បុណ្យសមុទ្រលើកទី១១ ជុំទី៣ នឹងប្រារព្ធពាក់​កណ្ដាល​ខែធ្នូនៅខេត្តកំពត

ខេត្តកំពតត្រូវបានជ្រើសរើសធ្វើជាម្ចាស់ផ្ទះបុណ្យ​សមុទ្រ​លើកទី១១ ជុំទី៣ឆ្នាំ២០២៤ ដែលនឹងប្រារព្វ​ចាប់ពី​ថ្ងៃទី១៣ដល់ថ្ងៃទី១៥ខែធ្នូខាងមុខក្រោមប្រធានបទ“អបអរបេតិកភណ្ឌនិងចីរភាពនៃតំបន់ឆ្នេរ”។ខណៈនេះ​រដ្ឋបាលខេត្តកំពតកំពុងមមាញឹករៀបចំទីតាំងដែលត្រូវធ្វើពិធី និងការតុបតែងសោភណភាពក្នុងទីក្រុងខ្លួន​ឱ្យកាន់​តែទាក់ទាញ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

សូមជម្រាបថា យោងតាមសេចក្តីជូនដំណឹងរបស់​ទីស្តីការគណៈរដ្ឋមន្ត្រី លេខ : ៧៧៥ សជណ.ពទ ចុះថ្ងៃទី១២ ខែមិថុនា ឆ្នាំ២០២៤ រាជរដ្ឋាភិបាលសម្រេច​ជាគោលការណ៍ពិធីបុណ្យសមុទ្រ ឯកភាពកំណត់យក​ខេត្តកំពត ចាប់ពីថ្ងៃទី១៣ ដល់ថ្ងៃទី១៥ ខែធ្នូ ឆ្នាំ២០២៤។

តាមកម្មវិធីដែលគ្រោងទុក ពិធីបើកជាផ្លូវការប្រព្រឹត្តិទៅ​នាថ្ងៃសៅរ៍ទី១៤ ខែធ្នូ ក្រោមអធិបតីភាពដ៏ខ្ពង់ខ្ពស់​សម្តេចមហាបវរធិបតី ហ៊ុន ម៉ាណែត នាយករដ្ឋ​មន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត។

ព្រឹត្តិការណ៍នេះដែរ នឹងមានសកម្មភាពសំខាន់ៗ​សម្រាប់​ប្រជាពលរដ្ឋ ទេសចរជាតិ និងអន្តរជាតិទស្សនា និង​កម្សាន្ត ដូចជា ការសម្តែងសិល្បៈ ការប្រគំតន្ត្រី ចូលរួមពី ក្រុមសិល្បករ សិល្បការិនី តារាចម្រៀងជាតិ និងអន្តរជាតិ​​​ល្បីៗព្រមទាំងមានការ អុជកាំជ្រួចអបអរសាទរ​ពិធី​បុណ្យសមុទ្រលើកទី១១,សកម្មភាពកីឡានិងការប្រកួតកីឡាគ្រប់ប្រភេទ,ការតាំងពិព័រណ៍ផលិតផលទេសចរណ៍ និងផលិតផលទូទៅ មហោស្រពម្ហូបអាហារ ភេសជ្ជៈ ព្រមទាំង សកម្មភាពកម្សាន្តនានា។

ពិធីបុណ្យសមុទ្របានប្រព្រឹត្តទៅចំនួន១០លើករួចមកហើយ ហើយខេត្តកំពតក៏ធ្លាប់ធ្វើជាម្ចាស់ផ្ទះចំនួន​២លើករួច​មកហើយដែរ គឺឆ្នាំ២០១៥និងឆ្នាំ២០១៩។បុណ្យសមុទ្រត្រូវបានរៀបចំឱ្យក្លាយជាបុណ្យបែបទេសចរណ៍ចាប់តាំងពីឆ្នាំ២០១១បន្ទាប់ពីឆ្នេរ សមុទ្រកកម្ពុជាបាន​ចូលជាសមាជិកនៃក្លឹបឆ្នេរសមុទ្រជាងគេបំផុតនៅលើពិភពលោក។បុណ្យនេះដែរ កំណត់រៀបចំ ធ្វើនៅបណ្តា​ខេត្ត​នៃតំបន់ឆ្នេរសមុទ្រប៉ុណ្ណោះ ដែលមានខេត្តចំនួន៤ រួមមាន ខេត្តកោះកុង ព្រះសីហនុ កែប និងខេត្តកំពត ដោយឈរលើគោលការណ៍​ផ្លាស់វេនគ្នាជារៀងរាល់ឆ្នាំ ដោយចាប់ពីខេត្តព្រះសីហនុ ។

ទាក់ទងនឹងបុណ្យសមុទ្រលើកទី១១ នេះដែរ ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍បានធ្លាប់​លើក​ឡើង​ថា ប្រធានបទ “អបអរបេតិកភណ្ឌ និងចីរភាព​នៃតំបន់​ឆ្នេរ” គឺស្របតាមការកំណត់របស់ខេត្ត​កំពត​ជា"គោល​ដៅទេសចរណ៍ វប្បធម៌ និងកសិ-ទេស​ចរណ៍”។ការជ្រើសរើសខេត្តកំពតធ្វើជាម្ចាស់ផ្ទះពិធីបុណ្យសមុទ្រឆ្នាំនេះដើម្បីលើកកម្ពស់ទេសចរណ៍ ឆ្នេរសមុទ្រកម្ពុជា និងលើកទឹកចិត្តដល់ការប្តេជ្ញាចិត្តរបស់អ្នកពាក់ព័ន្ធទាំងអស់ក្នុងការអភិរក្សនិងអភិវឌ្ឍតំបន់ឆ្នេរប្រកប ដោយ​ចីរភាព។ ការ​ផ្តោត​ជា​ពិសេស​គឺ​លើក​កម្ពស់​គុណភាព​សេវាកម្ម​ក្នុង​ឧស្សាហកម្ម​ទេសចរណ៍»។

រយៈពេលប៉ុន្មានឆ្នាំចុងក្រោយនេះ ខេត្តកំពតបានផ្លាស់​ប្តូរមុខមាត់ថ្មីតាមរយៈការបង្កើតសមិទ្ធផលបម្រើឱ្យវិស័យទេសចរណ៍រួមមានដូចជា រូបសំណាកសេះ​សមុទ្រ​បាញ់ទឹក នាឡិកាធំកម្ពស់៣៥ម៉ែត្រ និងឆ្នេរកម្សាន្ត​ជាប់មាត់ព្រែក នៅកណ្ដាលបេះដូងក្រុងកំពត​ជា​ដើម៕ រូបថត៖ រដ្ឋបាលខេត្ត

ប្រភព៖ ក្រសួងព័ត៌មាន