អាកាសយានដ្ឋានអន្តរជាតិ សៀមរាបអង្គរប្រកាសបញ្ចុះតម្លៃចំណត និងប្រតិបត្ដិការផ្សេងៗ ចំពោះក្រុមហ៊ុនអាកាសចរណ៍ និងជើងហោះ​ហើរថ្មី

ក្នុងឱកាសគម្រប់១ឆ្នាំនៃការបើកដំណើរជាផ្លូវការ កាលពីថ្ងៃទី១៦ ខែតុលា ឆ្នាំ២០២៤នេះ អាកាសយានដ្ឋានអន្ដរជាតិ សៀមរាប​អង្គរ បានប្រកាសបញ្ចុះតម្លៃចំណត និងប្រតិបត្ដិការផ្សេងៗ សម្រាប់ជើង​ហោះហើរថ្មី ក៏ដូចជាក្រមហ៊ុនអាកាសចរណ៍ថ្មី ដើម្បីលើក​ទឹក​ចិត្ដ និងទាក់ទាញដល់ក្រុមហ៊ុនអាកាសចរណ៍ថ្មីដែលប្រតិបត្តិការជើងហោះហើរចេញចូលអាកាសយានដ្ឋានអន្តរជាតិ សៀមរាបអង្គរ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ឯកឧត្តមបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការ​ដ្ឋាន​អាកាសចរណ៍ស៊ីវិល បានបញ្ជាក់ថា កម្រៃសិទ្ធិហោះហើរ​តែម្ខាង​ដល់ក្រុមហ៊ុនអាកាសចរណ៍ ដែលប្រតិបត្តិការជើងហោះហើរអន្តរជាតិ​ចេញចូលអាកាសយានដ្ឋានអន្តរជាតិ សៀមរាបអង្គរ រួមមានផ្តល់ការ​ចុះកម្រៃ ៥០ភាគរយដូចគ្នា ជាមួយ Airlines ផ្សេងទៀតដែរ សម្រាប់​ជើង​ហោះហើរបន្ថែម និងជើងហោះហើរ​ដោយយន្តហោះជួល។

ផ្តល់ការចុះកម្រៃ ៥០ភាគរយ ចំពោះជើងហោះហើរជាប្រចាំគ្រប់ជើង​ហោះហើរ នៅអាកាសយានដ្ឋានអន្តរជាតិ សៀមរាបអង្គរ ចំពោះកម្រៃ​​ចំនួន ៥០ភាគរយទៀត ដែលនៅសល់ត្រូវបានផ្តល់ជាការលើកទឹក​ចិត្តបន្ថែមស្របទៅតាមលក្ខខណ្ឌកំណត់ ដូចជា​សម្រាប់​ជើងហោះ​ហើរជាប្រចាំទាំងឡាយណាដែលផ្ទុកអ្នកដំណើរចាប់ពី ១២០នាក់ដល់ ១៤៩នាក់ ទទួលបានការកាត់បន្ថយកម្រៃ​ចំនួន ២៥ភាគរយបន្ថែម និងសម្រាប់ជើងហោះហើរជាប្រចាំទាំងឡាយណាដែលផ្ទុកអ្នកដំណើរចាប់ពី ១៥០នាក់ឡើងទៅ នឹងត្រូវ​ទទួលបានការការចុះកម្រៃចំនួន ៥០ភាគរយបន្ថែម ឬទទួលបានការកាត់បន្ថយសរុប ១០០ភាគរយ ព្រមទាំងបានកាត់បន្ថយកម្រៃ​សេវានាំផ្លូវសម្រាប់ការចុះចតចំនួន ៥០​ភាគរយ ដល់ក្រុមហ៊ុនអាកាសចរណ៍ដែលប្រតិបត្តិការជើង​ហោះហើរ​ក្នុងស្រុក និងអន្តរជាតិ នៅអាកាសយានដ្ឋានអន្តរជាតិ សៀមរាបអង្គរ សម្រាប់រដូវខ្សត់ភ្ញៀវ/រដូវបៃតង។

