Selena បង្ហាញរូបភាព រៀបការ ជាមួយ គូស្នេហ៍ យ៉ាងផ្អែមល្ហែម

កម្សាន្ត៖ តារាចម្រៀងស្រី Selena Gomez បានបង្ហាញរូបថតអាពាហ៍ពិពាហ៍ដ៏រ៉ូមែនទិកជាច្រើនសន្លឹក ពីពិធីមង្គលការរបស់នាង ជាមួយនឹងគូស្នេហ៍ ដែលជាតន្ត្រីករ លោក Benny Blanco នៅរដ្ឋកាលីហ្វ័រញ៉ា កាលពីថ្ងៃទី ២៧ ខែកញ្ញាកន្លងទៅនេះ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

តារាចម្រៀងស្រី Selena Gomez បានបញ្ជាក់ពីដំណឹងល្អ ជាមួយនឹងការបង្ហោះ នៅលើ Instagram នៅល្ងាចថ្ងៃសៅរ៍ (ម៉ោងក្នុងតំបន់) ដោយបង្ហាញពីរូបថត និងវីដេអូជាច្រើនដែលថតពីថ្ងៃដ៏អស្ចារ្យជាមួយនឹងចំណងជើងថា «ថ្ងៃទី ២៧ ខែកញ្ញា ឆ្នាំ ២០២៥»។

នៅក្នុងរូបថតទាំងនោះ គូស្នេហ៍មួយគូនេះ បានកាន់ដៃគ្នាឱបគ្នា រីករាយនឹងពេលវេលាដ៏ពិសេសរបស់ពួកគេទាំងពីរ។ រូបថតមួយចំនួន បានបង្ហាញពីភួងផ្កាពណ៌សបែបសាមញ្ញរបស់ Selena និងចិញ្ចៀនអាពាហ៍ពិពាហ៍ដ៏ភ្លឺចែងចាំង។ ពេលវេលាដ៏កក់ក្តៅមួយ បានបង្ហាញថា Benny Blanco បានសម្រាក កើយនៅលើភ្លៅរបស់ភរិយា ខណៈពេលដែលនាងបានកែក្រវាត់ក របស់លោក ដោយក្តីស្រឡាញ់ និងផ្តល់ការថើបដ៏ទន់ភ្លន់ដល់លោក។

អ្នកទាំងពីរ បានជ្រើសរើសសំលៀកបំពាក់ Ralph Lauren ។ Selena បាន​ស្លៀក​រ៉ូប​អាពាហ៍ពិពាហ៍​ ដែល​មាន​ក​រាង​ស្រឡូន និង​បង្ហាញសាច់​ខ្នង​ដ៏​ទាក់ទាញ។ ខណៈ Benny ពាក់អាវ Tuxedo ខ្មៅនិងក្រវ៉ាត់ក។

ក្នុងរយៈពេលតិចជាងមួយម៉ោងនៃការចែករំលែក ការបង្ហោះរបស់ Selena Gomez ទទួលបានការចូលចិត្តជាង ៣ លាន និងមតិអបអរសាទររាប់ពាន់ពីមិត្តរួមការងារ និងអ្នកគាំទ្រ។ Benny Blanco ក៏បានបញ្ចេញមតិផ្អែមល្ហែមថា «ភរិយាខ្ញុំក្នុងជីវិតពិត»។

យោងតាម ប្រព័ន្ធផ្សព្វផ្សាយអាមេរិក បានរាយការណ៍ថា តារាចម្រៀងស្រីវ័យ ៣៣ ឆ្នាំ Selena Gomez បានរៀបការជាមួយតន្ត្រីករ លោក Benny Blanco នៅក្នុងទីធ្លាខាងក្រោយផ្ទះវីឡាធំមួយ ក្នុងទីក្រុង Montecito តំបន់ Santa Barbara County កាលពីរសៀលថ្ងៃសៅរ៍។ ភ្ញៀវជិត ២០០ នាក់បានចូលរួម រួមទាំងតារាល្បីៗដូចជា Taylor Swift, Steve Martin, Martin Short និង Paul Rudd រួមទាំងតារាជាច្រើនទៀត ផងដែរ៕

ប្រភព៖ Ngoisao.net

សូមទស្សនារូបភាពខាងក្រោម៖ 

• រូបភាព
• តារាអន្តរជាតិ