អបអរសាទរ! ហង្សក្រហម Liverpool ក្លាយជាម្ចាស់ជើងឯក Premier League រដូវកាល ២០២៤/២០២៥

កីឡា៖ ក្រុមហង្សក្រហម Liverpool បានក្លាយជាម្ចាស់ជើងឯក Premier League រដូវកាល ២០២៤/២០២៥ បន្ទាប់ពីបានយកឈ្នះក្រុម មាន់ខ្នាយមាស Tottenham Hotspur ក្នុងលទ្ធផល ៥ ទល់នឹង១ ក្នុងការប្រកួត Premier League កាលពីយប់ថ្ងៃទី២៧ខែមេសាកន្លងទៅនេះ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ក្នុងនោះដែរ អ្នកគាំទ្រហង្សក្រហមទាំងនៅអង់គ្លេស និងមកពីជុំវិញពិភពលោក បានអបអរសាទរក៏ដូចជាប្រារព្ធពិធីអបអរក្លិបយ៉ាងច្រើនកុះករ ដែលនេះជាពានរង្វាន់ Premier League លើកទី២០ហើយដែល Liverpool ក្រសោបបាន ធ្វើឲ្យក្លិបនេះក្លាយជាក្លិបបានឈ្នះពានរង្វាន់ Premier League ស្មើនឹងគូប្រជែង Manchester United ខណៈដែលនៅរដូវកាលនេះ Liverpool នៅសល់៤ប្រកួតទៀតក្នុងដៃ។

លោក Arne Slot ជាអ្នកចាត់ការក្រុមហង្សក្រហម បានថ្លែងសាទរនិងអបអរជាមួយអ្នកគាំទ្រ Liverpool ក្នុងកីឡដ្ឋាន Anfield ខណៈដែលកីឡាករ Liverpool ទាំងអស់ក៏បានច្រៀងសាទរផងដែរ។

តាំងពីចូលដឹកនាំ Liverpool បន្តពីលោក Jurgen Klopp មក លោក Slot បានដឹកនាំក្រុមឲ្យឈ្នះ ២៥ប្រកួត ស្មើ៧ប្រកួត និងចាញ់តែ២ប្រកួតប៉ុណ្ណោះ។

យ៉ាងណាមិញ Liverpool នឹងលើកពាន Premier League ជាផ្លូវការនាថ្ងៃទី២៥ខែឧសភាខាងមុខ ដែលជាថ្ងៃចុងក្រោយនៃការប្រកួត Premier League បន្ទាប់ពីត្រូវប៉ះនឹង Crystal Palace ៕

ប្រភព៖: liverpoolfc