ឯកឧត្ដមបន្ដថា ក្រុមហ៊ុនគ្រប់គ្រង និងប្រតិបត្តិការអាកាសយានដ្ឋាន​អន្តរជាតិ សៀមរាបអង្គរ/YACA បាននឹងកំពុងពិនិត្យពិចារណា ដាក់​ចេញនូវគោលការណ៍លើកទឹកចិត្ត និងសម្រួលដល់ការយកកម្រៃសេវា​នានាបន្ថែមទៀត ដល់ឧស្សាហកម្មអាកាសចរណ៍តាម​លទ្ធភាពដែល​អាចធ្វើទៅបាន។ ជាមួយគ្នានោះ អគ្គនាយកដ្ឋានពន្ធដារ មានការអនុ​គ្រោះផ្នែកពន្ធកាត់ទុក និងអាករពិសេស ចំពោះ​ក្រុមហ៊ុន​អាកាសចរណ៍ រួមមាន បន្ថយអត្រាពន្ធកាត់ទុកពី ១៤ភាគរយ មកត្រឹម១០ភាគរយ ចំពោះការជួលយន្តហោះ​ពីក្រៅ​ប្រទេស មកប្រកបអាជីវកម្ម ក្រុមហ៊ុន​អាកាសចរណ៍ក្នុងស្រុក។ បន្ថយអត្រាអាករពិសេសពី ១០ភាគរយ មកត្រឹម៥ភាគរយ ចំពោះសេវាដឹកជញ្ជូនអ្នកដំណើរតាមផ្លូវអាកាស ដោយពុំគិតថាការដឹកជញ្ជូនអ្នកដំណើរធ្វើឡើងដោយក្រុមហ៊ុនអាកាសចរណ៍​ក្នុងស្រុក ឬក្រុមហ៊ុនអាកាសចណ៍បរទេសឡើយ។ ការអនុគ្រោះខាងលើនេះ មានរយៈពេល៣ឆ្នាំ គិតចាប់ពីថ្ងៃទី០១ ខែមិថុនា ឆ្នាំ២០២៤ ដល់ថ្ងៃទី៣១ ខែឧសភា ឆ្នាំ២០២៧។

ឯកឧត្ដមបានបញ្ជាក់បន្ថែមថា ថ្មីៗនេះ រាជរដ្ឋាភិបាលកម្ពុជា ក៏បា​នគិតគូរដាក់ចេញនូវគោលនយោបាយ និងវិធានការអនុ​គ្រោះ​បន្ថែម​ទៀត ដល់ឧស្សាហកម្មអាកាសចរណ៍ និងឧស្សាហកម្មទេស​ចរណ៍ ដើម្បីជំរុញ និងសម្រួលដល់ការវិនិយោគ បង្កើន​ផលិត​ផលទេសចរណ៍​ថ្មីនៅខេត្ដសៀមរាប តាមរយៈយន្ដការភាពដៃគូរវាងរដ្ឋ និងឯកជនផង​ដែរ។

សូមជម្រាបថា អាកាសយានដ្ឋានអន្ដរជាតិ សៀមរាបអង្គរ មាន​សមត្ថភាព​អាចទទួលបានយន្តហោះរហូតដល់កូដអ៊ី មានចំណត​យន្តហោះចំនួន៣៨ ក្នុងនោះសមត្ថភាពអាចទទួលបានអ្នកដំណើរ​ប្រចាំឆ្នាំ សម្រាប់រយៈពេលខ្លី-មធ្យម ៧លាននាក់ក្នុងមួយឆ្នាំ និងរយៈពេលវែង ២០លាននាក់ក្នុងមួយឆ្នាំ និងសមត្ថភាពទទួលបាន​ទំនិញប្រចាំឆ្នាំ សម្រាប់រយៈពេលខ្លី-មធ្យម ១០.០០០តោន​មួយឆ្នាំ និងរយៈពេលវែង ៦០.០០០តោនមួយឆ្នាំ៕

(ប្រភពមន្ទីរព័ត៌មានខេត្តសៀម​រាប)