អ្នកជំនាញលើកទឹកចិត្តឱ្យកម្ពុជា បង្ហាញពីការគាំទ្រទៅលើអាជីវកម្មអាមេរិក នៅកម្ពុជាដូចជាក្រុមហ៊ុន Starlink

អ្នកជំនាញបានលើកទឹកចិត្តឱ្យកម្ពុជាបង្ហាញពីការគាំទ្រទៅលើអាជីវកម្មអាមេរិកនៅកម្ពុជា និងប្ដេជ្ញាបន្តកិច្ចសហប្រតិបត្តិការយោធា និងសហប្រតិបត្តិការផ្សេងៗទៀតជាមួយអាមេរិក ដើម្បីឱ្យអាមេរិកយោគយល់ទៅដល់ប្រទេសអភិវឌ្ឍន៍តិចតួចដូចជាកម្ពុជា។

នៅថ្ងៃទី០៤ ខែមេសា ឆ្នាំ២០២៥ លោកបណ្ឌិត ជ័យ តិច អ្នកស្រាវជ្រាវការអភិវឌ្ឍសង្គម និងសេដ្ឋកិច្ច បានឱ្យដឹងថា ភាពជោគជ័យនៃកិច្ចការចរចានេះ នឹងអាចកើតមានអាស្រ័យទៅលើទឡ្ហីករណ៍ ភាពវៃឆ្លាតរបស់មន្ត្រីកម្ពុជា ការប្ដេជ្ញាចិត្ត និងការបំពេញចិត្តរបស់រដ្ឋាបាលលោកដូណាល់ត្រាំ។ បន្ថែមពីនេះ ភាពជោគជ័យនេះ នឹងបង្ហាញពីសមត្ថភាពរបស់មន្ត្រីរដ្ឋាភិបាលដែលពាក់ព័ន្ធ ជាពិសេសក្រោយការដឹកនាំរបស់សម្ដេចនាយករដ្ឋមន្ត្រី។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ជាមួយគ្នានេះ លោកបានសង្កត់ធ្ងន់ថា កម្ពុជាត្រូវតែមានការលះបង់ដែលអាចមានផលប៉ះពាល់ដល់ការរកស៊ីរបស់សេដ្ឋីមួយចំនួនលើវិស័យទូរគមនាគមន៍ ដោយអនុញ្ញាតឲ្យក្រុមហ៊ុន Starlink របស់លោក Elon Musk បើកដំណើរការនៅកម្ពុជា។

លោកបាននិយាយថា យើងបានចាំទាំងអស់គ្នាហើយ ប្រធានផ្នែកទីផ្សាររបស់ក្រុមហ៊ុន Starlink បានមកទស្សនាកិច្ចនៅកម្ពុជា និងបានជួបជាមួយសម្ដេចនាយករដ្ឋមន្ត្រី ហើយនៅក្នុងនោះ ខ្ញុំជឿជាក់ថា កម្ពុជាត្រូវតែផ្ដល់អាជ្ញាប័ណ្ណដល់ Starlink បើកដំណើរការនៅកម្ពុជា ដូចដែរប្រទេសវៀតណាមគេបានធ្វើតាំងពីប្រមាណជាងមួយអាទិត្យមុន។ គេដឹងស្ថានការ គេធ្វើការលឿន ហើយក្រុមការងាររបស់គេត្រៀមរួចទៅលើការងារនេះ។

បន្ថែមពីនេះ លោកបានបន្តថា ប្រសិនបើកម្ពុជាទម្លាក់តម្លៃពន្ធលើទំនិញអាមេរិកមកដល់សូន្យឬមកដល់ ១០ភាគរយ បង្ហាញពីការគាំទ្រទៅលើអាជីវកម្មអាមេរិកនៅកម្ពុជា និងធ្វើការប្ដេជ្ញារចិត្តមួយចំនួនទៀតពាក់ព័ន្ធនឹងសហប្រតិបត្តិការយោធា និងសហប្រតិបត្តិការផ្សេងៗទៀតជាមួយសហរដ្ឋអាមេរិក នោះនឹងអាចធ្វើឲ្យសហរដ្ឋអាមេរិកយោគយល់ទៅដល់ប្រទេសដែលការអភិវឌ្ឍន៍តិចតួចដូចជាកម្ពុជាជាដើម។

