ខេត្តបាត់ដំបងត្រៀមតំបន់ទេសចរណ៍ជាង១០០កន្លែងទទួលភ្ញៀវដើរលេងកំសាន្តក្នុងឱកាសបុណ្យកាន់បិណ្ឌ និងភ្ជំបិណ្ឌ

មន្ទីរទេសចរណ៍ខេត្តបាត់ដំបងបានអោយដឹងថា ក្នុងឱកាសបុណ្យកាន់បិណ្ឌ និងភ្ជំបិណ្ឌនេះ ខេត្តបានត្រៀមរមនីយដ្ឋាន និងគោលដៅទេសចរណ៍ប្រមាណ១១៥កន្លែង ដើម្បីទទួល ភ្ញៀវទេសចរណ៍ជាតិ អន្តរជាតិដើរលេងលំហែកំសាន្ត ។ ទីតាំងទេសចរណ៍ខាងលើនេះមានរមណីយដ្ឋានទេសចរណ៍ចំនួន២២កន្លែង សហគមន៍ទេសចរណ៍ និងអេកូទេសចរណ៍ចំនួន៤កន្លែង តំបន់គោលដៅទេសចរណ៍ចំនួន៥៤កន្លែង សារមន្ទីរចំនួន២កន្លែង ទេសចរណ៍បែបសាសនាចំនួន២៩កន្លែង និងគោលដៅកសិ-ទេសចរណ៍ចំនួន៤កន្លែង ។

លោក សឿម ប៊ុនរិទ្ធ អ្នកនាំពាក្យ និងជាអភិបាលរងខេត្តបាត់ដំបងបានឱ្យដឹងថា អាជ្ញាធរខេត្តក៏បានធ្វើការផ្សព្វផ្សាយអំពីសក្តានុពលទេសចរណ៍ដើម្បីជំរុញការទាក់ទាញភ្ញៀវទេសចរជាតិ និងអន្តរជាតិអញ្ជើញមកទស្សនាកំសាន្តក្នុងខេត្តបាត់ដំបងកាន់តែច្រើនក្នុងឱកាសបុណ្យកាន់បិណ្ឌ និងភ្ជំបិណ្ឌនេះ។ បន្ថែមពីនោះបានចាត់តាំងកងកម្លាំងមានសមត្ថកិច្ចប្រចាំការរក្សាសណ្តាប់ធ្នាប់ សន្តិសុខ សុវត្ថិភាពជូនប្រជាពលរដ្ឋ និងភ្ញៀវទេសចរជាតិ និង អន្តរជាតិតាមទីវត្តអារាម តំបន់រមណីយដ្ឋាន និងគោលដៅទេសចរណ៍នានាទូទាំងខេត្ត។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

លោកបន្ថែមថា ថ្នាក់ដឹកនាំខេត្តក៏បានណែនាំអោយមន្ទីរទេសចរណ៍ខេត្តចុះធ្វើការផ្សព្វផ្សាយស្តីពីការពង្រឹងគុណភាពសេវាកម្មទេសចរណ៍ ការរក្សាតម្លៃ និងភាពទាក់ទាញទេសចរណ៍ដល់ប្រតិបត្តិករទេសចរណ៍ទូទាំងខេត្ត ដើម្បីធានាថាភ្ញៀវទេសចរនឹងមានភាពកក់ក្តៅ និងពេញចិត្ត ។ បន្ថែមពីនោះបានណែនាំតាមបណ្តាក្រុង-ស្រុកទូទាំងខេត្តចូលរួមថែរក្សាសណ្តាប់ធ្នាប់ អនាម័យ បរិស្ថានអោយបានល្អ និងយកចិត្តទុកដាក់ចំពោះសុវត្ថិភាពភ្ញៀវទេសចរជាតិ និង អន្តរជាតិជាចំបងនៅតាមតំបន់រមណីយដ្ឋាន និងគោលដៅទេសចរណ៍នានាក្នុងខេត្តផងដែរ ។

