ថៃច្រានចោលពត៌មានអំពីការដោះលែងអ្នកទោសសង្គ្រាម កម្ពុជា១៨នាក់

បាងកក៖ កងយោធពលភូមិន្ទថៃ (Royal Thai Army) នាល្ងាចថ្ងៃទី ១៨ ខែតុលា បានចេញសេចក្តីថ្លែងការណ៍បដិសេធព័ត៌មានដែលកំពុងរីករាលដាលលើបណ្តាញសង្គមថា ថៃបានដោះលែងអ្នកទោសសង្គ្រាមកម្ពុជាចំនួន ១៨នាក់ បន្ទាប់ពីកិច្ចប្រជុំបួនភាគីនៅទីក្រុងកូឡាឡាំពួរ (Kuala Lumpur)។

ឧត្តមសេនីយ៍ឯក វីតាយ ឡៃថូមយ៉ា (Gen. Witai Laithomya), អគ្គសេនាធិការរងនៃកងយោធពលភូមិន្ទថៃ បានបញ្ជាក់ថា ព័ត៌មាននោះ មិនពិតទាំងស្រុងទេ ហើយមិនមានការដោះលែងអ្នកទោសសង្គ្រាមណាមួយឡើយ។ លោកបានថ្លែងថា ការឃុំឃាំងអ្នកទោសសង្គ្រាមត្រូវបានអនុវត្តតាម អនុសញ្ញាទីក្រុងហ្សឺណែវ (Geneva Convention) និងគោលការណ៍មនុស្សធម៌អន្តរជាតិ ដោយមានការគោរពសិទ្ធិមនុស្សយ៉ាងតឹងរ៉ឹង។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

កងយោធថៃក៏បានបញ្ជាក់ថា ការដោះលែង ឬប្រគល់អ្នកទោសសង្គ្រាមអាចកើតឡើងបាន តែបើកម្ពុជាបំពេញលក្ខខណ្ឌសំខាន់ ៤ ចំណុច រួមមាន៖

- ដកអាវុធធុនធ្ងន់ចេញពីតំបន់ព្រំដែន

- រួមគ្នាបោសសម្អាតមីន

- សហការបង្ក្រាបឧក្រិដ្ឋកម្មអន្តរជាតិ

- ដោះស្រាយបញ្ហាទន្ទ្រានព្រំដែនតាមវិធានសន្តិភាព

ទន្ទឹមគ្នានេះផងដែរ កងយោធាថៃបានអំពាវនាវឲ្យប្រព័ន្ធផ្សព្វផ្សាយ និងសាធារណជនប្រុងប្រយ័ត្នក្នុងការទទួលព័ត៌មាន និងតាមដានតែប្រភពផ្លូវការ ដើម្បីជៀសវាងការយល់ច្រឡំ ឬបង្កភាពតានតឹងបន្ថែម។

ប្រភព៖ khaosod