កម្ពុជាជាប្រទេសទី៥នៅលើសកលលោក និងជាប្រទេសដំបូង​គេបង្អស់​នៅ​អាស៊ីដែលធ្វើជាប្រធាន និងជាម្ចាស់ផ្ទះកិច្ចប្រជុំ​កំពូលសៀមរាប-អង្គរស្តីពីពិភពលោកមួយដែលគ្មានមីន

ចាប់ពីថ្ងៃទី២៤-២៩ ខែវិច្ឆិកា ឆ្នាំ២០២៤ប្រទេសកម្ពុជានឹងធ្វើម្ចាស់​ផ្ទះនៃ​កិច្ចប្រជុំត្រួតពិនិត្យឡើងវិញលើក​ទី៥នៃអនុសញ្ញាស្តីពី​ការហាម​ការប្រើប្រាស់មីនប្រឆាំងមនុស្ស(អនុសញ្ញាអូតាវ៉ា)ឬកិច្ចប្រជុំកំពូលសៀមរាប-អង្គរស្តីពីពិភពលោកមួយ​ដែល​គ្មានមីន​នៅក្រុងសៀមរាប ខេត្តសៀមរាប ។អ្វីគួរកត់សម្គាល់និងជាមោទកភាពជាតិ កម្ពុជាគឺជា​ប្រទេសទី៥ នៅលើសកលលោក និងជា​ប្រទេសដំបូងគេបង្អស់​ក្នុង​តំបន់អាស៊ីដែលធ្វើជាប្រធាន និងជាម្ចាស់ផ្ទះដឹកនាំកិច្ចប្រជុំកំពូល​មួយនេះ។គណៈប្រតិភូមកពី ១៦៤​ប្រទេស និងស្ថាប័នអន្តរជាតិ​ដទៃទៀត នឹងអញ្ជើញចូលរួមក្នុងព្រឹត្តិការណ៍ដ៏ធំនេះ ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

អាជ្ញាធរមីន ក៏នឹងរៀបចំសន្និសីទសារព័ត៌មានស្ដីពី «វឌ្ឍនភាព​ឆ្ពោះទៅកិច្ចប្រជុំត្រួតពិនិត្យឡើងវិញលើកទី៥ ឬ កិច្ចប្រជុំ​កំពូល​សៀមរាប-អង្គរ ស្ដីពីពិភពលោកមួយដែលគ្មានមីន» នៅថ្ងៃពុធទី២០ ខែវិច្ឆិកា ខាងមុខនេះនាទីស្នាក់ការកណ្ដាល។តាមការ​បញ្ជាក់​របស់​ឯកឧត្តមបណ្ឌិត លី ធុជ ទេសរដ្ឋមន្រ្តី អនុប្រធានទី១ អាជ្ញាធរមីន បានឱ្យដឹងកាលពីពេលកន្លងទៅថា គិតត្រឹមថ្ងៃទី១១ ខែវិច្ឆិកា មានគណៈប្រតិភូមកពីជុំវិញពិភពលោកចំនួន ៥២៣ នាក់បានបញ្ជាក់​ពីការចូលរួមរបស់ខ្លួនក្នុងកិច្ចប្រជុំកំពូល និង​ព្រឹត្តិការណ៍ពិសេសៗ​ដែល​កម្ពុជាបានរៀបចំ។ ជាមួយគ្នានេះ ស្ថានទូត និងកុងស៊ុល​កិត្តិយស​ចំនួន ១៥ ព្រមទាំងដៃគូអភិវឌ្ឍន៍​ប្រចាំនៅកម្ពុជាជាច្រើន ក៏បានបញ្ជាក់ពីការចូលរួមផងដែរ។

ទាក់ទងនឹងសកម្មរបស់ព្រះរាជាណាចក្រកម្ពុជាលើវិស័យមីននេះផងដែរ ឯកឧត្តម លី ធុជ បានគូសបញ្ជាក់ថា ក្នុងរយៈពេល ១ឆ្នាំ​នេះ កម្ពុជាបានដើរតួនាទីយ៉ាងសំខាន់ជាមួយគ្រប់ភាគីពាក់ព័ន្ធ​នៃ​អនុសញ្ញាអូតាវ៉ា ព្រមទាំងបានដឹកនាំ និងចូលរួមក្នុងកិច្ចប្រជុំ​ប្រមាណ​៦០ លើក ។ជាលទ្ធផលសេចក្តីថ្លែងការណ៍នយោបាយ​សៀមរាប-អង្គរ នឹងត្រូវចុះហត្ថលេខាអនុម័តដោយសម្តេចមហាបវរ​ធិបតី ហ៊ុន ម៉ាណែត នាយករដ្ឋមន្រ្តីក្នុងកម្មវិធីបើកកិច្ចប្រជុំនាថ្ងៃទី២៥ ខែវិច្ឆិកា ឆ្នាំ២០២៤ ហើយសេចក្តីព្រាងផែនការសកម្មភាព​សៀមរាប-អង្គរ ២០២៥-២០២៩ នឹងត្រូវអនុម័តដាក់ឱ្យប្រើប្រាស់នាថ្ងៃទី២៩ ខែវិច្ឆិកា ឆ្នាំ២០២៥ ដែលផែនការសកម្មភាពនេះ នឹងក្លាយជាត្រីវិស័យតម្រង់​ទិសសម្រាប់​ការអនុវត្តវិស័យសកម្មភាពមីនដល់គ្រប់ភាគីពាក់ព័ន្ធ។

