អ្នកនាំពាក្យក្រសួងការពារជាតិគូសបញ្ជាក់ថា កម្ពុជាមិនទទួលយកការប្រឈមមុខដាក់គ្នា និងជម្លោះឡើយ

លោកជំទាវ ឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិ បានគូសបញ្ជាក់ថា ក្នុងនាមជាប្រទេសដែលមានទំនួលខុសត្រូវខ្ពស់ និងស្រឡាញ់សន្តិភាព កម្ពុជាបានប្រកាន់ខ្ជាប់នូវលក្ខខណ្ឌនៃបទឈប់បាញ់ដោយជ្រើសយកការសន្ទនា និងកិច្ចសហប្រតិបត្តិការ ដោយមិនទទួលយកការប្រឈមមុខដាក់គ្នា និងជម្លោះឡើយ។

ការថ្លែងយ៉ាងដូច្នេះពីអ្នកនាំពាក្យក្រសួងការពារជាតិកម្ពុជាធ្វើឡើងក្នុងការធ្វើសេចក្តីសង្ខេបព័ត៌មាន ស្តីពីលទ្ធផលនៃការអនុវត្តបទឈប់បាញ់រវាងកម្ពុជា-ថៃ នាព្រឹកថ្ងៃទី៣១ ខែសីហា ឆ្នាំ២០២៥ នៅទីស្តីការគណៈរដ្ឋមន្ត្រី។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

លោកជំទាវអ្នកនាំពាក្យបានបន្ថែមថា កម្ពុជាសូមគូសបញ្ជាក់សាជាថ្មីចំពោះគោលជំហរក្នុងការដោះ ស្រាយដោយសន្តិវិធី ស្មោះត្រង់ ស្របតាមច្បាប់អន្តរជាតិ ធម្មនុញ្ញអង្គការសហប្រជាជាតិ និងធម្មនុញ្ញ អាស៊ាន ដោយកម្ពុជាសូមអំពាវនាវឱ្យភាគីថៃគោរពនូវលក្ខខណ្ឌនៃកិច្ចព្រមព្រៀងបទឈប់បាញ់ ព្រម ទាំងស្មារតី និងការឯកភាពគ្នាកាលពីកិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា-ថៃ (GBC) ខណៈដែលកម្ពុជាតែងបានប្រកាន់ខ្ជាប់ និងអនុវត្តតាមស្មារតីដែលភាគីទាំងពីរបានឯកភាពគ្នានៅក្នុងកិច្ចប្រជុំវិសាមញ្ញគណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) នាពេលកន្លងមក ដោយ ភាគីទាំងពីរបានឯកភាពគ្នាក្នុងការបង្កើនជំនឿទុកចិត្តសំដៅកាត់បន្ថយភាពតានតឹង រក្សាសន្តិភាពនៅ តាមបណ្តោយព្រំដែនដោយប្រើប្រាស់យន្តការផ្សេងៗដើម្បីដោះស្រាយភាពខុសគ្នាដោយសន្តិវិធី និង បញ្ចៀសការប៉ះទង្គិចគ្នាក្នុងស្មារតីភាពជាអ្នកជិតខាងល្អ មិត្តភាព និងសាមគ្គីភាព ហើយប្រសិនបើមាន បញ្ហាអ្វីត្រូវរួមគ្នាដោះស្រាយតាមរយៈយន្តការដែលមានស្រាប់។ ក្នុងន័យនេះ លោកជំទាវអ្នកនាំពាក្យ ក្រសួងការពារជាតិបានស្នើឱ្យភាគីថៃអនុវត្តដូចគ្នានូវស្មារតីនេះ៕ ដោយ៖ ចាន់ សុភឿន