គន្លឹះត្រូវធ្វើ អំឡុងពេលសម្ភាសន៍ការងារ ដែលអ្នកគួរដឹង

យល់ដឹង៖ ការសម្ភាសន៍ការងារ គឺជាដំណាក់កាលមួយដែលអ្នកតំណាងក្រុមហ៊ុនបានមកជួបអ្នកដាក់ពាក្យធ្វើការលើកដំបូង ដើម្បីជជែកគ្នា ក៏ដូចជាសួរនាំនូវសំណួរផ្សេងៗ ដើម្បីពិចារណាជ្រើសរើសគេជាបុគ្គលិកម្នាក់របស់ក្រុមហ៊ុន។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ជាធម្មតាទេដែលអ្នករាងភ័យអំឡុងពេលសម្ភាសន៍ការងារ ឬមុនសម្ភាសន៍ ព្រោះអ្នកមិនដឹងច្បាស់ថា តើអ្នកតំណាងក្រុមហ៊ុនឬផ្នែកធនធានមនុស្សដែលនឹងមកសម្ភាសន៍អ្នក ជាមនុស្សបែបណា ហើយចង់បានអ្វី? យ៉ាងណាមិញ នេះជាគន្លឹះសំខាន់ៗសម្រាប់ឲ្យអ្នកត្រងត្រាប់តាម អំឡុងពេលសម្ភាសន៍ការងារ៖

១. មកដល់មុនម៉ោងសម្ភាសន៍ជានិច្ច

អ្នកគួរតែទៅដល់កន្លែងសម្ភាសន៍ការងារ យ៉ាងហោចណាស់១៥នាទីមុន ដើម្បីបង្ហាញចេញថាអ្នកជាមនុស្សគោរពពេលវេលាខ្លាំង ព្រោះគ្មានអ្នកណាចង់ជួលបុគ្គលិកដែលមកធ្វើការយឺតម៉ោងទេ។ បើសិនជាកន្លែងសម្ភាសន៍រាងឆ្ងាយពីផ្ទះរបស់អ្នក សូមចេញពីផ្ទះឲ្យបានយ៉ាងហោចណាស់១ម៉ោងមុន ដើម្បីបង្ការបញ្ហាផ្សេងៗដូចជាចរាចរណ៍កកស្ទះ ព្រោះអ្នកមិនអាចយកលេសបាននោះទេ។

២. មើលកាយវិការខ្លួនឯងឲ្យមែនទែន

អំឡុងពេលសម្ភាសន៍ នៅពេលដែលគេសួរអ្វីអ្នក សូមកុំភ្លេចពិនិត្យមើលកាយវិការរបស់អ្នក ដូចជាត្រូវតែសម្លឹងមុខអ្នកសម្ភាសន៍ការងារ ដើម្បីបង្ហាញថាអ្នកក្លាហាន អ្នកចាប់អារម្មណ៍នឹងការងារនេះ និងដាច់ខាតមិនត្រូវអង្គុយផ្អែកខ្នងទៅនឹងកៅអី ឬគងអន្ទាក់ខ្លាទេ ត្រូវតែអង្គុយឲ្យត្រង់ខ្លួន។

៣. ត្រៀមសំណួរសម្រាប់ឆ្លើយ

មុនពេលសម្ភាសន៍ អ្នកត្រូវតែស្វែងរកសំណួរនានាដែលអ្នកអាចគិតថាអ្នកសម្ភាសន៍នឹងសួរមកកាន់អ្នក ព្រោះទោះបីជាសំណួរអស់ទាំងនោះមិនត្រូវចំ១០០ភាគរយ ក៏អ្នកអាចប្រមើលមើលទុកមុន និងត្រៀមចម្លើយរួចជាស្រេច។ ការធ្វើបែបនេះ ធ្វើឲ្យអ្នកមានជំនឿទុកចិត្តលើខ្លួនឯងជាងមុន។

