កម្លាំងអង្គភាពCMAC ចុះហ៊ុំពន្ធ័រណ្តៅគ្រាប់ និង កំណត់អត្តសញ្ញាណគ្រាប់ផ្លោង និងចំនួនរណ្តៅដែលផ្ទុះទាំងអស់​ ក្រោយករណីការបាញ់ផ្លោងរបស់ទាហ៊ានសៀម មកលើទឹកដីកម្ពុជា និងកងកម្លាំង នៅថ្ងៃទី២៧​នេះ​

ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកស៊ីម៉ាក់ បានលើកឡើងថា ករណីការបាញ់ផ្លោងរបស់ទាហ៊ានសៀមមកលើបូរណភាពទឹកដីកម្ពុជា និងកងកម្លាំងកម្ពុជានៅថ្ងៃទី២៧​ ខែកញ្ញា​ ឆ្នាំ២០២៥នេះ​ ជាការបាញ់លើកម្ពុជាមុនយ៉ាងច្បាស់មិនអាចប្រកែកបានឡើយ។ ព្រោះថាកងកម្លាំងកម្ពុជាស្តាប់បទបញ្ជាថ្នាក់ដឹកនាំអត់ធ្មត់មិនបាញ់តបឡើយ។

តាមរយៈបណ្តាញសង្គមការងារផ្លូវការ នារាត្រីថ្ងៃទី២៧ ខែកញ្ញា ឆ្នាំ២០២៥នេះ មន្ត្រីជាន់ខ្ពស់រាជរដ្ឋាភិបាលខាងលើ បានបញ្ជាក់ថា «ករណីបាញ់ផ្លោងនៅថ្ងៃនេះដូចគ្នាករណីទាហ៊ានសៀមបាញ់តែម្នាក់ឯង​មកលើតំបន់ភូមិភ្លុកដំរី​ ឃុំថ្មដា​ ស្រុកវាលវែង​ ខេត្តពោធិ៍សាត់​ កាលពីម៉ោង៥:០១​ ទាបភ្លឺថ្ងៃទី២៦​ ខែកក្កដា​ ឆ្នាំ២០២៥​ ក្នុងគោលបំណងពង្រីកសមរភូមិប្រយុទ្ធ។ បាញ់ម្នាក់ឯង​ ចោទអ្នកណាបាញ់មុនបាញ់ក្រោយស្អីទៀត? បើបាញ់តែម្នាក់ឯង​ អ្នកណាបាញ់អ្នកនោះបាញ់មុនហើយ!! »។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

តាមប្រសាសន៍របស់សម្តេចតេជោ​ ដោយផ្តល់អនុសាសន៍ឱ្យរក្សាទុកភស្តុតាង ប្រធានអគ្គនាយកខាងលើ បានរំលេចថា ករណីនៅថ្មដា​ កម្លាំងអង្គភាពCMAC បានសហការជាមួយកងទ័ពចុះហ៊ុំពន្ធ័រណ្តៅគ្រាប់ និងបានកំណត់អត្តសញ្ញាណគ្រាប់ផ្លោងប្រភេទ១០៥មម​ ចំនួន៦រណ្តៅដែលផ្ទុះទាំងអស់​ (លើ២១គ្រាប់ដែលបានបាញ់) ដោយវិភាគអំបែងគ្រាប់១០៥មមនោះ​ អ្នកបច្ចេកទេសបានដឹងថា​ មានគ្រាបផ្លោង១០៥មមចំនួន៤គ្រាប់ជាគ្រាប់ផ្លោងមានផ្ទុកផ្សែងពុលWP និង២រណ្តៅគ្រាប់ជាគ្រាប់ជះអំបែង។ តាមរយ:ការវិភាគនេះ​ អាចដឹងច្បាស់ជាគ្រាប់ផ្លោងផលិតនៅប្រទេសណា​ ហើយអ្នកណាជាអ្នកប្រើប្រាស់គ្រាប់នោះយ៉ាងច្បាស់លាស់!។

ឯកឧត្តម បានបន្តថា «ភស្តុតាងទាំងនេះនៅពោធិ៍សាត់បញ្ជាក់ច្បាស់ថា​ សៀមជាអ្នកបាញ់មកលើទឹកដីកម្ពុជា​ ហើយកងកម្លាំងកម្ពុជាមិនបានផ្ទុះអាវុធបាញ់តបតវិញផង​ គ្មានស្អីត្រូវបកស្រាយអ្នកណាបាញ់មុនទៀត!! ។ ដូចនេះ​ ករណីផ្ទុះអាវុធនៅថ្ងៃនេះ​ ក៏ដូចគ្នាដែរ គឺសៀមជាអ្នកបាញ់ ​ដូចនេះសៀមបាញ់មុន​ ព្រោះកម្ពុជាគ្មានការផ្ទុះអាវុធផងហ្នឹង!»៕ ដោយ៖ កន ចំណាន