លោក Sangho Jo នាយកប្រតិបត្តិក្រុមហ៊ុន Samsung ប្រចាំតំបន់អាស៊ីអាគ្នេយ៍ និងអូសេអានី បានដឹកនាំប្រតិភូជាន់ខ្ពស់ជួបសម្តែងការគួរសម និងពិភាក្សាការងារជាមួយ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម ដែលទើបតែងតាំងថ្មី

រាជធានីភ្នំពេញ៖ នារសៀលថ្ងៃទី២៩ ខែកញ្ញា ឆ្នាំ២០២៣ នេះ នៅទីស្តីការក្រសួងពាណិជ្ជកម្ម លោក Sangho Jo នាយកប្រតិបត្តិក្រុមហ៊ុន Samsung ប្រចាំតំបន់អាស៊ីអាគ្នេយ៍ និងអូសេអានី បានដឹកនាំប្រតិភូជាន់ខ្ពស់ចូលជួបសម្តែងការគួរសម និងពិភាក្សាការងារជាមួយលោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ក្នុងឱកាសនៃជំនួបពិភាក្សាគ្នានេះលោក Sangho Jo បានសម្តែងនូវការអបអរសាទរ និងកោតសរសើរលោកជំទាវដែលត្រូវបានរាជរដ្ឋាភិបាលកម្ពុជាផ្តល់សេចក្តីទុកចិត្តតែងតាំងជារដ្ឋមន្រ្តីពាណិជ្ជកម្មក្នុងអាណត្តិទី៧នេះ។ 

ក្នុងអំឡុងពេលនៃកិច្ចពិភាក្សា លោក Sangho Jo បានស្វែងយល់បន្ថែមពីបរិយាកាសធុរកិច្ចនៅកម្ពុជា និងបានថ្លែងអំណរគុណចំពោះក្រសួងពាណិជ្ជកម្ម ដែលបានរៀបចំច្បាប់ និងបទប្បញ្ញតិ្តផ្សេងៗដើម្បីធ្វើឱ្យប្រសើរឡើងនូវបរិយាកាសធុរកិច្ច ជូនធុរជនទូទៅ។

ទន្ទឹមនេះ លោក Sangho Jo ក៏សូមថ្លែងអំណរគុណផងដែរ ចំពោះក្រសួងពាណិជ្ជកម្មដែលបានគាំទ្រដល់សកម្មភាពមនុស្សធម៌របស់ Samsung នាពេលកន្លងមក ដូចជា កម្មវិធីនវានុវត្តន៍នៅសាកលវិទ្យាល័យភូមិន្ទភ្នំពេញ កម្មវិធី Samsung Love & Care ដែលបានផ្តល់ជាសម្ភារៈសិក្សាដល់សិស្សក្រីក្រនៅខេត្តកំពង់ចាមនាពេលកន្លងមក។

ជាបន្តក្រុមហ៊ុន Samsung នៅតែយកចិត្តទុកដាក់សហការជាមួយក្រសួងក្នុងសកម្មភាពមនុស្សធម៌មួយចំនួនទៀត ដោយក្នុងឱកាសនេះ ក្រុមហ៊ុនសាមសុងអេឡិចត្រូនិកក៏បានផ្តល់ជូនក្រសួងនូវអង្ករចំនួន ១០តោន ជាអំណោយសប្បុរសធម៌សម្រាប់ក្រសួងចាត់ចែងតាមតម្រូវការ។

ក្រុមហ៊ុន សាមសុង នៅតែបន្តធ្វើគ្រប់យុទ្ធនាការទាំងអស់ដើម្បីគាំទ្រឱ្យទីក្រុង ប៊ូសាន នៃប្រទេសកូរ៉េ ក្លាយជាម្ចាស់ផ្ទះនៃព្រឹត្តិការណ៍ពិព័រណ៍ពិភពលោក World Expo 2030 ក្នុងពេលខាងមុខផងដែរ៕

• រូបភាព