ណុប ដាណេ ច្រៀងទាំងអួលដើមក អត្ថន័យល្អខ្លាំង បេះដូងខុសកាយ ខ្វះភាពកក់ក្ដៅពីឪពុកម្ដាយ

ភ្នំពេញ៖ ម្ចាស់សំអាងការដ៏ល្បី និងជាអ្នកច្នៃម៉ូដសម្លៀកបំពាក់ដ៏ឆ្នើមមួយរូបក្នុងប្រទេសកម្ពុជា ណុប ដាណេ កំពុងទទួលបាននូវការចាប់អារម្មណ៍ខ្លាំងពីមហាជន ក្រោយពីរូបលោក បានលើកយកបទចម្រៀងមួយ មានចំណងជើងថា «រងា» ដែលជាបទចម្រៀងតាក់តែងថ្មីដោយកវីនិពន្ធ ចន្ទ មល្លីកា មកប្រកួតក្នុងកម្មវិធី Cambodia’s Got Talent រដូវកាលទី៣។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ក្នុងវគ្គ Live Show សប្ដាហ៍ទី៣ នៃកម្មវិធីប្រកួតទេពកោសល្យលំដាប់ពិភពលោក Cambodia’s Got Talent បានធ្វើឱ្យមានការចាប់អារម្មណ៍ជាខ្លាំងមកលើ បេក្ខជន ណុប ដាណេ ចំពោះការលើកយកបទចម្រៀង ដែលមានអត្ថន័យចាក់ដោតខ្លាំង ចំពោះអ្នកដែលស្រលាញ់ភេទដូចគ្នា ជាពិសេសកូនៗដែលកើតមកជាភេទទី៣ ត្រូវបានឪពុកម្ដាយរើសអើង។ ណុប ដាណេ បានរៀបរាប់អត្ថន័យពីបទចម្រៀងដែលខ្លួនបកស្រាយនោះថា លោកជាភេទទី៣ ដែលមានគ្រួសារទទួលស្គាល់ ប៉ុន្តែចម្រៀងដែលលោកបានលើកយកមកប្រកួតនេះ គឺបង្ហាញពីសាច់រឿងពិតមនុស្សជាច្រើននៅក្នុងសង្គម ជាពិសេសអ្នកក្បែរខ្លួនលោក ដែលកើតមកជាភេទទី៣ ត្រូវបានឪពុកម្ដាយ រើសអើងខ្វះភាពកក់ក្ដៅ រហូតដល់បាក់ទឹកចិត្តឈានទៅដល់ការបញ្ចប់ជីវិតខ្លួនឯង។

អត្ថន័យនៃបទចម្រៀង ព្រមទាំងរូបភាពបង្ហាញនៅលើផ្ទាំង LED បានធ្វើឱ្យអ្នកទស្សនា និងគណៈកម្មការ ហាក់មានអារម្មណ៍ក្ដុកក្ដួលជាខ្លាំង។ ជាពិសេស ណុប ដាណេ ច្រៀងចម្រៀងមួយបទនេះទាំងអួលដើមក។ អត្ថន័យចម្រៀងនេះដែរ ក៏ជាការដាស់តឿន ពញ្ញាក់ស្មារតី ដល់ក្រុមគ្រួសារ និងមនុស្សទាំងអស់នៅក្នុងសង្គម សូមរៀនបើកចិត្តឱ្យទូលាយ កុំមានការរើសអើងភេទទី៣ អ្នកស្រលាញ់ភេទដូចគ្នា ព្រោះគ្មាននរណាម្នាក់ដែលកើតមក ចង់ក្លាយជាមនុស្សបែបនេះនោះទេ។

អ្វីដែលធ្វើឱ្យទស្សនិកជនកាន់តែផ្ទុះការចាប់អារម្មណ៍នោះ គឺបន្ទាប់ពីគណៈកម្មការ ខាត់ សុឃីម បានបញ្ចេញមតិយោបល់យ៉ាងចាក់ដោត ហើយទទួលបានការគាំទ្រយ៉ាងពេញទំហឹងពីមហាជន។ អ្នកនាង ខាត់ សុឃីម បានអំពាវនាវឱ្យមានការបើកចិត្តឱ្យទូលាយ ទទួលស្គាល់ ចំពោះអ្នកស្រលាញ់ភេទដូចគ្នា ព្រោះប្អូនស្រីរបស់អ្នកនាង ក៏ជាអ្នកដែលស្រលាញ់ភេទដូចគ្នាដែរ។ ដំបូងឡើយក្រុមគ្រួសារ អាចពិបាកទទួលយក តែដើម្បីសេចក្ដីសុខប្អូនស្រី និងដើម្បីអាចរក្សាមនុស្សជាទីស្រលាញ់បាន គឺមានតែបើកចិត្តទទួលស្គាល់។

កម្មវិធី Cambodia’s Got Talent រដូវកាលទី៣ ឈានដល់វគ្គផ្សាយផ្ទាល់សប្ដាហ៍ទី៤ នៅថ្ងៃសៅរ៍សប្ដាហ៍នេះ ចាប់ពីម៉ោង ៨យប់តទៅ នៅលើកញ្ចក់ទូរទស្សន៍ហង្សមាស HDTV និងមានការផ្សាយផ្ទាល់លើទំព័រហ្វេសប៊ុកផេក Cambodia’s Got Talent៕

• រូបភាព