កម្ពុជា និងឥណ្ឌា ចំណាយពេល៦ខែដើម្បីជួសជុលលើកតម្លៃកំពែងជ្រុងខាងលិចផ្នែកខាងជើងនៃប្រាសាទតាព្រហ្មឡើងវិញ

កំពែងថ្មបាយក្រៀម ជ្រុងខាងលិច ផ្នែកខាងជើងនៃប្រាសាទតាព្រហ្មត្រូវ​បាន​ជួសជុលដោយអាជ្ញាធរជាតិ​អប្សរា តាមរយៈ​កិច្ចសហការជាមួយស្ថាប័ន​ស្រាវជ្រាវ​បុរាណវិទ្យាឥណ្ឌា(ASI) ។

អាជ្ញាធរជាតិអប្សរាបានឱ្យដឹងនៅថ្ងៃទី២៦ ខែកុម្ភៈ ឆ្នាំ២០២៥ ការជួស​ជុលនេះ គឺដើម្បីលើកតម្លៃសំណង់បុរាណមួយនេះ បន្ទាប់ពីបានរងការ​ខូចខាតទ្រុឌទ្រោម ដោយមូលហេតុជាច្រើន។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

អ្នកជំនាញឥណ្ឌា លោក Chitranjan Kumar ប្រធានគ្រប់គ្រងការដ្ឋាន​ជួសជុលនៅប្រាសាទតាព្រហ្ម ត្រូវបានស្រង់សម្ដីមក​បញ្ជាក់​ថា ក្នុង​គម្រោងដំណាក់កាលទី៣ ស្ថាប័នស្រាវជ្រាវបុរាណវិទ្យាឥណ្ឌា(ASI) ក៏បានធ្វើការជួសជុលពង្រឹងឡើងវិញ​កំពែងថ្មបាយក្រៀម ជ្រុងខាងលិច ផ្នែកខាងជើង នៃប្រាសាទតាព្រហ្ម មានប្រវែងសរុបចំនួន៣០ម៉ែត្រ។ លោកបន្តថា រចនាសម្ព័ន្ធនៃកំពែងថ្មបាយក្រៀមបានខូចខាតយ៉ាងច្រើន ជាពិសេសដើមឈើរលំសង្កត់ពីលើ និងកត្តាអាយុកាលនៃ​សំណង់ ធ្វើឱ្យគុណភាពនៃគ្រឹះខាងក្រោមបានថមថយ។ ចំណែកថ្មបាយក្រៀម ក៏បានបែកបាក់មួយចំនួន។ ហេតុដូច្នេះ ក្រុមការងារនៅទីនេះ បានធ្វើកំណាយស្រាវជ្រាវបុរាណវិទ្យា ដើម្បីសិក្សាពីស្ថានភាពគ្រឹះនៃកំពែង ទើបចាប់ផ្តើមធ្វើសម្រង់​ប្លង់ បង់លេខនិងចុះបញ្ជីថ្មបាយក្រៀម ។ រួចបន្តការងារជួសជុលពង្រឹងគ្រឹះខាងក្រោមដែលពុកផុយ រៀបចំជួស​ជុលថ្មដែល​ខូចខាតឬបែបបាក់ ទើបរៀបចំផ្គុំថ្មសាកល្បង មុនរៀបចំទៅ​កាន់ទីតាំងដើមវិញ ដោយអនុវត្តតាមលំនាំពីបុរាណ។

អ្នកជំនាញរូបនេះបន្តថា ដោយសារស្ថានភាពរបស់ថ្មបាយក្រៀមខ្លះ មាន​សភាព​ពុកផុយនិងខូចខាតច្រើន ប៉ុន្តែអ្នក​ជំនាញនឹងព្យាយាមជួសជុលនិង​ប្រើប្រាស់ថ្មចាស់ឱ្យអស់ពីលទ្ធភាពមុននិងសម្រេចជំនួសដោយថ្មថ្មី។ ការងារនេះ គ្រោង​ចំណាយពេលចំនួន៦ខែ ទើបរួចរាល់ ដោយបានចាប់​ផ្តើមពីខែមករា ឆ្នាំ២០២៥មក។

អ្នកជំនាញបញ្ជាក់ទៀតថា ចំពោះដំណើរការជួសជុលកំពែង នៃប្រាសាទ​តាព្រហ្ម ក្រុមការងារបានសហការ​យ៉ាងជិត​ស្និទជាមួយអ្នកជំនាញ​អាជ្ញាធរ​ជាតិអប្សរា ដោយអនុវត្តទៅតាមដំណាក់កាលៗ និងតាមអនុសាសន៍​អ្នកជំនាញការ​អាយស៊ីស៊ី-អង្គរ ធ្វើយ៉ាងណាឱ្យរចនាសម្ពន្ធនៃកំពែងទាំងមូល មានលំនឹង អាចទ្រទម្ងន់យ៉ាងរឹងមាំ បន្តអាយុកាលទៅ​ពេលខាងមុខ។

សូមជម្រាបថា ប្រាសាទតាព្រហ្មកសាងឡើងក្នុងឆ្នាំ១១៨៦ ដោយព្រះបាទ ជ័យវរ្ម័នទី៧ គោរពដល់ព្រះពុទ្ធសាសនា​មហាយាន ហើយបើតាមសិលាចារឹក​នៃប្រាសាទនេះ គឺដើម្បីឧទ្ទិសដល់គុណព្រះមាតារបស់ព្រះអង្គ ក្រោមរូបភាព​ប្រាជ្ញាបារមីតា៕

ប្រភព៖ ក្រសួងព័ត៌មាន