ជិតដាច់មួយឆ្នាំទៀតហើយ សួរខ្លួន​ឯងមើលថា សល់អ្វីខ្លះ?

មេរៀនជីវិត៖ ជាការពិតណាស់ ពេលវេលាគឺពិតជាមិនចាំយើងនោះទេ ពីមួយថ្ងៃទៅមួយថ្ងៃរំលងទៅត្រឹមមួយប៉ព្រិចភ្នែក បន្សល់ទុកត្រឹមការចងចាំ ក៏ដូចជាមេរៀនជីវិតផ្សេងៗ។ ជាពិសេស មនុស្សម្នាក់ៗប្រាកដជាមិនចង់ឲ្យពេលវេលាកន្លងផុតទៅដោយមិនបានសម្រេចគោលបំណងអ្វីមួយនោះទេ យ៉ាងហោចណាស់ក៏បានធ្វើរឿងមួយឲ្យខ្លួនឯងដែរ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ដូចនេះ អ្នកសួរខ្លួនឯងថា តើរយៈពេល១២ខែមកនេះ អ្នកបានធ្វើរឿងអ្វីខ្លះដែលមានប្រយោជន៍ ឬ រឿងល្អ រឿងដែលធ្វើឲ្យអ្នកសប្បាយចិត្តដែរឬទេ? ការដាក់សំនួរបែបនេះ ជាការដាស់តឿនរំលឹកថា សូមកុំឲ្យពេលវេលាពី១ឆ្នាំទៅមួយឆ្នាំកន្លងទៅដោយឥតន័យ គ្រប់វិនាទីរបស់មនុស្សម្នាក់ៗសុទ្ធតែមានតម្លៃ។

បើសិនជាឆ្នាំនេះ អ្នកមិនបានសម្រេចអ្វីមួយដែលសំខាន់ ឬ ធ្វើអ្វីមួយមិនទាន់បានសម្រេចក៏ដោយ ក៏អ្នកត្រូវចាំថា យ៉ាងហោចណាស់ វាបានបន្សល់ទុកមេរៀនឲ្យអ្នកកែប្រែឬចងចាំជាច្រើន មិនថាតែ ជាការងារ ស្នេហា គ្រួសារ ឬមនុស្សជុំវិញខ្លួន​ សុទ្ធតែអាចក្លាយជាមេរៀនដ៏មានតម្លៃ។

ម៉្យាងទៀតនោះ បើអ្នកភ្ញាក់រលឹកថា ក្នុងមួយឆ្នាំនេះ អ្នកពិតជាឥតប្រយោជន៍ សូមចង់ចាំថា អ្នកអាចធ្វើវាបាននៅឆ្នាក្រោយ ដែលជាពេលវេលាដែលអ្នកមាន ឬអ្នកអាចចាប់ផ្ដើមពីពេលនេះតទៅ ដែលសំខាន់អ្នកបានភ្ញាក់ខ្លួនថា ខ្លួនឯងត្រូវតែធ្វើអ្វីមួយដើម្បីខ្លួនឯងនៅពេលក្រោយ ហើយមនុស្សយើងមិនប្រាកដថា មានពេលវេលាថ្ងៃស្អែករហូតនោះដែរ ដូចនេះ ត្រូវធ្វើអ្វី ប្រញាប់ធ្វើឲ្យហើយ៕

អត្ថបទដោយ៖ Minn

• ជំរុញទឹកចិត្ត
• មេរៀនជីវិត
• រូបភាព