អតីតស្វាមី សាន់ឆាយ ត្រូវគេរិះគន់ រឿងមួយនេះ ក្រោយ បង្ហាញរូបភាព កូនប្រុស

កម្សាន្ត៖ អ្នកជំនួញ លោក Wang Xiaofei ដែលត្រូវបានគេស្គាល់ថា ជាអតីតស្វាមី តារាសម្ដែងស្រី Barbie Hsu បានបង្កឱ្យមានភាពចម្រូងចម្រាសជាច្រើន នៅពេលដែលរូបលោក បានបង្ហោះរូបថតកូនប្រុសរបស់ខ្លួន ដោយបានបង្ហាញមុខមាត់ បើទោះបីជា អតីតភរិយារបស់លោក ធ្លាប់បានហាមឃាត់យ៉ាងតឹងរ៉ឹង ចំពោះរឿងនេះ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

យោងតាម ​​ប្រភព 163 បានឲ្យដឹងថា នៅលើទំព័រផ្ទាល់ខ្លួនរបស់អ្នកជំនួញ លោក Wang Xiaofei កាលពីថ្ងៃទី ១២ ខែតុលា កន្លងទៅនេះ រូបលោក បានបង្ហាញពីពេល ដែលខ្លួនលេងបាល់បោះជាមួយកូនប្រុសរបស់លោក ដែលមានឈ្មោះថា Wang Xilin ។ លើសពីនេះ លោកក៏បានបង្ហោះវីដេអូ នៃការញ៉ាំអាហារជុំគ្នា ទាំងគ្រួសារ ខណៈមុំកាមេរ៉ា ថតចំមុខកូនប្រុស ហើយក្មេងប្រុសរូបនេះក៏មើលមកចំ ផងដែរ។ នេះ​ជា​ពេល​វេលា​ដ៏​កម្រ​ សម្រាប់ Wang Xilin ដែលត្រូវបានបង្ហាញមុខ។

ការដែល Wang Xiaofei បានបង្ហាញមុខកូនប្រុសរបស់លោកយ៉ាងច្បាស់ បានបង្កឱ្យមានភាពចម្រូងចម្រាសជាច្រើន ដោយសារតែ តាំងពីកើតមក ម្តាយរបស់ក្មេងប្រុសរូបនេះ តារាស្រី Barbie Hsu បានកំណត់ការបង្ហាញមុខក្នុងប្រព័ន្ធផ្សព្វផ្សាយ យ៉ាងមានកម្រិត។ តារាស្រីរូបនេះ ធ្លាប់បង្ហាញបំណងចង់ឲ្យមហាជនគោរពសិទ្ធិឯកជនរបស់កូន ដោយអនុញ្ញាតឱ្យពួកគេរស់នៅបានសុខស្រួល និងដោយសេរីដូចកុមារដទៃទៀត។ តារាសម្ដែង និងអតីតស្វាមី មានជម្លោះដ៏ក្ដៅគគុកអំពីរឿងនេះ ដោយសារតែ លោក Wang Xiaofei តែងតែឲ្យកូនប្រុសរបស់ខ្លួន បង្ហាញមុខនៅក្នុងការផ្សាយផ្ទាល់ជាមួយភរិយាថ្មីរបស់លោក។ នៅឆ្នាំ ២០២៣ នៅពេលដែលភាពតានតឹងឈានដល់កម្រិតកំពូល Barbie Hsu បានប្តឹង Wang Xiaofei ពីបទបង្ហាញមុខកូនរបស់នាង ដែលបណ្តាលឱ្យអ្នកជំនួញម្នាក់នេះ ហ៊ានបានត្រឹមបង្ហោះរូបថតខ្នង និងត្រគាករបស់កូនប្រុស តែប៉ុណ្ណោះ។

នៅលើបណ្ដាញសង្គម មហាជនជាច្រើនបានរិះគន់អ្នកជំនួញរូបនេះ ថា ប្រហែលជាអាជីវកម្មរបស់លោក ជួបការលំបាក ទើបលោកចាប់ទាញយកផលប្រយោជន៍ពីកូនប្រុសរបស់ខ្លួន ដើម្បីទាក់ទាញការចាប់អារម្មណ៍​ ព្រមទាំងបង្ហាញភាពអាត្មានិយម បំពាន និងគិតតែពីខ្លួនឯង។ ខណៈមាន ទស្សនិកជនម្នាក់បាន លើកឡើងថា សកម្មភាពរបស់លោក ខ្វះការយកចិត្តទុកដាក់ចំពោះអារម្មណ៍របស់កុមារ។ ការ​បញ្ចេញ​រូប​​ច្រើន​ពេក​ ​អាច​បង្ក​គ្រោះថ្នាក់​ដល់​ការ​អភិវឌ្ឍ​របស់​កូន។

ខណៈ​នោះ លោក Wang Xiaofei បាន​នៅ​ស្ងៀម។ ថ្មីៗនេះ លោកថាលោករវល់នឹងការងារ និងតែងតែធ្វើដំណើរទៅរកស៊ី ហើយសង្ឃឹមថា នឹងបានជួបកូនវិញក្នុងពេលឆាប់ៗនេះ៕

ប្រភព៖ Ngoisao.net

សូមទស្សនារូបភាពខាងក្រោម៖