Klopp ទម្លាយហេតុផលពិតដែល បដិសេធមិនមកដឹកនាំបិសាចក្រហម

កីឡា៖  ឮតែឈ្មោះ Jurgen Klopp ប្រិយមិត្តដែលស្នេហាវិស័យកីឡាបាល់ទាត់ប្រាកដជាស្គាល់ហើយថាលោកជាអតីតគ្រូដឹកនាំក្រុមហង្សក្រហម Liverpool ដែលចាត់ទុកជាគ្រូបង្វឹកឆ្នើមម្នាក់ក្នុងប្រវត្តិសាស្ត្ររបស់ក្លិប ដែលបានជួយលើកមុខលើកមាត់ Liverpool ឲ្យឈ្នះទាំងពាន Champions League និង Premier League ព្រមទាំងពានរង្វាន់ជាច្រើនទៀត។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

យ៉ាងណាមិញ Klopp បានទម្លាយឲ្យដឹងថាកាលលោកនៅដឹកនាំ Borussia Dortmund គឺ Manchester United បានព្យាយាមទាក់ទងសុំឲ្យលោកមកដឹកនាំបិសាចក្រហម នាឆ្នាំ២០១៣គឺបន្ទាប់ពី Sir Alex Ferguson ប្រកាសចូលនិវត្តន៍ពីការដឹកនាំតែម្ដង។

ប៉ុន្តែ Klopp ពុំបានទទួលការងារជាគ្រូបង្វឹក Man UTD ឡើយដោយសារពេលនោះលោកសប្បាយរីករាយនឹងស្នាក់នៅ Borussia Dortmund ហើយម្យ៉ាងទៀតលោកគិតថា គម្រោងដែលបិសាចក្រហមដាក់មកឲ្យលោកនោះគឺពិតជាមិនត្រូវនឹងលោកឡើយ។

លោក Klopp បានបង្ហើបថា៖ "ព្រោះតែខ្ញុំត្រូវគេប្រាប់នៅក្នុងការប្រជុំ នូវរឿងមួយចំនួនដែលខ្ញុំមិនចូលចិត្ត... ដូចជាពួកយើងនឹងទិញកីឡាករដែលអ្នកចង់បាន គឺនឹងទិញម្នាក់នេះ ម្នាក់នេះ ម្នាក់នេះ ហើយខ្ញុំអង្គុយនៅទីនោះគិតថា នេះមិនមែនជាគម្រោងដែលខ្ញុំចង់បានឡើយ។ ខ្ញុំមិនចង់បាន Paul Pogba ទេ វាមិនត្រូវនោះឡើយ ខ្ញុំមិនចង់បាន Cristiano Ronaldo ទេ...វាមិនអាចជួយអ្វីបានឡើយ។ គំនិតរបស់ពួកគេគឺព្យាយាមយកកីឡាករល្អៗចូលមកក្លិប តែមិនបាននិយាយពីបាល់ទាត់នោះឡើយ។ បន្ទាប់មកគម្រោងដ៏អស្ចារ្យមួយបានចូលមកជាបន្តគឺ Liverpool FC នេះឯង។"

គួរបញ្ជាក់ផងដែរថា លោក Jurgen Klopp បានដឹកនាំ Liverpool ចាប់ពីឆ្នាំ ២០១៥ និងបានប្រកាសចាកចេញពីតំណែងនាឆ្នាំ ២០២៤៕

ប្រភព៖: beinsports