៤. ស្លៀកពាក់ឲ្យបានសមរម្យនិងរៀបរយ

អ្នកមិនអាចលេងស្ទាយ៍ដូចនៅផ្ទះ ឬពេលទៅដើរលេងបានទេ នៅពេលដែលអ្នកទៅសម្ភាសន៍ ដូច្នេះត្រូវតែស្លៀកពាក់ឲ្យបានសមរម្យ គឺអាវស និងខោ ឬសំពត់ខ្មៅ គ្របពីលើដោយអាវធំជាដើម ដែលជាសំលៀកបំពាក់ទូទៅសម្រាប់ការសម្ភាសន៍។

៥. មានគំនិតវិជ្ជមាន និងធ្វើឲ្យគេចូលចិត្ត

ចំណុចនេះ ផ្ដោតទៅលើអត្តចរិតរបស់អ្នក គឺអ្នកត្រូវតែបង្កើតការជួបមុខគ្នាដំបូងឲ្យគេចូលចិត្តអ្នក។ អ្នកត្រូវជម្រាបសួរ ឬរាក់ទាក់តាំងពីសន្តិសុខ ឬអ្នកទទួលភ្ញៀវ ហើយពេលចូលទៅដល់ខាងក្នុងបន្ទប់ប្រជុំ កុំទាន់អង្គុយលើកៅអីបើសិនជាគេមិនទាន់បានអញ្ជើញអ្នក។ អ្នកក៏ត្រូវមានគំនិតវិជ្ជមាន កុំពោលពាក្យរិះគន់អ្នកដទៃ ឬពោលពាក្យមិនសមរម្យ និយាយដោយគ្មានក្បាលកន្ទុយ ឬក៏ និយាយឮៗ។

៦. សួរសំណួរ

អ្នកត្រូវចេះសួរសំណួរបន្ទាប់ពីអ្នកសម្ភាសន៍បានសម្ភាសន៍អ្នករួចរាល់ ដើម្បីបង្ហាញថាអ្នកពិតជាចាប់អារម្មណ៍ចំពោះក្រុមហ៊ុនរបស់គេមែន។ បើសិនជាអ្នកមិនដឹងពីសំណួរត្រូវសួរទេ ត្រៀមសំណួរពីរបីថ្ងៃទុកមុន។

៧. ស្វែងរកទិន្នន័យទូទៅពីក្រុមហ៊ុន

មុននឹងមកសម្ភាសន៍ អ្នកត្រូវតែស្វែងរកទិន្នន័យទូទៅពីក្រុមហ៊ុនមួយនេះ ថាក្រុមហ៊ុននេះជាក្រុមហ៊ុនអ្វី មានសាខាប៉ុន្មាន ពាក្យស្លោករបស់ក្រុមហ៊ុនគឺអ្វី តើក្រុមហ៊ុនចង់បានអ្វី? អ្វីទៅដែលក្រុមហ៊ុនផ្ដោតសំខាន់ទៅលើ? ព្រោះវានឹងកាន់តែងាយស្រួលបើសិនជា អ្នកសម្ភាសន៍សួរអ្នកថាអ្នកដឹងអ្វីខ្លះពីក្រុមហ៊ុនរបស់គេ។

៨. និយាយពាក្យអរគុណ និងប្រាប់អ្នកសម្ភាសន៍ថាអ្នករង់ចាំចម្លើយ

បន្ទាប់ពីការសម្ភាសន៍បានបញ្ចប់ អ្នកត្រូវតែនិយាយពាក្យថាអរគុណនិងប្រាប់អ្នកសម្ភាសន៍ថាអ្នករង់ចាំចម្លើយពីពួកគេ។ ទង្វើនេះមិនធានាថាអ្នកនឹងបានការងារទេ តែវាធ្វើឲ្យអ្នកលេចធ្លោជាងបេក្ខជនដទៃ៕  

ប្រភព៖: talentadore

• យុវវ័យ
• ការងារ
• ជីវិត
• អនាគត