Step ដាច់ចិត្តទម្លាយថាមិនបានធ្វើតាមចិត្តដែលខ្លួនស្រលាញ់អស់រាប់ឆ្នាំ

ភ្នំពេញ៖ តាមរយៈកម្មវិធី Podcast មួយទើបចេញផ្សាយកាលពីពេលកន្លងទៅថ្មីៗនេះ នៅលើ Channel YouTube ផ្ទាល់ខ្លួន តារាចម្រៀងសាច់សខ្ចី រូបសង្ហា លោក Step បានបើកកកាយរឿងរ៉ាវជាច្រើនជុំវិញអាជីពសិល្បៈរបស់លោក ក្រោយបាត់មុខជិត ២ឆ្នាំ ហើយពេលនេះក្លាយជាតារាចម្រៀងកុងត្រាប្រចាំផលិតកម្មថ្មីសន្លាង GenMusix។ នៅចំពោះមុខពិធីការិនី ចាន់ កែវនិមល Step បានប្រាប់ថាកាលដែលលោកបាត់មុខមួយរយៈពីពិភពសិល្បៈចម្រៀង គឺដោយសារលោកសម្ងំហ្វឹកហាត់បង្កើនសមត្ថភាព និងស្វែងរកអ្វីដែលថ្មី ដែលអ្នកគាំទ្រមិនធ្លាប់ឃើញពីមុន ទើបលោកវិលត្រឡប់មកអង្រួនវិស័យតន្ត្រីសារជាថ្មី ជាមួយរូបភាពថ្មីប្លែក។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

អ្វីដែលគួរឱ្យចាប់អារម្មណ៍នោះ នៅក្នុងវីដេអូ Podcast នោះ Step ទើបដាច់ចិត្តនិយាយត្រង់ៗ ពាក់ព័ន្ធនឹងការងារដែលលោកធ្លាប់បានធ្វើកាលនៅជាតារាចម្រៀង និងជាអ្នកនិពន្ធនៅក្រុមហ៊ុនហង្សមាស។ Step បានប្រាប់ថា Style បទចម្រៀងដែលលោកបានចេញកន្លងទៅនៅផលិតកម្មចាស់ គឺលោកមិនសូវពេញចិត្តខ្លួនឯង ប៉ុន្មានទេ។ «អាចនិយាយបានថា ញ៉ុមធ្វើអីមិនមែនជាញ៉ុមបង» ។ Step បញ្ជាក់។

តារាចម្រៀងដែលពេញដោយទេពកោសល្យរូបនេះបន្តទៀតថា អ្វីដែលលោកបានធ្វើកន្លងមកនោះ មិនមែនជាស្ទីលរបស់ខ្លួននោះឡើយ។ ហេតុផលនេះហើយដែល Step ពិតជាមានអារម្មណ៍រំភើបចិត្តខ្លាំងពេលដែលក្លាយខ្លួនជាតារាចម្រៀងប្រចាំផលិតកម្ម GenMusix ។ Step ពិតជារីករាយនៅក្នុងការសហការជាមួយក្រុមការងាររបស់ GenMusix ព្រោះថា កន្លែងថ្មីនេះហើយ ទើបលោកអាចបញ្ចេញអ្វី ដែលជាលោកពិតប្រាកដ គឺមានន័យថា ជាអ្វីដែលលោកចូលចិត្ត ជាសមត្ថភាពពិត ដែលខ្លួនបង្ហាញទៅកាន់អ្នកគ្រប់គ្នា។

គួរបញ្ជាក់ថា Step បានបញ្ចេញបទចម្រៀងដំបូងរបស់ខ្លួន នៅ GenMusix គឺបទកាឡកណ្ណី ជាមួយនឹងវីដេអូចម្រៀងថ្មីប្លែក ទាំងអត្ថន័យ ទាំងការសម្ដែង ទាំងបច្ចេកទេស និងជាពិសេសនោះគឺ ការផ្ដោតសំខាន់ចម្បងលើគុណភាពរូបភាពច្បាស់កម្រិតកំពូលតែម្ដង។ បទដំបូងនេះដែរក៏ទទួលបានការកោតសរសើរជាច្រើនពីបណ្ដាអ្នកគាំទ្រ ហើយពួកគេកំពុងទន្ទឹងរង់ចាំមើលថាតារាចម្រៀងរូបសង្ហាមិនចាញ់តួកុនកូរ៉េរូបនេះនឹងមានអ្វីដែលថ្មី ប្លែកបន្ថែមទៀត ដើម្បីមកពញ្ញាក់អារម្មណ៍អ្នកគាំទ្រ៕ 

• រូបភាព