កុំភ្លេចមកចូលរួម! សៀវភៅជាច្រើននឹងដាក់លក់នៅ ពិព័រណ៍សៀវភៅកម្ពុជាលើកទី១០ ធ្វើធំជាងមុន រហូតដល់ទៅ៤ថ្ងៃ

កម្ពុជា៖ ពិព័រណ៍សៀវភៅកម្ពុជា ជិតនឹងវិលត្រឡប់មកវិញហើយ ដោយលើកនេះជាការប្រារព្ធឡើងលើកទី១០ បើគិតចាប់តាំងពីឆ្នាំ២០១៣ មក។ ព្រឹត្តិការណ៍ដ៏អស្ចារ្យមួយនេះ នឹងប្រព្រឹត្តទៅនាថ្ងៃទី១៤ ១៥ ១៦ ១៧ ខែធ្នូ ឆ្នាំ២០២៣ នេះ នៅបរិវេណសាលបុរីកោះពេជ្រ (City Hall) ក្រោមប្រធានបទ "សរសេរចំណាន អានចំណាប់ ចាប់យកចំណេះ" ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

បើប្រៀបធៀបពីឆ្នាំមុនៗ ឆ្នាំនេះមានការរៀបចំឡើងយ៉ាងពិសេស ព្រោះមានស្តង់ចូលរួមលើសពី២០០ស្តង់ ហើយប្រព្រឹត្តទៅចំនួនបួនថ្ងៃពេញ ខណៈឆ្នាំមុនៗធ្វើឡើងតែបីថ្ងៃតែប៉ុណ្ណោះ។

ពិព័រណ៍នេះនឹងមានសៀវភៅគ្រប់ប្រភេទដាក់លក់ ទាំងសៀវភៅអាជីវកម្ម ចំណេះដឹង អប់រំ ប្រលោមលោក និងសៀវភៅផ្សេងៗទៀតផងដែរ ពីគ្រឹះស្ថានបោះពុម្ពផ្សាយនិងហាងសៀវភៅល្បីៗនាៗនៅកម្ពុជា ដែលជាឱកាសល្អមួយសម្រាប់អ្នកដែលចូលចិត្តអានសៀវភៅ ហើយក្រៅពីនោះក៏មានកម្មវិធីកម្សាន្តប្លែកៗដើម្បីឈ្នះរង្វាន់ ការគូសមុខនិងផាត់ពណ៌សម្រាប់កុមារតូចៗនៅសួនកុមារ កន្លែងថតរូបដ៏ស្រស់ប្រណីត និងការប្រគំតន្ត្រីដែលចូលរួមដោយសិល្បករ សិល្បការិនីជាច្រើនរូបទៀតផង។

ក្នុងនោះ ស្តង់ជំរំប៉ាកកា (Author's Zone) ដែលមានលេខ១៣៦ ក៏មានវត្តមាននៅពិព័រណ៍សៀវភៅកម្ពុជាលើកទី១០ដែរ ដោយមានលក់ជាប្រភេទសៀវភៅប្រលោមលោកទាំងបែបខ្មែរនិងបែបបរទេស ដែលតាក់តែងឡើងដោយអ្នកនិពន្ធខ្មែរសុទ្ធសាធ។ សៀវភៅប្រលោមលោកដែលនឹងដាក់លក់នៅពិព័រណ៍សៀវភៅកម្ពុជាលើកទី១០នេះ រួមមាន៖ "ស្រីស្នេហ៍របស់បិសាច" , "ផ្កាភ្លើងក្នុងដៃបិសាច", "First Lady របស់បិសាច" និង "បំពេស្នេហ៍ អធិរាជផ្ដាច់ការ" ដែលជាសៀវភៅប្រលោមលោកមនោសញ្ចេតនា បែបបរទេសពីអ្នកនិពន្ធ អាយរីស ព្រមទាំង "ម៉ាក់តូចកំពូលស្នេហ៍" និង "តំណក់ឈាមយ៉ាគូសា" ពីអ្នកនិពន្ធ ខារ៉ាមេល មកពីក្រុមសៀវភៅ "មីសស្ទីកខល (Mystical)" ។ ក្រៅពីនោះក៏មានដាក់លក់ស្នាដៃរបស់ អ្នកនិពន្ធដូចជា ដាលីយ៉ា, លីហា, លាស់គឹមហុង ,រ៉ាហ្ស៉ី, ស្វាព្រៃ, ស៊ីម ស៊ីណា, លឹម ស៊ីវលី ជាមួយគ្រឹះស្ថានបោះពុម្ពផ្សាយ Amazon Novel, សុបិនសៀវភៅ, សៀវភៅពណ៌ស្វាយជាដើម។

