អារម្មណ៍៖ ពេលវេលានៅលើភពផែនដីនេះមានពេលកំណត់ ប៉ុន្តែគ្មាននរណាអាចប្រាប់បានទេថា យើងអាចនៅមានពេលវេលាច្រើនប៉ុណ្ណាទៀតក្នុងការរស់នៅលើពិភពលោកមួយនេះ។ ការមានឱកាសរស់នៅជាមួយមនុស្សជាទីស្រឡាញ់ គ្រួសារ មិត្តភក្តិ បងប្អូន និងមនុស្សនៅជុំវិញខ្លួន ជាឱកាសដ៏មានតម្លៃបំផុត។
ប្រហែលជាពេលខ្លះ យើងអាចរង់ចាំពេលវេលាដើម្បីសម្រេចចិត្តធ្វើអ្វីមួយ ហើយពេលខ្លះយើងអាចនឹងគិតថា បើរកមិនបានឱកាសទេ ត្រូវបង្កើតវាដោយខ្លួនឯង។ វាពិតជាត្រឹមត្រូវណាស់ ព្រោះយើងមិនអាចអង្គុយតែរង់ចាំដោយមិនធ្វើអ្វីសោះនោះដែរ ក៏ប៉ុន្តែក្នុងកាលៈទេសៈខ្លះ យើងនឹងមិនអាចបង្កើតឱកាសទាំងអស់នោះបានដោយខ្លួនឯងឡើយ។
មនុស្សស្លាប់មិនអាចរស់ឡើងវិញ មនុស្សបែកគ្នាហើយក៏មិនប្រាកដថាបានជួបគ្នាម្តងទៀត របស់ដែលបាត់បង់ហើយមិនប្រាកដថាអាចយកត្រឡប់មកវិញ។ ហេតុអ្វីត្រូវបណ្តោយតាមព្រេងវាសនា?
ការមានឱកាសក្នុងការធ្វើអ្វីមួយ ការមាននិស្ស័យជួបនរណាម្នាក់ មានពេលវេលាក្នុងការសម្លឹងមើលឃើញរបស់ទាំងអស់នោះ វានឹងមិនស្ថិតស្ថេរទេ។ គ្រប់យ៉ាងនឹងបាត់បង់ទៅវិញនៅពេលវេលាកំណត់ណាមួយដែលគ្មាននរណាអាចស្មានដឹង ព្រោះគ្មានអ្នកណាអាចមើលឃើញអនាគតឡើយ ពេលណាជាពេលចុងក្រោយដែលយើងបានជួបនិយាយជាមួយនរណាម្នាក់ ក៏យើងមិនដឹងផង។
រៀនរស់នៅជាមួយពេលវេលាទាំងអស់នោះឱ្យបានល្អបំផុត ចំណាយពេលវេលាឱ្យមានតម្លៃ ចង់ធ្វើអ្វីត្រូវសម្រេចធ្វើ មានអ្វីចង់និយាយប្រាប់គ្នា គួរនិយាយមុនពេលយើងលែងមានឱកាសទាំងអស់នោះ។
ការបានអង្គុយនៅមាត់សមុទ្រ ជាពេលវេលាដែលមានក្តីសុខណាស់ សម្រាប់មនុស្សស្ទើរតែគ្រប់គ្នា។ ទោះបីនៅក្នុងចិត្តដឹងច្បាស់ណាស់ថា បន្តិចទៀតនឹងត្រូវត្រឡប់ទៅទីក្រុងដ៏មមាញឹក បន្តការងារ បន្តទំនួលខុសត្រូវ និងត្រឡប់មកដោះស្រាយបញ្ហាជីវិតមួយនេះបន្តទៅទៀត ក៏ប៉ុន្តែយើងនៅតែរើសយកក៏ការសម្រាកដ៏ស្កប់សុខ យកចិត្តទុកដាក់ចំពោះតែសម្លេងរលកនៅចំពោះមុខ បិទភ្នែកស្រូបយកខ្យល់បរិសុទ្ធ ហើយជ្រើសរើសក្នុងការរីករាយចំពោះពេលវេលាដែលនៅសល់។
ជីវិតក៏ដូចគ្នា គ្រប់យ៉ាងទាំងអស់សុទ្ធតែមិនស្ថិតស្ថេរ ទោះយូរឬឆាប់ ត្រូវចាំថា យើងនឹងបាត់បង់វាត្រឡប់ទៅវិញ ដូច្នេះហើយ ត្រូវចេះត្រេកអរ រីករាយ និងយកចិត្តទុកដាក់ចំពោះអ្វីដែលនៅចំពោះមុខ ស្រឡាញ់មើលថែមនុស្សដែលសំខាន់ក្នុងជីវិតយើង ខិតខំប្រឹងប្រែងធ្វើរឿងទាំងអស់នោះឱ្យអស់ពីសមត្ថភាព នោះយើងនឹងដឹងថា ទោះថ្ងៃមុខយើងបាត់បង់របស់ទាំងអស់នោះក៏ដោយ ក៏យើងមិនស្តាយក្រោយនោះដែរ៕
សរសេរដោយ៖ Sophia
កែសម្រួលដោយ៖ Min
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក ប្រលោមលោក & អប់រំ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
