ព្រឺសម្បុរ! កុមារអេរ៉េន សមត្ថភាពអច្ឆរិយ ចាំផែនទី ឈ្មោះ ក្រុង ស្រុក ទូទាំងប្រទេសកម្ពុជាគ្មានខុស១

ភ្នំពេញ៖ មកដល់វគ្គ Live Show សប្ដាហ៍ទី២ កុមារខួរក្បាលអច្ឆរិយ អេរ៉េន បានមកបង្ហាញសមត្ថភាពថ្មី នៅចំពោះមុខគណៈកម្មការទាំង ៤ និងទស្សនិកជនទស្សនាផ្ទាល់នៅស្ទូឌីយូ បន្ទាប់ពីក្មេងប្រុសរូបនេះ ទទួលបានប៊ូតុងមាស នៅវគ្គ Judge Audition។ មកលើកនេះកាន់តែអស្ចារ្យនឹងធ្វើឱ្យគណៈកម្មការលាន់មាត់វ៉ោវៗ មិនដាច់ពីមាត់ ចំណែកឯទស្សនិកជនទស្សនាផ្ទាល់ និងតាមគេហដ្ឋានពិតជាមានការភ្ញាក់ផ្អើលសារជាថ្មីម្ដងទៀត សឹងមិនជឿថា កុមារាដែលមានអាយុត្រឹម ៨ឆ្នាំសោះ អាចពូកែចងចាំដល់ថ្នាក់នេះ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

អេរ៉េន បានបង្ហាញខ្លួនយ៉ាងសមសួននៅក្នុងវគ្គផ្សាយផ្ទាល់ និងលើកយកសមត្ថភាពការចងចាំរបស់ខ្លួនមកបង្ហាញសារជាថ្មី ប៉ុន្តែលើកនេះ គឺរូបគេបានលើកយកសមត្ថភាពចងចាំផែនទី ខេត្ត រាជធានី ស្រុក ខណ្ឌ ទូទាំងប្រទេសកម្ពុជា ព្រមទាំងចងចាំថា រាជធានី-ខេត្តនីមួយៗ មានក្រុងប៉ុន្មាន ស្រុកប៉ុន្មាន និងឈ្មោះក្រុង ស្រុក ប្រចាំខេត្តទាំងនោះទៀតផង។

ដំបូងឡើយគ្រប់គ្នាអាចនឹងគិតថា អេរ៉េន ប្រហែលជាចាំតែផែនទីទេ ប៉ុន្តែអ្វីដែលគួរឱ្យភ្ញាក់ផ្អើលនោះ គឺក្មេងប្រុសដ៏ឆ្លាតរូបនេះ មើលដឹងកន្លែងដែលគេដៅនោះ នៅខេត្តណា ហើយថែមទាំងអាច រៀបរាប់ពីចំនួន ខណ្ឌ-ស្រុក ប្រចាំរាជធានី-ខេត្តនីមួយៗ មិនឱ្យបាត់ឈ្មោះ ឬ រំលងឈ្មោះ ស្រុក ក្រុងណាមួយឡើយ។ ចំណុចនេះហើយ ដែលគណៈកម្មការ មិនអាចមិនស្រែកវ៉ោវបាន ព្រោះនេះគឺជាសមត្ថភាពដ៏កម្រសូម្បីតែមនុស្សធំខ្លះ នៅចាំមិនអស់ផង តែនេះក្មេងអាយុត្រឹម ៨ឆ្នាំ តែពូកែយ៉ាងនេះ ពិតជាមិនសរសើរមិនបានឡើយ។

កម្មវិធីបង្ហាញទេពកោសល្យលំដាប់ពិភពលោក Cambodia’s Got Talent រដូវកាលទី៣ បានឈានចូលមកដល់វគ្គផ្សាយផ្ទាល់ហើយ ទស្សនិកជនក៏អាចទិញសំបុត្រចូលទស្សនាដោយផ្ទាល់ តម្លៃត្រឹមតែ ១ម៉ឺនរៀល ដើម្បីបានឃើញផ្ទាល់ភ្នែកនូវសមត្ថភាព ទេពកោសល្យពូកែៗ របស់បេក្ខជននីមួយៗ។ Cambodia’s Got Talent  ផ្សាយផ្ទាល់រៀងរាល់ថ្ងៃសៅរ៍ ម៉ោង ៨យប់តទៅ នៅលើកញ្ចក់ទូរទស្សន៍ហង្សមាស HDTV និងនៅលើទំព័រហ្វេសប៊ុកផេក  Cambodia’s Got Talent ៕

• រូបភាព