តារាចម្រៀងរ៉េបវណ្ណដាបានលើកឡើងថា«ក្នុងនាមជាសិល្បករមួយរូបតំណាងឱ្យផលិតកម្ម បារមី និង ក្រុមការងារទាំងអស់ ពួកយើងពិតជាមានមោទកភាពបំផុត ដែលត្រូវបានអញ្ជើញជាកិត្តិយសទៅសម្តែងតំណាង ប្រទេសកម្ពុជានៅលើឆាកនៃកម្មវិធីបិទការប្រកួតកីឡា អូឡាំពិករដូវក្តៅ ២០២៤ នៅទីក្រុងប៉ារីស ប្រទេសបារាំង ហើយពួកយើងនឹងបន្តខំប្រឹងប្រែង ដើម្បីនាំយកសម្លេងតន្ត្រីខ្មែរទៅបង្ហាញឱ្យកាន់តែល្បីរន្ទឺនៅលើឆាកអន្តរជាតិ»។
តារាចម្រៀងវណ្ណដា បានសរសេរនៅលើបណ្តាញសង្គមថា« ក្នុងនាមជាកូនខ្មែរ នេះជាអ្វីដែលខ្ញុំ និងក្រុមការងារតែងតែ ស្រមៃចង់ធ្វើសម្រាប់ប្រទេសកម្ពុជា ហើយឥឡូវនេះគឺ ពិតជារំភើបដែលបានឃើញពុកម៉ែបងប្អូនទាំងអស់ចូលរួម រីករាយសាទរជាមួយគ្នាក្នុងពេលវេលាដ៏មានន័យនេះ»។
ការប្តេជ្ញានេះបានធ្វើជាការឆ្លើយតបចំពោះសម្តេចតេជោហ៊ុនសែន ប្រធានព្រឹទ្ធសភា និងសម្តេចធិបតីហ៊ុនម៉ាណែតនាយករដ្ឋមន្រី្តដែលបានលើកសរសើរនិងអបអរសាទរចំពោះតារាចម្រៀងវណ្ណដា ដែលបានជួយលើកតម្កើងមុខមាត់ប្រទេសនៅលើឆាកអន្តរជាតិ។
សូមរំលឹកថា កាលពីថ្ងៃទី១២សីហា សម្តេចតេជោហ៊ុនសែន បានសរសេរនៅលើបណ្តាញសង្គមថា«ពុកពិតជាមានការភ្ញាក់ផ្អើលដែលកូនបានធ្វើកិច្ចការសម្រាប់កិត្តិយសជាតិបែបនេះ»។
សូមរំលឹកថា តារាចម្រៀងរ៉េប ម៉ាន់ វណ្ណដា បានបង្ហាញខ្លួនយ៉ាងភ្ញាក់ផ្អើលនៅក្នុងឱកាសច្រៀងនៅក្នុងព្រឹត្តិការណ៍បិទកីឡាអូរឡាំពិកនាក្រុងប៉ារីសកាលពីយប់ថ្ងៃទី១១សីហាឆ្នាំ២០២៤ ដោយច្រៀងបទ«Time to Rise»។ វត្តមានរបស់តារាចម្រៀងរ៉េប វណ្ណដា នៅក្នុងព្រឹត្តិការណ៍អន្តរជាតិនៅប្រទេសបារាំងនេះ បានជួយលើកស្ទួយកិត្តិនាមរបស់ព្រះរាជាណាចក្រកម្ពុជានៅលើឆាកអន្តរជាតិ៕
ប្រភព៖ ក្រសួងព័ត៌មាន
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
