អង្គការសុខភាពពិភពលោក កំពុងជួយយ៉ាងសកម្មផ្នែកសម្ភារៈនិងថ្នាំសង្កូវដល់ជនភៀសសឹក

ក្នុងឱកាសចុះពិនិត្យមើលស្ថានភាពរបស់ពលរដ្ឋភៀសសឹក នៅជំរំភៀសសឹក ស្ថិតនៅវត្តថ្មកំបោរ ភូមិពោធិ៍ចាស់ ស្រុកបន្ទាយអំពិល ខេត្តឧត្តរមានជ័យ កាលពីថ្ងៃទី០៦ ខែសីហា ឆ្នាំ២០២៥ លោក Pascal Ringwald អ្នកសម្របសម្រួលកម្មវិធីជំងឺគ្រុនចាញ់សកល នៃអង្គការសុខភាពពិភពលោក (WHO) បាននិយាយថា លោកកំពុងធ្វើការយ៉ាងសកម្មជាមួយក្រសួងសុខាភិបាលកម្ពុជា ក្នុងការផ្តល់នូវសម្ភារៈនិងថ្នាំសង្កូវមួយចំនួន សម្រាប់ចែកបន្តដល់ពលរដ្ឋភៀសសឹក ដែលកំពុងបន្តស្នាក់នៅក្នុងជំរំ។ ជាមួយគ្នានេះ អ្នកសម្របសម្រួលកម្មវិធីជំងឺគ្រុនចាញ់សកល នៃអង្គការសុខភាពពិភពលោក (WHO) ក៏បានស្វាគមន៍ចំពោះការអនុវត្តបទឈប់បាញ់គ្នារវាងកម្ពុជា និងថៃជារៀងរហូតផងដែរ។

សូមរម្លឹកជូនថា កាលពីថ្ងៃទី០៦ ខែសីហា ឆ្នាំ២០២៥ គណៈប្រតិភូជាន់ខ្ពស់តំណាងឱ្យស្ថានទូតចំនួន១១ប្រទេស និងទីភ្នាក់ងារអង្គការសហប្រជាជាតិ(UN)ចំនួន១៥ស្ថាប័ន និងអង្គការពាក់ព័ន្ធ បានចុះពិនិត្យជំរំជនភៀសសឹក នៅខេត្តឧត្តរមានជ័យ និងខេត្តសៀមរាប។ ទន្ទឹមនេះ លោក Pascal Ringwald អ្នកសម្របសម្រួលកម្មវិធីជំងឺគ្រុនចាញ់សកល នៃអង្គការសុខភាពពិភពលោក (WHO) បានទៅពិនិត្យផ្ទាល់ដល់ទីតាំង ដើម្បីដឹងពីស្ថានភាពរបស់ប្រជាពលរដ្ឋនៅក្នុងជំរំ ភៀសសឹក ដែលក្នុងនោះជំរំជនភៀសសឹកក្នុងខេត្តសៀមរាបចំនួន៤ទីតាំង, ជំរំជនភៀសសឹកនៅខេត្តព្រះវិហារចំនួន១ទីតាំង, ជំរំជនភៀសសឹកនៅខេត្តឧត្តរមានជ័យចំនួន១ទីតាំង៕ 

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ប្រភព៖ ក្រសួងព័ត៌មាន