ភ្លើ-»ង»-ឆេះក្នុងផ្សារពោធិ៍ចិនតុងមួយកន្លែង បណ្តាលឱ្យខូចខាតតូបចំនួន ៣នៅក្នុងផ្សារ

ភ្នំពេញ៖ អគ្គិភ័យបានឆាបឆេះផ្សារពោធិ៍ចិនតុង ត្រង់មួយកន្លែងយ៉ាងសន្ធោសន្ធៅ​ ដែលធ្វើឲ្យមានការភ្ញាក់ផ្អើល​យ៉ាងខ្លាំងពីសំណាក់បងប្អូនប្រជាពលរដ្ឋ។​ ហេតុការណ៍នេះបានកេីតឡេីងនៅវេលាម៉ោង​ ១១និង៥៥នាទីព្រឹក ថ្ងៃទី១៧​ ខែមករា ឆ្នាំ២០២៤ ដែលស្ថិតនៅចំណុចផ្សារពោធិ៍ចិនតុង ភូមិប៉ប្រកខាងជើង សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ។

លោកវរសេនីយ៍ឯក ព្រហ្ម យ៉ន នាយការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការនគរបាលរាជធានីភ្នំពេញ បានឲ្យដឹងថា នៅមុនកើតហេតុ លោកបានទទួលព័ត៌មានពីបងប្អូនប្រជាពលរដ្ឋ ដែលបានរាយការណ៍មកកាន់លេខ Hotline របស់លោកថា មានអគ្គិភ័យឆាបឆេះផ្សារពោធិ៍ចិនតុង មួយកន្លែងយ៉ាងសន្ធោសន្ធៅ។ ភ្លាមៗនោះ លោកវរសេនីយ៍ឯក ព្រហ្ម យ៉ន បានបញ្ជាទៅរថយន្តពន្លត់អគ្គិភ័យតាមបណ្តាគោលដៅទាំងអស់ក្នុងរាជធានីភ្នំពេញ ឲ្យចេញរថយន្តពន្លត់អគ្គិភ័យជួយសង្គ្រោះអន្តរាគមន៍។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

លោកវរសេនីយ៍ឯក ព្រហ្ម យ៉ន ក៏បន្តបានថា គ្រោះអគ្គិភ័យខាងលើនេះ ត្រូវបានគ្រប់គ្រងទាំងស្រុង ប៉ុន្ដែកម្លាំងសមត្ថកិច្ច នៅបន្ដបាញ់ពន្លត់ឲ្យអស់រងើកភ្លើងចៀសវាងបង្កផលប៉ះពាល់ថែមទៀត។ តាមការបញ្ជាក់របស់លោកវរសេនីយ៍ឯក ព្រហ្ម យ៉ន គ្រោះអគ្គិភ័យខាងលើនេះ សមត្ថកិច្ចជំនាញបានធ្វើការជួយសង្គ្រោះទាន់ពេលវេលា ព្រមទាំងខូចខាតទ្រព្យសម្បតិ្តអស់មួយចំនួន។

លោកវរសេនីយ៍ឯក ព្រហ្ម យ៉ន បានបញ្ជាក់ផងដែរថា សម្រាប់ប្រតិបត្តិការពន្លត់អគ្គិភ័យខាងលើនេះ កម្លាំងសមត្ថកិច្ច បានប្រើប្រាស់រថយន្ដពន្លត់អគ្គិភ័យ ចំនួន២២គ្រឿង ដោយក្នុងនោះរួមមាន រថយន្តការិយាល័យ ចំនួន១៥គ្រឿង ប្រើប្រាស់ទឹកអស់០៦ឡាន ស្មើរនឹង២៦ម៉ែត្រគូប,​ រថយន្តជំនួយមកពីក្រសួងមហាផ្ទៃ ចំនួន០២គ្រឿង ពុំប្រើប្រាស់ទឹក, រថយន្តកងពលតូចលេខ៧០ ចំនួន០៣គ្រឿង​ ប្រេីប្រាស់ទឹកអស់០១ឡាន ស្មើនឹង០៦ម៉ែត្រគូប, រថយន្តក្រុមហ៊ុនស្រាបៀរកម្ពុជា​ ចំនួន០១គ្រឿង​ ប្រេីប្រាស់ទឹកអស់០១ឡាន​ ស្មេីរនឹង០៤ម៉ែត្រគូប​ និងរថយន្តកាណាឌីយ៉ា ចំនួន០១គ្រឿង ពុំបានប្រើប្រាស់ទឹក។

យ៉ាងណាក៏ដោយ លោកវរសេនីយ៍ឯក ព្រហ្ម យ៉ន បានបញ្ជាក់ថា ចំពោះករណីអគ្គិភ័យខាងលើនេះ គឺជាប្រភេទសំណង់ ដែកប្រក់ស័ង្កសី ទំហំ ៦៦២៤ម៉ែត្រការ៉េ បានបណ្តាលឲ្យខូចខាតឆេះតូបក្នុងផ្សារ ទំហំ (១,៥០ម៉ែត្រ គុណ ១,៥០ម៉ែត្រ) ចំនួន០៣តូប និងពុំបានឆេះរាលដាលដល់អ្នកក្បែរខាងឡើយ។ រឺឯមូលហេតុដែលនាំឲ្យមានគ្រោះអគ្គិភ័យកើតឡើងនោះ កម្លាំងសមត្ថកិច្ចជំនាញកំពុងតែធ្វើការស្រាវជ្រាវ៕

ប្រភព៖ ការិយាល័យបង្ការពន្លត់អគ្គិភ័យ និងសង្គ្រោះ នៃស្នងការនគរបាលរាជធានីភ្នំពេញ