Hyeri នឹងដើរតួក្នុងរឿងភាគស្នេហាបែប GL យកចេញពី Webtoon

កូរ៉េខាងត្បូង៖ នាពេលបច្ចុប្បន្ននេះ ប្រលោមលោកក៏ដូចជារឿងភាគជាច្រើន បែប Boys' Love (មនោសញ្ចេតនារវាងបុរសនិងបុរស) និង Girls' Love (មនោសញ្ចេតនារវាងនារីនិងនារី) បានទទួលសន្ទស្សន៍នៃការគាំទ្រខ្លាំងមែនទែន ដូច្នេះទើបបណ្ដាទូរទស្សន៍ផ្សេងៗចាប់ផ្ដើមដំណើរការផលិតរឿងបែបនេះជាច្រើន។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ជាក់ស្ដែង Hyeri ដែលជាសមាជិកក្រុម Girls' Day បានបញ្ជាក់ច្បាស់ៗថា នាងនឹងចូលរួមដើរតួក្នុងរឿង " Friendly Competition" ដែលជារឿងយកចេញពី Webtoon មានឈ្មោះដូចគ្នា ជារឿងបែបស្នេហាស្រីស្រលាញ់ស្រី ដែលស័ក្តិសមសម្រាប់អ្នកទស្សនាអាយុចាប់ពី១៩ឆ្នាំឡើង។

រឿងនេះនិយាយពី Seulgi ជាតួអង្គស្រីម្នាក់ទៀតបានប្ដូរមកសិក្សានៅសាលានារីលំដាប់ជាន់ខ្ពស់ បន្ទាប់ពីឪពុករបស់នាងបានឡើងឋានៈនិងក្លាយជាអ្នកមាន។ Hgeri នឹងដើរតួជាតួឯកស្រីម្នាក់ទៀតឈ្មោះ Yoo Jae Yee ដែលជានារីរៀនពូកែ មាន IQ ខ្ពស់ និងចាប់ផ្ដើមច្រណែន Seulgi ប៉ុន្តែយូរៗទៅពួកគេក៏បានលង់ស្រលាញ់គ្នា។

នេះជាលើកដំបូងហើយដែល Hyeri ទទួលថតរឿងភាគបែបមនោសញ្ចេតនារវាងនារីនិងនារី ដែលធ្វើឲ្យអ្នកគាំទ្រមានការរំភើប រង់ចាំមើលស្នាដៃរបស់នាង៕  

ប្រភព៖: allkpop

• រូបភាព
• តារាកូរ៉េ