សំបុត្រ ៣០០០ សន្លឹក នៃការប្រកួតវគ្គផ្ដាច់ព្រ័ត្រ AFC Challenge League លក់អស់ត្រឹម ១០ នាទី!

ភ្នំពេញ៖ គួរឱ្យភ្ញាក់ផ្អើល សំបុត្រចំនួន ៣០០០ សន្លឹកសម្រាប់ការប្រកួតវគ្គផ្ដាច់ព្រ័ត្រ AFC Challenge League រវាងក្រុមបាល់ទាត់ព្រះខ័នរាជស្វាយរៀង របស់កម្ពុជា និងក្រុមភ្ញៀវ អេហ្វខេ អារកាដាហ្ក មកពីប្រទេសបង់ក្លាដែស ត្រូវបានលក់អស់យ៉ាងឆាប់រហ័សត្រឹមតែរយៈពេល ១០ នាទីប៉ុណ្ណោះ នៃការបើកលក់តាមអនឡាញ។

ការប្រកួតដ៏សំខាន់នេះ នឹងធ្វើឡើងនៅថ្ងៃទី ១០ ខែឧសភា ឆ្នាំ ២០២៥ វេលាម៉ោង ៧:០០ យប់ នៅពហុកីឡដ្ឋានជាតិមរតកតេជោ ក្នុងរាជធានីភ្នំពេញ ព្រះរាជាណាចក្រកម្ពុជា។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

សំបុត្រទស្សនាការប្រកួត បានចាប់ផ្ដើមដាក់លក់ជាផ្លូវការចាប់ពីថ្ងៃទី ០១ ខែឧសភា ឆ្នាំ ២០២៥ នេះតទៅ តាមរយៈកម្មវិធីទូរស័ព្ទដៃ PKR Svay Rieng FC ដែលមានភាពងាយស្រួលក្នុងការទិញ និងរហ័ស ដោយគ្រាន់តែស្កេនចូលទស្សនា ដោយពុំចាំបាច់ប្ដូរយកសំបុត្របោះពុម្ពឡើយ។

សម្រាប់អ្នកគាំទ្រដែលមិនទាន់មានកម្មវិធីនេះ អាចទាញយកបានតាមរយៈតំណភ្ជាប់ខាងក្រោម៖

* Android:https://play.google.com/store/apps/details?id=asia.wonderpass.pkrsrfc* iOS :https://apps.apple.com/us/app/pkr-svay-rieng-fc/id6505087491

ក្រៅពីការទិញតាមអនឡាញ អ្នកគាំទ្រក៏អាចរកទិញសំបុត្រដោយផ្ទាល់បាននៅរោងភាពយន្តលេជេន សាខាអេដេនហ្គាដិន ចាប់ពីថ្ងៃទី ៧ ខែឧសភា ឆ្នាំ ២០២៥ វេលាម៉ោង ៩:០០ ព្រឹក ដល់ម៉ោង ៥:០០ ល្ងាច (ទីតាំង https://maps.app.goo.gl/2vw766HSqYzzRTys8)។

ទន្ទឹមនឹងនេះ ទូរទស្សន៍ BTV News នឹងធ្វើការផ្សាយផ្ទាល់ការប្រកួតដ៏កក្រើកនេះជូនប្រិយមិត្តអ្នកស្នេហាវិស័យកីឡាបាល់ទាត់ទូទាំងប្រទេសផងដែរ។

ការលក់សំបុត្រអស់យ៉ាងឆាប់រហ័សនេះ បានបង្ហាញឱ្យឃើញពីការគាំទ្រយ៉ាងខ្លាំងក្លាពីសំណាក់អ្នកគាំទ្រចំពោះក្រុមបាល់ទាត់ព្រះខ័នរាជស្វាយរៀង ក៏ដូចជាការទន្ទឹងរង់ចាំចង់ទស្សនាការប្រកួតដ៏សំខាន់ក្នុងព្រឹត្តិការណ៍ AFC Challenge League នេះផងដែរ។

ប្រភព៖ ក្រសួងព័ត៌មាន