៃណាមួយបានចូលរោងជ័យក្រាបក្បាលដល់កន្ទេលជាមួយគ្នា និងដឹកដៃគ្នាកសាងគ្រួសាររហូតដល់ចាស់សក់ស្កូវ។ គូស្នេហ៍ខ្លះ ទើបតែស្គាល់គ្នាមិនបានប៉ុន្មានផងក៏សម្រេចចិត្តរៀបការ ឯខ្លះទៀតស្គាល់គ្នាច្រើនឆ្នាំទើបចូលរោងជ័យព្រោះនៅមើលចិត្តគ្នាការពារជ្រើសរើសគូខុស។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

បើអ្នកចង់ដឹងថាគូស្នេហ៍អ្នកបច្ចុប្បន្នគេចង់រៀបការជាមួយអ្នកឬអត់? ខាងក្រោមនេះជាសញ្ញាណថាគេចង់រៀបការជាមួយអ្នក៖

១. និយាយពីអនាគតជាមួយអ្នក

បើសិនគេនិយាយពីផែនការអនាគតជាមួយអ្នក គឺអាចនឹងមានភាគរយខ្ពស់ដែលគេចង់រៀបការជាមួយអ្នកព្រោះទង្វើបែបនេះ មានន័យថាគេរួមបញ្ចូលអ្នកក្នុងផែនការអនាគតដែរ និងចង់ចំណាយពេលមួយជីវិតជាមួយអ្នក។ គេអាចពិភាក្សាឬសួរនាំអ្នកពីពិធីរៀបការដែលអ្នកចង់បាន ថាធ្វើឡើងនៅឯណា ហើយសួរថា អ្នកចង់បានកូនប្រុសកូនស្រីប៉ុន្មាននាក់ ជាដើម។

២. អ្នកជាផ្នែកមួយដ៏សំខាន់ក្នុងជីវិតគេ

មិនថាគេទៅណាមកណា គេចង់ឲ្យអ្នកបានដឹងពីគេ បានស្គាល់មនុស្សជុំវិញខ្លួនគេ ដូចជាគេណែនាំឲ្យអ្នកទៅចួបឪពុកម្ដាយរបស់គេដោយបើកចំហរ ឬអញ្ជើញអ្នកទៅកាន់ឱកាសជប់លៀងពិសេសៗរៀបចំឡើងដោយគ្រួសាររបស់គេ មិនតែប៉ុណ្ណោះ គេក៏នាំអ្នកទៅចូលរួមកម្មវិធីនានាដូចជាកម្មវិធីអាពាហ៍ពិពាហ៍មិត្តភក្តិជាដើម ហើយបើសិនគេនិងមិត្តភក្តិរបស់គេរៀបចំដំណើរកម្សាន្តទៅណាគឺគេតែងតែរាប់អ្នកបញ្ចូលដែរ។

៣. ស្រលាញ់អ្នកខ្លាំង

គេបង្ហាញចេញថាគេស្រលាញ់អ្នក យកចិត្តទុកដាក់ពីតម្រូវការអ្នក ខ្វល់ខ្វាយពីអ្នក ការពារអ្នក ហើយថែមទាំងមិនធ្វើឲ្យអ្នកពិបាកចិត្តទេ។ គេព្យាយាមផ្គាប់ចិត្តអ្នក មិនយកភ្នែកមើលស្រីផ្សេង និងចូលចិត្តចំណាយពេលវេលាធ្វើអីរ៉ូមេនទិកជាមួយអ្នកមិនថានាំអ្នកទៅញ៉ាំអាហារពេលល្ងាចក្រោមភ្លើងទៀន ឬក៏ទៅមើលកុននោះឡើយ។

៤. គេធ្វើដូចកំពុងរស់នៅជាមួយអ្នក

ចំណុចដ៏ជាក់លាក់មួយទៀតថាគេចង់ប្រើជីវិតគូជាមួយអ្នកនោះ គឺគេធ្វើដូចខ្លួនឯងកំពុងរស់នៅជាមួយអ្នករួចហើយ ដូចជាប្ដូរមករស់នៅជាមួយអ្នក ឬផ្ញើរបស់របរមានតម្លៃរបស់គេនៅនឹងអ្នក ជាដើម ហើយជាពិសេសនោះ រាល់ពេលគេចេញទៅណាមកណា គេតែងតែប្រាប់អ្នក។

៥. សន្សំប្រាក់រួមគ្នា និងចាយប្រាក់គ្នាទៅវិញទៅមក

បើសិនជាគេទុកចិត្តអ្នករហូត ឲ្យប្រាក់សន្សំរបស់គេមកឲ្យអ្នកកាន់ ឬក៏អ្នកនិងគេមានគណនីសន្សំរួមគ្នា ឬក៏គេចេញប្រាក់ឲ្យអ្នក នោះគឺមានន័យថាគេច្បាស់លាស់ជាមួយអ្នកហើយ ដោយសាររឿងប្រាក់កាក់នេះជារឿងសំខាន់ បើគេមិនចែករំលែកវាជាមួយអ្នកគឺគេមិនមានគម្រោងរៀបការជាមួយអ្នកទេ។

៦. គេឲ្យតម្រុយមកអ្នក

ជាធម្មតា មុនពេលបុរសម្នាក់សុំនារីម្នាក់រៀបការ គឺគេតែងតែឲ្យតម្រុយ បង្ហើបៗឲ្យអ្នកស្មានដឹងមុន ដូចជាគេមកសួរអ្នកថាអ្នកចង់ប្រារព្ធពិធីរៀបការនៅកន្លែងណា? នៅប្រទេសណា? អ្នកចង់បានឈុតរៀបការម៉ូតយ៉ាងម៉េច? ឬក៏ទំហំចិញ្ចៀនរបស់អ្នកគឺទំហំអីជាដើម៕  

ប្រភព៖: bonobology

• គ្រួសារ
• ស្នេហា
• ជីវិត