គួររំលឹកថា អង្គសន្និសីទរដ្ឋភាគីលើកទី២១នៃអនុសញ្ញាស្តីពីការហាម​ការប្រើប្រាស់មីនប្រឆាំងមនុស្ស(អនុសញ្ញាអូតាវ៉ា)នៅទីក្រុង​ហ្សឺណែវ ប្រទេសស្វីសកាលពីថ្ងៃទី២៤ ខែវិច្ឆិកា ឆ្នាំ២០២៣បានបោះឆ្នោត​ជ្រើស​តាំង​កម្ពុជាធ្វើជាប្រធាន និងជាម្ចាស់ផ្ទះរៀប​ចំ​កិច្ចប្រជុំត្រួតពិនិត្យ​ឡើងវិញលើកទី៥ ឆ្នាំ២០២៤ ដែលកម្ពុជាប្រសិទ្ធនាមជា “កិច្ចប្រជុំកំពូលសៀមរាប-អង្គរស្តីពីពិភពលោកមួយ​ដែលគ្មានមីន”។

កិច្ចប្រជុំត្រួតពិនិត្យឡើងវិញនៃអនុសញ្ញាអូតាវ៉ាត្រូវបានប្រព្រឹត្តទៅរៀងរាល់៥ឆ្នាំម្តង ។កម្ពុជាគឺជាប្រទេសទី៥ នៅលើសកលលោក និងជា​ប្រទេសដំបូងគេបង្អស់ក្នុងតំបន់អាស៊ីដែលធ្វើជាប្រធាន និងជាម្ចាស់​ផ្ទះដឹកនាំកិច្ចប្រជុំនេះ ។ កិច្ចប្រជុំលើកទី១ធ្វើនៅ​ប្រទេស​កេនយ៉ា ឆ្នាំ ២០០៤ ,លើកទី២នៅប្រទេសកូឡុំប៊ីឆ្នាំ២០០៩ ,លើកទី៣នៅ​ប្រទេសម៉ូសំប៊ិកឆ្នាំ២០១៤ ,លើកទី៤នៅ​ប្រទេស​ន័រវែស ឆ្នាំ២០១៩ និងលើកទី៥នៅប្រទេសកម្ពុជាឆ្នាំ២០២៤ នេះ។

សម្រាប់កិច្ចប្រជុំនេះដែរ កម្ពុជាក្នុងនាមជាម្ចាស់ផ្ទះគ្រោងនឹងដាក់​ចេញនូវការងារអាទិភាពចំនួន ៣ រួម មាន ៖១. ជំរុញសកល​ភាវូបនីយកម្មនៃអនុសញ្ញា៖ ជំរុញប្រទេសមិនមែនរដ្ឋភាគីឱ្យចូលរួម​ជារដ្ឋភាគី ឬចូលរួមកិច្ចប្រជុំ ឬអនុវត្តទិដ្ឋភាពនានានៃ​អនុសញ្ញា​។២.ពង្រឹងការអនុវត្តមាត្រា៥នៃអនុសញ្ញា៖បោសសម្អាតមីន​ប្រឆាំង​មនុស្ស និង ៣. ជួយជនរងគ្រោះដោយសារមីន និងសំណល់​ជាតិផ្ទុះ​ពីសង្រ្គាម។កម្ពុជានឹងរៀបចំឱ្យមានជាសេចក្តីថ្លែងការណ៍ស្តីពីផែនការ​សកម្មភាព៥ឆ្នាំបន្ត សម្រាប់រដ្ឋសមាជិក និងភាគី​ពាក់ព័ន្ធ​ទាំងអស់​យកទៅអនុវត្តដោយមានឈ្មោះថា “សេចក្តីថ្លែងការណ៍សៀមរាប -អង្គរ_ Siem Reap – Angkor Declaration or Siem Reap – Angkor Action Plan" ដែលនឹងត្រូវប្រើប្រាស់ក្នុងឯកសារ​ប្រវត្តិសាស្ត្រ​របស់អង្គការសហប្រជាតិ ។

កម្ពុជាត្រូវបានប្រទេសជាសមាជិកអនុសញ្ញាអូតាវ៉ាផ្តល់កិត្តិយសថាជាប្រទេសគំរូក្នុងការបោសសំអាតគ្រាប់មិនទាន់ផ្ទុះ។បច្ចុប្បន្ន​កម្ពុជាក៏បាន​ក្លាយទៅជាប្រទេសដែលចែករំលែកបទពិសោធន៍ក្នុងការបោសសំអាតគ្រាប់មីន យុទ្ធភណ្ឌមិនទាន់ផ្ទុះដល់ប្រទេស​នានាលើពិភពលោក​និងចូលរួមដោះមីន យុទ្ធភណ្ឌមិនទាន់ផ្ទុះក្រោមឆ័ត្រអង្គការសហប្រជា​ជាតិផងដែរ។

កិច្ចប្រជុំកំពូលសៀមរាប-អង្គរ គឺជាការប្រមូលផ្តុំនូវក្តីសង្ឃឹម ការ​ប្តេជ្ញាចិត្តរួម និងកិច្ចខិតខំប្រឹងប្រែងរួម ដើម្បីជំរុញឱ្យពិភពលោក​មួយដែលគ្មានមីន និងគ្មានជនណាម្នាក់បន្តរងគ្រោះដោយសារមីន​ប្រឆាំងមនុស្ស៕

ប្រភព៖ ក្រសួងព័ត៌មាន