សេវារថយន្តក្រុង ដឹកអ្នកដំណើរ ឥតគិតថ្លៃ ទៅមក រវាង ក្រុងសៀមរាប និងក្រុងរុនតាឯកតេជោសែន ត្រូវបានដាក់អោយដំណើរការហើយ

សៀមរាប៖ ចាប់ថ្ងៃទី១៥ ខែកុម្ភៈឆ្នាំ២០២៤នេះតទៅ សេវារថយន្តក្រុង ដឹកអ្នកដំណើរ ដោយឥតគិតថ្លៃ ទៅមក រវាងក្រុងសៀមរាប និងក្រុងរុនតាឯកតេជោសែន ត្រូវបាន រដ្ឋបាលខេត្តសៀមរាប ដាក់អោយដំណើរការហើយ ។ ដោយដំណាក់កាលដំបូងនេះ មានរថយន្តក្រុងចំនួន១០គ្រឿង សម្រាប់ដឹកជញ្ជូនប្រចាំថ្ងៃ និងត្រៀមបម្រុងចំនួន៥ គ្រឿងបន្ថែមទៀតនាពេលខាងមុខ។

លោក អ៊ឹង សោភ័ណ នាយករងរដ្ឋបាល នៃសាលាខេត្តខេត្តសៀមរាប បានឲ្យដឹងថា ការដាក់ដំណើរការសេវារថយន្តក្រុងដឹកអ្នកដំណើរទៅមករវាងក្រុងសៀមរាប និងក្រុងរុនតាឯកតេជោសែននេះ គឺបន្ទាប់ពីមានសេចក្តីសម្រេចរបស់រាជរដ្ឋាភិបាលអាណត្តិទី៦ ដែលដឹកនាំដោយសម្តេចតេជោហ៊ុន សែន និងបន្តដោយរាជរដ្ឋាភិបាលអាណត្តិទី៧ ដែលដឹកនាំដោយសម្តេចធិបតី ហ៊ុន ម៉ាណែត បានសម្រេចផ្តល់រថយន្តក្រុងចំនួន១០ គ្រឿង ក្នុងការសម្រួលដឹកជញ្ជូនបងប្អូនប្រជាពលរដ្ឋពីក្រុងទាំងពីរនេះ ដោយឥតគិតថ្លៃ ដើម្បីជាការសម្រួលនូវទុកលំបាករបស់ពួកគាត់ដែលត្រូវធ្វើដំណើរទៅមកប្រកបរបរ កិច្ចការងារប្រចាំថ្ងៃ ។ លោកបានបន្តថា ការផ្តល់ជូននេះ មិនត្រឹមជាការផ្តល់ជូនប្រជាពលរដ្ឋនៅក្រុងរុនតាឯកប៉ុណ្ណោះទេ សម្រាប់បងប្អូនប្រជាពលរដ្ឋ ដែលមានបំណងធ្វើដំណើរតាមខ្សែរត់ ដែលរដ្ឋបាលខេត្តបានកំណត់ក៏អាចទទួលបានការធ្វើដំណើរ ដោយឥតគិតថ្លៃផងដែរ ដោយរដ្ឋបាលខេត្ត បានរៀបចំ ចំណតចំនួន១១ ផ្សេងទៀត នៅតាមផ្លូវនៃខ្សែរត់ ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

សូមជម្រាបថា រាជរដ្ឋាភិបាលកម្ពុជា បានផ្តល់រថយន្តក្រុង ចំនួន៥០គ្រឿង ដល់រដ្ឋបាលខេត្តសៀមរាប សម្រាប់ដឹកអ្នកដំណើរទៅមកដោយឥតគិតថ្លៃរវាងក្រុងសៀមរាប និងក្រុងរុនតាឯកតេជោសែន ហើយបន្ទាប់ទៀត រដ្ឋបាលខេត្តសៀមរាប ក៏គ្រោងនឹងពង្រីកសេវាកម្មនេះ ទៅកាន់តំបន់ពាក់ស្នែង និងក្នុងក្រុងសៀមរាប ផងដែរ ៕

ប្រភព៖ យុវជនប្រតិកម្មរហ័សរដ្ឋបាលក្រុងសៀមរាប