អ្នកនាំពាក្យក្រសួងការពារជាតិគូសបញ្ជាក់សាជាថ្មីថា កម្ពុជាមិនប្រើប្រាស់ និងមិនដាក់គ្រាប់មីនថ្មីឡើយ ព្រមទាំងបានប្រកាន់ខ្ជាប់នូវការគោរពចំពោះអនុសញ្ញាអូតាវ៉ា

លោកជំទាវ ឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិ បានថ្លែងថា ក្រសួងការពារជាតិ នៃព្រះរាជាណាចក្រកម្ពុជាសូមសម្តែងនូវការសោកស្តាយចំពោះហេតុការណ៍នៃការផ្ទុះមីនដែលបណ្តាលឱ្យកងថៃរងរបួសកាលពីម្សិលមិញ និងបានគូសបញ្ជាក់សាជាថ្មីថា កម្ពុជាមិនប្រើប្រាស់ និងមិនដាក់គ្រាប់មីនថ្មីឡើយ ព្រមទាំងបានប្រកាន់ខ្ជាប់នូវការគោរពចំពោះអនុសញ្ញាអូតាវ៉ា ដែលកម្ពុជាគឺជារដ្ឋភាគីនៃអនុសញ្ញាហាមប្រាមមីនប្រឆាំងមនុស្ស។

ការថ្លែងបញ្ជាក់យ៉ាងដូច្នេះពីអ្នកនាំពាក្យក្រសួងការពារជាតិកម្ពុជាធ្វើឡើងក្នុងការធ្វើសេចក្តីសង្ខេបព័ត៌មាន ស្តីពីលទ្ធផលនៃការអនុវត្តបទឈប់បាញ់រវាងកម្ពុជា-ថៃ នាព្រឹកថ្ងៃទី២៨ ខែសីហា ឆ្នាំ២០២៥ នៅទីស្តីការគណៈរដ្ឋមន្ត្រី។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

លោកជំទាវអ្នកនាំពាក្យបានថ្លែងថា កម្ពុជាក៏ធ្លាប់បានជម្រាបជូនភាគីថៃ និងសហគមន៍អន្តរជាតិជាច្រើនដងរួចមកហើយថា នៅតាមបណ្តោយព្រំដែននៃទឹកដីកម្ពុជាគឺមានគ្រាប់មីនជាច្រើនដែលបន្សល់ ទុកពីសម័យសង្គ្រាមស៊ីវិល។

លោកជំទាវ ឧត្តមសេនីយ៍ឯក ម៉ាលី សុជាតា បានបន្ថែមថា កម្ពុជាសូមគូសបញ្ជាក់យ៉ាងម៉ឺងម៉ាត់ និងច្បាស់លាស់បំផុតនូវការប្តេជ្ញាចិត្តឥតងាករេរបស់ខ្លួនក្នុងការគោរព និងអនុវត្តដោយខ្ជាប់ខ្ជួននូវបទឈប់បាញ់ដែលសម្រេចបានកាលពីថ្ងៃទី២៨ ខែកក្កដា ឆ្នាំ២០២៥ រួមនឹងគោលការណ៍ឯកភាពទាំង១៣ចំណុចនៅក្នុងកិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា-ថៃ កាលពីថ្ងៃទី០៧ ខែសីហា ឆ្នាំ២០២៥ ដោយកម្ពុជាសូមឱ្យភាគីថៃគោរពនូវលក្ខខណ្ឌកិច្ចព្រមព្រៀងនៃបទឈប់បាញ់ ព្រមទាំងស្មារតី និងការឯកភាពគ្នានៅក្នុងកិច្ចប្រជុំវិសាមញ្ញគណៈកម្មាធិការទូទៅដែលថាភាគីទាំងពីរបានព្រម ព្រៀងគ្នារក្សាកម្លាំងយោធារបស់ខ្លួននៅក្នុងទីតាំងបច្ចុប្បន្ន ដោយមិនអនុញ្ញាតឱ្យផ្លាស់ទីហួសពីទីតាំងដែលខ្លួនបានឈរជើងក្នុងពេលកិច្ចព្រមព្រៀងបទឈប់បាញ់បានចូលជាធរមាននៅម៉ោង១២ រំលងអធ្រាត្រថ្ងៃទី២៨ ខែកក្កដា ឆ្នាំ២០២៥ ឡើយ៕ 

ប្រភព៖ ក្រសួងព័ត៌មាន