ឯកឧត្តម ប៉ែន បូណា រដ្ឋមន្រ្ដីប្រតិភូអមនាយករដ្ឋមន្រ្ដី និងជាប្រធានអង្គភាពអ្នកនាំពាក្យរាជរដ្ឋាភិបាលកម្ពុជា បានបញ្ជាក់សាជាថ្មីជូនប្រជាពលរដ្ឋខ្មែរ និងសហគមន៍អន្តរជាតិ ឱ្យបានជ្រាបថា ជំហរបស់កម្ពុជាគឺការដោះស្រាយបញ្ហាព្រំដែនត្រូវធ្វើឡើងតាមយន្តការបច្ចេកទេស ហើយនិងយន្តការច្បាប់អន្តរជាតិ មិនមែនដោះស្រាយតាមមធ្យោបាយប្រើកម្លាំងយោធានោះទេ។
ជាមួយនឹងការបញ្ជាក់ជំហរបែបនេះ ក្នុងឱកាសនៃការធ្វើសេចក្តីសង្ខេបព័ត៌មានប្រចាំថ្ងៃ ស្តីពីលទ្ធផលនៃការអនុវត្តបទឈប់បាញ់រវាងកម្ពុជា-ថៃ នាវេលាម៉ោង១១ព្រឹកថ្ងៃទី១១ ខែសីហា ឆ្នាំ២០២៥ នៅទីស្តីការគណៈរដ្ឋមន្ត្រី ឯកឧត្តមប្រធានអង្គភាពអ្នកនាំពាក្យរាជរដ្ឋាភិបាលកម្ពុជា បានរំលេចនូវចំណុចសំខាន់ៗមួយចំនួនដែលចាត់ទុកថាជាខែលការពារបូរណភាពទឹកដីរបស់កម្ពុជាដែលមានជាអាទិ៍។
ទី១. គឺមានការដឹកនាំនិងបញ្ជារបស់ថ្នាក់ដឹកនាំដែលមានសម្ដេចតេជោ ហ៊ុន សែន ប្រធានព្រឹទ្ធសភា ប្រធានឧត្តមក្រុមប្រឹក្សាផ្ទាល់ព្រះមហាក្សត្រ ឧត្តមសេនីយ៍ផុតលេខផ្កាយមាស៥ ដែលត្រូវបានព្រះមហាក្សត្រព្រះរាជទាននូវសិទ្ធិពេញលេញក្នុងការទំនាក់ទំនងជាមួយនឹងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៅក្នុងកិច្ចការយោធា ហើយសម្ដេចទាំងពីរគឺជាថ្នាក់ដឹកនាំដ៏កក់ក្ដៅបំផុតរបស់ប្រជាពលរដ្ឋខ្មែរ។
ទី២ គឺយើងមានវីរកងទ័ព និងវីរកងកម្លាំងប្រដាប់អាវុធដ៏អង់អាចក្លាហានរបស់យើងដែលតស៊ូយ៉ាងស្វិតស្វាយ ក្រាញននៀលមិនរាថយ ហ៊ានលះបង់គ្រប់បែបយ៉ាងដើម្បីបុព្វហេតុការពារជាតិមាតុភូមិ និងការពារអធិបតេយ្យភាពជាតិ បូរណភាពទឹកដីឱ្យខាងតែបាន។ វីរភាពដ៏អង់អាចក្លាហាននេះ បានទទួលការគោរពកោតសរសើរស្ញប់ស្ញែងយ៉ាងខ្លាំងពីសំណាក់ប្រជាពលរដ្ឋយើងគ្រប់មជ្ឈដ្ឋានក៏ដូចជា ពីសំណាក់មជ្ឈដ្ឋានខាងក្រៅជាច្រើនផ្សេងទៀត។
ទី៣. យើងមានកម្លាំងមហាសាមគ្គី និងឯកភាពជាតិដ៏រឹងមាំក្នុងចំណោមប្រជាពលរដ្ឋខ្មែរយើង ដោយមិនប្រកាន់និន្នាការ នយោបាយ សាសនា មិនថាទាំងនៅក្នុងស្រុក និងក្រៅស្រុក មិនថាជាក្មេងចាស់ ប្រុសស្រី បានវេញគ្នាជាធ្លុងមួយលើកស្ទួយមោទនភាពជាតិខ្មែរ ស្រែកទាមទារសន្តិភាពនិងចូលរួមការពារបូរណភាពទឹកដីយ៉ាងស្រាក់សស្រាំនៅពីក្រោយរាជរដ្ឋាភិបាល កងកម្លាំងប្រដាប់អាវុធជួរមុខរបស់យើង។
និងទី៤. មានការចូលរួមពីសហគមន៍អន្តរជាតិ មានដូចជា ក្រុមអ្នកសង្កេតការណ៍អន្តរកាល បេសកកម្មការទូត អនុព័ន្ធយោធាបរទេស ហើយជាពិសេស សហរដ្ឋអាមេរិក ចិន ម៉ាឡេស៊ី ដែលបានដើរតួនាទីគន្លឹះ នៅក្នុងការសម្រេចបានបទឈប់បាញ់ដែលចូលជាធរមានកាលពីពាក់កណ្ដាលអធ្រាត្រថ្ងៃទី២៨ ខែកក្កដា ឆ្នាំ២០២៥។ ពួកគេគឺជាសាក្សីយ៉ាងសំខាន់នៅក្នុងការអនុវត្តបទឈប់បាញ់ និងអាចវាយតម្លៃយ៉ាងច្បាស់ថា តើភាគីណាជាអ្នកបំពាន កិច្ចព្រមព្រៀងឈប់បាញ់និងរំលោភបទឈប់បាញ់៕
ប្រភព៖ ក្រសួងព័ត៌មាន
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