លោក ហម អារុណ អនុប្រធានមន្ទីរទេសចរណ៍ខេត្តបាត់ដំបងបានថ្លែងថាក្រោយ ពីទទួលបានការ ណែនាំពី ថ្នាក់ក្រសួងក៏ដូចជាខេត្ត លោកបានដឹកនាំក្រុមការងារចុះផ្សព្វផ្សាយពង្រឹងគុណភាពសេវាកម្មទេសចរណ៍ក្នុងឱកាសពិធីបុណ្យកាន់បិណ្ឌ និងភ្ជុំបិណ្ឌដែលប្រព្រឹត្តទៅចាប់ពីថ្ងៃទី៨ ដល់ថ្ងៃទី២២ ខែកញ្ញា ឆ្នាំ២០២៥ ដើម្បីចូលរួមពង្រឹងគុណភាពសេវាកម្មទេសចរណ៍ ក្នុងគោលដៅចូលរួមលើកកម្ពស់កិត្យានុភាព និងភាពធន់របស់កម្ពុជាតាមរយៈការប្រែក្លាយកម្ពុជាជាគោលដៅទេសចរណ៍ប្រកបដោយសុខសុវត្ថិភាព ភាពទាក់ទាញ ពោរពេញដោយកាលានុវត្តភាព និងភាពកក់ក្ដៅ។ពិសេសនោះគឺមិនត្រូវតម្លើងថ្លៃសេវានានានោះទេ។ 

;លោក ហម អរុណ ក៏បានណែនាំបន្ថែមដល់ប្រតិបត្តិករទេសចរណ៍ត្រូវក្រើនរំលឹកអំពីសីលធម៌ សុជីវធម៌ និងអភិវឌ្ឍន៍សមត្ថភាពបុគ្គលិកអំពីការផ្តល់សេវាល្អ បដិសណ្ឋារកិច្ចល្អ និងជំនាញដែលចាំបាច់ពាក់ព័ន្ធនឹងអាជីវកម្មសេវាកម្មទេសចរណ៍ ព្រមទាំងរៀបចំឱ្យបុគ្គលិកមានឯក សណ្ឋានត្រឹមត្រូវទៅតាមផ្នែកនីមួយៗ ។

បន្ថែមពីនោះជាពិសេសស្នើសុំឱ្យមានការរំលេចលក្ខណៈជាខ្មែរត្រូវយកចិត្តទុកដាក់ចំពោះការរក្សាអនាម័យបន្ទប់ទឹក ដោយត្រូវដាក់វេនសម្អាតជាប្រចាំឱ្យបានញឹកញាប់ និងមានសម្ភារគ្រប់គ្រាន់មានជាអាទិ៍ សាប៊ូលាងដៃ កន្សែងជូតដៃ ក្រដាសជាដើម និង សូមបែងចែករវាងបន្ទប់ទឹកបុរស-នារី ដើម្បីរក្សាឱ្យមានសុវត្ថិភាព។

លោកបន្តថាប្រតិបត្តិករទេសចរណ៍ត្រូវយកចិត្តទុកដាក់ និងចូលរួមទាក់ទាញភ្ញៀវទេសចរជាតិ និងអន្តរជាតិចូលរួមឱ្យបានសកម្ម នូវយុទ្ធនាការ ក្រោមទិសស្លោកចំនួន៣៖ ទី១ “ទេសចរណ៍ដើម្បីទាំងអស់គ្នា ទាំងអស់គា្នដើម្បីទេសចរណ៍” ទី២ “ទេសចរណ៍រីកលូតលាស់ក្នុងសន្តិភាព ” និងទី៣ “បុគ្គលម្នាក់ៗជាអ្នកផ្សព្វផ្សាយ ទេសចរណ៍កម្ពុជា”៕ អត្ថបទ ៖ ភី សុខ វិទ្យុជាតិចំការចេកខេត្តបាត់ដំបង