៦ខែដើមឆ្នាំ២០២៤ ក្មេងទំ.នើ.ងជាង៤០០នាក់ ត្រូវបានក.សា.ងសំ.ណុំ.រឿងប.ញ្ជូ.ន.ទៅ.តុ.លា.ការ​

ឯកឧត្តម ឧត្តមសេនីយ៍ឯក ឆាយ គឹមខឿន ស្នងការរងនៃអគ្គស្នងការនគបាលជាតិ បានថ្លែងប្រាប់ក្រុមការងារប្រតិបត្តិផ្សព្វផ្សាយព័ត៌មានតាមអ៉ីនធឺណិតក្រសួងព័ត៌មាននារសៀលថ្ងៃទី២ ខែឧសភា ឆ្នាំ២០២៤នេះថា ៦ ខែដើមឆ្នាំ២០២៤ អគ្គស្នងការនរគបាលជាតិ បង្ក្រាបបាននូវសកម្មភាពក្មេងទំនើង ចំនួន៨០០ករណី ដែលកើន២០០ករណី បើធៀបទៅនឹង៦ខែដូចគ្នា កាលដើមឆ្នាំ២០២៣។

ឯកឧត្តម បានបន្ថែមថា ក្នុងករណីបង្ក្រាបខាងលើ កម្លាំងបានធ្វើការឃាត់ខ្លួនចំនួន២០០០នាក់ ដោយក្នុងនោះក្មេងទំនើងជាង១៥០០នាក់ ត្រូវបានអប់រំ ធ្វើកិច្ចសន្យា ប្រគល់ជូនអាណាព្យាយបាលវិញ។ ដោយឡែកក្មេងទំនើងជាង៤០០នាក់ផ្សេងទៀត ត្រូវបានកសាងសំណុំរឿងបញ្ជូនទៅតុលាការ ក្រោយពីពិនិត្យឃើញថាមានពាក់ព័ន្ធនឹងបទល្មើសគ្រឿងញៀន និងព្រហ្មទណ្ឌ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

តាមឯកឧត្តម ស្នងការរងនៃអគ្គស្នងការនគបាលជាតិ បានលើកឡើងថា ការចាប់ផ្តើមចេញសកម្មភាពបង្ក្រាបក្មេងទំនើងនេះយ៉ាងខ្លាំងក្លានេះ គឺបន្ទាប់ពី ប្រមុខរាជរដ្ឋាភិបាលកម្ពុជា បានផ្តល់អនុសាសន៍កាលពីថ្ងៃទី២៣ ខែឧសភាកន្លងទៅនេះ ​ អគ្គស្នងការនគបាលជាតិ បានចេញសេចក្តីណែនាំដល់ មាតាបីតាសិស្ស គ្រឹះស្ថានសិក្សា ដើម្បីរួមគ្នាបង្ក្រាបក្មេងទំនើង តាមរយៈការអប់រំណែនាំ និងតាមដានពិនិត្យនូវស្ថានភាពរបស់ពួកគេ ដើម្បីរាយការណ៍ជូនសមត្ថកិច្ច។

ដោយឡែករយៈពេលតែមួយសប្តាហ៍ គិតត្រឹមថ្ងៃទី២៣ ដល់៣០ ខែឧសភា អគ្គស្នងការនគបាលជាតិ បង្ក្រាបក្មេងទំនើងបាន ចំនួន៨២ករណី នឹងឃាត់ខ្លួនបាន២៦៧នាក់ និងកសាងសំណុំរឿងបញ្ជូនទៅតុលាការចំនួន២២៩នាក់ ដោយក្នុងនោះមាន៣៩នាក់ ពាក់ព័ន្ធនឹងបទល្មើសគ្រឿងញៀន។

គួររម្លឹកផងដែរថា សម្តេចធិបតី ហ៊ុន ម៉ាណែត នាថ្ងៃទី ២៣ ខែឧសភា បានបញ្ជាឱ្យអភិបាលរាជធានី-ខេត្ត និងស្នងការដ្ឋាននគរបាលរាជធានី-ខេត្តទាំងអស់ ត្រូវបង្ក្រាបក្រុមក្មេងទំនើង ជាពិសេសក្រុមដាវស៊ាំម៉ូរ៉ៃ ដែលអុកឡុកក្នុងសង្គម ដោយគ្មានការយោគយល់ និងលើកលែង។ ការដាក់បទបញ្ជានេះ បន្ទាប់ពីសម្តេចសង្កេតឃើញថា នារយៈពេលកន្លងមកនេះមានករណីក្មេងទំនើងបង្កើតជាបក្ខពួកដេញកាប់ចាក់គ្នាយ៉ាងអាណាធិបតេយ្យ ដែលបណ្តាលឱ្យមានអ្នករងរបួស និងប៉ះពាល់ទៅដល់សន្តិសុខ សណ្តាប់ធ្នាប់សាធារណសង្គម។

ជាមួយគ្នានោះ អគ្គស្នងការដ្ឋាននគរបាលជាតិ ឯកឧត្តម ស ថេត បានប្តេជ្ញាចិត្តយ៉ាងមុតមាំ ដោយចាត់វិធានការជំនាញ និងវិធានការច្បាប់ ក្នុងការបង្ការ ទប់ស្កាត់ និងបង្រ្កាបនូវរាល់សកម្មភាពក្មេងទំនើងឲ្យបានម៉ឺងម៉ាត់ និងហ្មត់ចត់បំផុត ដើម្បីពង្រឹងសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម​ ដោយមិនអនុញ្ញាតឱ្យក្រុមក្មេងទំនើងអុកឡុកសារជាថ្មីទៀតទេ៕