រូបភាពថ្មី Song Joong Ki បង្ហាញភាពស្រស់សង្ហា ត្រូវគេចាប់អារម្មណ៍ លើរឿងនេះ

កម្សាន្ត៖ កាលពីពេលថ្មីៗនេះ តារាសម្តែងប្រុស លោក Song Joong Ki បានទទួលការអត្ថាធិប្បាយចម្រុះពីអ្នកនិយមលេងអ៊ីនធឺណិត ក្នុងពេល បានចូលរួមក្នុងកម្មវិធីមួយ នៅ​ទីក្រុង Shanghai។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

កាល​ពី​ថ្ងៃ​ទី ២ ខែ​មេសា តារាសម្ដែងប្រុស លោក Song Joong Ki បាន​នៅ​ទីក្រុង Shanghai ដើម្បី​ចូលរួម​កម្មវិធី​បង្ហាញ​ម៉ូដ ដែលការបង្ហាញ​ខ្លួនលើកនេះ តារាសម្ដែងប្រុសរូបនេះ បានបង្ហាញភាពស្រស់សង្ហា ​ក្នុងឈុត​អាវ​ក្រឡាពណ៌​ស​ខៀវ ជាមួយ​ខោ​ពណ៌​ស។ តារាប្រុសរូបនេះ បាន​ក្លាយ​ជា​ចំណុច​កណ្តាល​នៃ​ការ​ចាប់​អារម្មណ៍​ក្នុងកម្មវិធី ព្រោះ រូបរាងសង្ហា ក្មេងជាងវ័យ ដែលនឹកស្មានមិនដល់ថា ពេលនេះ រូបលោកមានវ័យ ៤០ ឆ្នាំនោះទេ។

អ្វីដែលគួរឲ្យចាប់អារម្មណ៍ នៅក្នុងកម្មវិធីនេះដែរ Song Joong Ki ត្រូវបានប្រធាននៃម៉ាក Ralph Lauren អញ្ជើញដោយផ្ទាល់ឱ្យចូលរួមក្នុងព្រឹត្តិការណ៍មួយ នៅថ្ងៃទី ៣ ខែមេសា ប៉ុន្តែរូបលោកបានបដិសេធ ដោយលើកឡើងថា «អរគុណសម្រាប់ការអញ្ជើញ។ ប៉ុន្តែខ្ញុំត្រូវត្រឡប់ទៅវិញនៅថ្ងៃស្អែក។ ខ្ញុំមានកូនតូចពីរនាក់។ ប្រពន្ធខ្ញុំមើលថែកូននៅផ្ទះតែម្នាក់ឯង» ។

យ៉ាងណាមិញ សេចក្តីថ្លែងការណ៍ខាងលើរបស់ Song Joong Ki ទទួលបានប្រតិកម្មចម្រុះពីអ្នកនិយមលេងអ៊ីនធឺណិត។ អ្នកខ្លះគិតថា តារាប្រុសរូបនេះ កំពុង​ចង់​បង្ហាញ​ខ្លួនឯង ​ដោយ​មិន​ភ្លេច​ទាញយក​ភរិយា និង​កូន​ពីរ​នាក់​ចេញ​ ដើម្បី​ផ្សព្វផ្សាយ​ឈ្មោះ​របស់ខ្លួន។

ដោយឡែក អ្នកផ្សេងទៀត ក៏បាននិយាយការពារ Song Joong Ki ដោយបាន​បញ្ចេញ​មតិ​ថា តារាប្រុសរូបនេះ ​ជា​ស្វាមីនិង​ជាឪពុក​ដែល​យក​ចិត្ត​ទុក​ដាក់​យ៉ាង​ខ្លាំង​ចំពោះ​គ្រួសារ។ នៅពេលដែលកាលវិភាគរបស់លោកបានបញ្ចប់ Song Joong Ki ផ្តល់អាទិភាពដល់ការត្រលប់ទៅរកប្រពន្ធ និងកូនរបស់ខ្លួនវិញ ផងដែរ៕

ប្រភព៖ Ngoisao.vn

សូមទស្សនារូបភាពខាងក្រោម៖ 

• រូបភាព
• តារាកូរ៉េ