រាជរដ្ឋាភិបាលសម្រេចដំឡើងប្រាក់ខែជូនមន្ត្រីរាជការនិងនិវត្តជនសម្រាប់ឆ្នាំ២០២៥

យោងតាមសេចក្តីព្រាងច្បាប់ស្តីពីហិរញ្ញវត្ថុ សម្រាប់ការគ្រប់គ្រងឆ្នាំ២០២៥ ដែលរៀបចំឡើងដោយក្រសួងសេដ្ឋកិច្ចនិងហិរញ្ញវត្ថុ កាលថ្ងៃទី៦ ខែវិច្ឆិកា ឆ្នាំ ២០២៤ហើយត្រូវបានរដ្ឋសភាអនុម័តយល់ព្រម បានអោយដឹងថា រាជរដ្ឋាភិបាលសម្រេចដំឡើងប្រាក់បំណាច់មុខងារ ចំនួន ៤ ម៉ឺនរៀល ជូនមន្ត្រីរាជការស៊ីវិល និងកងកម្លាំងប្រដាប់អាវុធគ្រប់ប្រភេទ។

ដូចនេះ ឆ្នាំ ២០២៥ ខាងមុខនេះ បៀវត្សអប្បបរមារបស់មន្ត្រីរាជការស៊ីវិល និង កងកម្លាំងប្រដាប់អាវុធ នឹងមានស្ថានភាពកើនឡើងដូចខាងក្រោម ៖

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

បៀវត្សមន្ត្រីរាជការស៊ីវិល នឹងត្រូវបានដំឡើងដល់ប្រមាណ ១ ៣៩៦ ៩៥០ រៀល

បៀវត្សគ្រូបង្រៀន និង គ្រូពេទ្យ នឹងត្រូវបានដំឡើងដល់ប្រមាណ ១ ៤៩៦ ៩៥០ រៀល

បៀវត្សនគរបាល (ពលបាលត្រី) នឹងត្រូវបានដំឡើងដល់ប្រមាណ ១ ៤៨៣ ៩២៧ រៀល (ដោយគិតបញ្ចូលទាំងរបបអង្ករ);

បៀវត្សយោធិន (ពលទោ) នឹងត្រូវបានដំឡើងដល់ប្រមាណ ១ ៣៤៦ ៥៥០ រៀល (ដោយមិនទាន់គិតបញ្ចូលរបបអង្ករ) ហើយបើគិតបញ្ចូលទាំងរបបអង្ករ ត្រូវជាប្រមាណ ១ ៤០៥ ០២៧ រៀល។

ប្រាក់ឧបត្ថម្ភប្រចាំខែសម្រាប់មន្ត្រីជាប់កិច្ចសន្យា នឹងត្រូវបានដំឡើងដល់ចំនួន ៧៩០ ០០០ រៀល ។

ទន្ទឹមនេះ សម្រាប់ឆ្នាំ ២០២៥ ខាងមុខនេះដែរ រាជរដ្ឋាភិបាល បានគ្រោងថវិកាចំនួន ១០០ ប៊ីលានរៀល សម្រាប់ការបន្តដំឡើងប្រាក់សោធន ជូននិវត្តជន និង ជនបាត់បង់សម្បទាវិជ្ជាជីវៈ ដែលជាដំឡើងប្រាក់បំណាច់មុខងារ ចំនួន ៤ ម៉ឺនរៀល ជូនមន្ត្រីរាជការស៊ីវិល និងកងកម្លាំងប្រដាប់អាវុធគ្រប់ប្រភេទអតីតមន្ត្រីរាជការស៊ីវិល និង អតីតយុទ្ធជន ផងដែរ៕ អត្ថបទ៖ MoINFO APP

ប្រភព៖ ក្រសួងព័ត៌មាន