នៅថ្ងៃទី០២ ខែមេសា ឆ្នាំ២០២៥ អាមេរិកបានសម្រេចកំណត់ពន្ធគយលើទំនិញនាំចូលពីកម្ពុជាប្រមាណ៤៩ភាគរយ ដែលជាចំនួនច្រើនជាងគេក្នុងចំណោមបណ្តាប្រទេសផ្សេងទៀត ជាពិសេសប្រទេសនៅក្នុងតំបន់អាស៊ីអាគ្នេយ៍។ បើតាមលោក ដូណាល់ ត្រាំ ការដំឡើងពន្ធនេះ នឹងចូលជាធរមាននៅថ្ងៃទី០៩ ខែមេសា ឆ្នាំ២០២៥ ខាងមុខនេះ។

តាមរយៈកិច្ចសម្ភាសន៍ពិសេសជាមួយទូរទស្សន៍ជាតិកម្ពុជាស្ដីពី “ការដំឡើងពន្ធគយរបស់សហរដ្ឋអាមេរិកលើទំនិញនាំចូលពីកម្ពុជា” កាលពីថ្ងៃទី០៣ ខែមេសា ឆ្នាំ២០២៥ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្មកម្ពុជា បានលើកឡើងថា សម្ដេចនាយករដ្ឋមន្ត្រី ហ៊ុន ម៉ាណែត បានដាក់ចេញនូវវិធានការជាបន្ទាន់ដោយអនុញ្ញាតឲ្យលោក អូន ព័ន្ធមុនីរ័ត្ន ដែលជាប្រធានគោលនយោបាយ និងសេដ្ឋកិច្ច ដឹកនាំកោះប្រជុំជាមួយក្រសួងពាណិជ្ជកម្ម និងក្រសួងពាក់ព័ន្ធ វិស័យឯកជន ដើម្បីប្រមូលធាតុចូលដាក់ជូនសម្ដេច ដើម្បីឆ្លើយតប និងការជំរុញវិស័យពាណិជ្ជកម្មកម្ពុជា។

លោកជំទាវ បន្តថា“គោលដៅធំរបស់យើង គឺដើម្បីជំរុញពាណិជ្ជកម្មរបស់យើង មិនថាតែជាមួយភាគីអាមេរិក ឬក៏ជាមួយដៃគូពាណិជ្ជកម្មផ្សេងៗទេ។ ទិសដៅរបស់យើង គឺបន្តការធ្វើពិពិធកម្ម និងសហការជាមួយគ្នានៅក្នុងមូលដ្ឋាននៃពាណិជ្ជកម្មអន្តរជាតិ ដែលមានច្បាប់ទម្លាប់ និងភាពច្បាស់លាស់”។

លោកជំទាវ ចម និម្មល បានគូសបញ្ជាក់ថា ការតំឡើងអត្រាពន្ធទៅលើទំនិញនាំចេញនេះ គឺនឹងឡើងថ្លៃទំនិញនៅលើប្រទេសគោលដៅ ដែលមានន័យថា ប្រជាជនៅសហរដ្ឋអាមេរិក ដែលលោកជាអ្នកបញ្ជាទិញផលិតផលពីកម្ពុជានោះ គឺលោកជាអ្នករងផលប៉ះពាល់ដំបូងនៅទីនោះ ហើយផលប៉ះពាល់បន្ទាប់ពិតណាស់នៅលើកម្ពុជា និងអ្នកវិនិយោគលើវិស័យសំខាន់ៗ ដូចជា វាយណភណ្ឌ និងសំលៀកបំពាក់ជាដើម។

គួរបញ្ជាក់ដែរថា នៅក្នុងឆ្នាំ២០២៤ កម្ពុជាបាននាំចេញទំនិញទៅអាមេរិកមានតម្លៃ ៩,៩ពាន់លានដុល្លារ កើនឡើង ១១,៤ភាគរយ ហើយការនាំចូលប្រមាណ ២៦៤លានដុល្លារ កើនឡើង ២,៧ភាគរយ ដែលធ្វើឱ្យពាណិជ្ជកម្មទ្វេភាគីសរុបរវាងកម្ពុជា និងអាមេរិកមានចំនួន ១០,១ពាន់លានដុល្លារ៕ ផ្សាយ៖ កន ចំណាន ដោយ៖ ស្រីពេជ្រ AKP

ប្រភព៖ ក្រសួងព័ត៌មាន