2NE1 ត្រឡប់មកវិញ? ផលិតកម្ម YG បញ្ជាក់ថា CL បានណាត់ចួបជាមួយ Yang Hyuk Suk ពិតប្រាកដមែន

កូរ៉េខាងត្បូង៖ ប្រជាប្រិយភាពរបស់ក្រុមចម្រៀងនារី 2NE1 នៅតែបន្តកក្រើកល្បីរន្ទឺ ទោះបីពួកគេត្រូវបានផលិតកម្ម YG Entertainment ប្រកាសរំសាយនៅឆ្នាំ២០១៦ក្ដី ដោយសារសមាជិកទាំងបួន CL, Dara, Bom និង Minzy សុទ្ធតែមានទំនាក់ទំនងគ្នាយ៉ាងជិតស្និទ្ធិ ហើយពួកគេក៏បានថតរូបជុំគ្នា ក្នុងឱកាសគម្រប់ខួប១៥ឆ្នាំដែលបង្ហាញមុខលើឆាកផងដែរ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

យ៉ាងណាមិញ ថ្មីៗនេះមានរបាយការណ៍ពី OSEN បានបញ្ជាក់ថា CL ដែលជាមេក្រុម 2NE1 នោះបានណាត់ចួបទទួលទានអាហារពេលល្ងាចជាមួយនឹងលោក Yang Hyuk Suk ដែលជាម្ចាស់ភាគហ៊ុនរបស់ផលិតកម្ម YG ផ្ទាល់យ៉ាងយូរ ដែលពុំដឹងថាអ្នកទាំងពីរនិយាយគ្នារឿងអីនោះឡើយ។

ប៉ុន្តែអ្នកគាំទ្រពិតជាមានសង្ឃឹមខ្លាំងណាស់ ព្រោះអ្នកទាំងអស់ពីរបានចួបជជែកគ្នាអំឡុងពេលគម្រប់ខួប១៥ឆ្នាំរបស់ 2NE1 ទើបអ្នកគាំទ្រសង្ឃឹមថា 2NE1 អាចត្រឡប់មកចេញបទចម្រៀងថ្មី ឬបន្តក្រុមឡើងវិញ។

ឆ្លើយតបទៅនឹងព័ត៌មាននេះ ផលិតកម្ម YG បានចេញមកបញ្ជាក់ថា វាជាការពិតដែលលោក Yang Hyuk Suk បានចួបជាមួយនឹង CL តែវាមិនមែនជាការណាត់ជួបផ្លូវការអ្វីទេ ហើយពួកគេពិបាកនិយាយណាស់ថាប្រធានបទទាក់ទងនឹងអ្វី។

គួរបញ្ជាក់ផងដែរថា លើកចុងក្រោយគេដែល 2NE1 ឡើងសម្ដែងគឺនៅលើឆាក Coachella ឆ្នាំ២០២២ ដែលធ្វើឲ្យអ្នកគាំទ្រនាំគ្នារំភើបនឹងវត្តមានពួកគេ៕

ប្រភព៖: allkpop

• រូបភាព
• តារាកូរ៉េ