ចំណែកស្តង់ មរតកសៀវភៅ វិញក៏មានវត្តមាននៅពិព័រណ៍សៀវភៅកម្ពុជាផងដែរ ដោយក្រុមនេះបានបង្កើតឡើងនៅខែសីហា ឆ្នាំ២០១៨ ធ្លាប់ចូលក្នុងកម្មវិធីពិព័រណ៍សៀវភៅកម្ពុជាជាលើកដំបូង នៅឆ្នាំ២០១៨ និង ទិវាអំណានជាតិជាលើកដំបូង នៅឆ្នាំ២០១៩ និងបន្តចូលរួមជាបន្តបន្ទាប់រហូតបច្ចុប្បន្ន។ ពិព័រណ៍សៀវភៅកម្ពុជា លើកទី១០នេះ មរតកសៀវភៅ ស្ថិតនៅស្ដង់លេខ១២ ច្រកចូលទី១ ដែលមានប្រមូលផ្ដុំដោយប្រលោមលោកជាច្រើនចំណងជើង ទាំងប្រលោមលោកបែបខ្មែរនិងបែបបរទេស ដែលសុទ្ធសឹងជាស្នាដៃនិពន្ធរបស់អ្នកនិពន្ធវ័យក្មេងខ្មែរ ពីក្រុមមរតកសៀវភៅផ្ទាល់ ក៏ដូចជាមានតាំងលក់ស្នាដៃរបស់អ្នកនិពន្ធខ្មែរដែលមកពីស្ថាប័នផ្សេងទៀត ដូចជាពីខាងហាងសៀវភៅ Le Story, អ្នកនិពន្ធ គឹម ឌីណា... ជាពិសេសស្នាដៃដ៏ល្អៗរបស់អ្នកនិពន្ធជើងចាស់ គឺលោកគ្រូ ទឹម ម៉ានី (ស្មេរ) ។ល។

ប្រលោមលោករបស់ក្រុមមរតកសៀវភៅមានដូចជា លោមស្នេហ៍ទេពអក្សរ, គំនុំស្នេហ៍ប្រែបេះដូង, ឈ្លើយក្រមុំ Mr. ឃេស៊ីរ៉ាស់, មច្ចុរាជប្រលែងស្នេហ៍, រងើកស្នេហ៍មួយរាត្រី, អភ័យឯកសិទ្ធិបេះដូង, ទាសាស្នេហ៍ជំរិតបេះដូង, Mr. CEO & ភរិយាកំពូលឫក, សំបុត្ររបស់ព្រីសស៊ីឡា... និងជាច្រើនចំណងជើងទៀត។

ស្នាដៃរបស់លោកគ្រូ ទឹម ម៉ានី មានដូចជា ម៉ែ, ពុកអើយ, បង្កងប្រែពណ៌, ឃ្លោកលិច អំបែងអណ្ដែត, ពេញបូណ៌មីខែតូច ១រោចខែធំ, សិល្ប៍វិធីតែងនិពន្ធ, និង ទូកមច្ចុរាជ ប្រលោមលោកកម្រងរឿងពិតពីអ្នកនិពន្ធ ដែលទើបចេញផ្សាយនាពេលថ្មីៗ៕

• យុវវ័យ
• សៀវភៅ
• និពន្ធ