គម្រោង NeoRoots លើកបង្ហាញចក្ខុវិស័យ ដើម្បីធ្វើឱ្យតន្ត្រីបុរាណខ្មែរ រស់រវើកឡើងវិញសម្រាប់មនុស្សជំនាន់ថ្មី ជាមួយនឹងការប្រគំតន្ត្រីផ្ទាល់លើកដំបូងដែលមិនធ្លាប់មានពីមុនមក!

ភ្នំពេញ, ២២ តុលា ២០២៥ – គម្រោង NeoRoots នាថ្ងៃនេះ បានប្រកាសពីបេសកកម្មរបស់ខ្លួនក្នុងការបញ្ចូលនូវស្មារតីវប្បធម៌ខ្មែរបុរាណ និងឧបករណ៍តន្ត្រីប្រពៃណី ទៅក្នុងបទភ្លេងសម័យ។ គោលបំណងគឺដើម្បីធ្វើឱ្យវប្បធម៌បខ្មែរ មានភាពរស់រើក ថែរក្សា និងមានទំនាក់ទំនងជាមួយយុវជនជំនាន់ក្រោយ ទាំងក្នុងប្រទេស និងនៅលើឆាកអន្តរជាតិ។

គម្រោង NeoRoots ដែលត្រូវបានគេពណ៌នាថាជា "ដួងព្រលឹងនៃតន្ត្រីខ្មែរ" គឺជាគំនិតផ្តួចផ្តើមឈានមុខគេមួយ ដែលបានបង្កើតឡើងដើម្បីធានាថា ឫសគល់វប្បធម៌ដ៏សម្បូរបែបរបស់កម្ពុជា មិនត្រូវបានបំភ្លេចឡើយ ផ្ទុយទៅវិញ នឹងត្រូវបានលើកស្ទួយ និងអភិវឌ្ឍបន្ថែមទៀតផងដែរ។ លោក​ សុខ វិសាល ម្ចាស់ផលិតកម្ម ក្លាបយ៉ាហ៊ែន​ បានថ្លែងថា៖ "យើងចង់ឱ្យក្មេងៗជំនាន់ក្រោយ កុំភ្លេចវប្បធម៌បុរាណ វប្បធម៌ដើម ដែលជាមរតករបស់ជាតិខ្មែរយើង។ នេះគឺអំពីការធ្វើឱ្យវប្បធម៌របស់យើងរីកលូតលាស់ឡើងវិញ ធ្វើឱ្យវាមានភាពស៊ីជម្រៅសម្រាប់សម័យកាលបច្ចុប្បន្ន"។ 

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

គម្រោងនេះ បានចាប់ផ្តើមតាំងពីឆ្នាំមុន ហើយកើតចេញពីបំណងចង់លើកកម្ពស់តម្លៃឧបករណ៍ភ្លេងខ្មែរ។ គំនិតស្នូលគឺការផលិតបទភ្លេងនេះ មិនត្រឹមតែមានភាពរស់រវើក និងទាក់ទាញសម្រាប់ទស្សនិកជនវ័យក្មេងប៉ុណ្ណោះទេ ប៉ុន្តែក៏បង្ហាញយ៉ាងច្បាស់អំពី ឧបករណ៍តន្ត្រីប្រពៃណីខ្មែរផងដែរ។ DJ Chee បានពន្យល់ថា៖ "យើងបានចាប់ផ្តើមគម្រោង NeoRoots ដោយសារតែយើងចង់ផ្សព្វផ្សាយឧបករណ៍ភ្លេងខ្មែរ។ រាល់បទភ្លេងទាំងអស់ក្នុងគម្រោងនេះ យើងផលិ​តជាមួយឧបករណ៍ភ្លេងទាំងនោះ ធ្វើឱ្យវាមានភាពទាក់ទាញសម្រាប់ក្មេងៗជំនាន់ក្រោយ"។

ឈ្មោះ "NeoRoots" បង្ហាញពីការរួមបញ្ចូលគ្នារវាងបុរាណ និងសម័យ៖ "Neo" ជាភាពថ្មី និង "Root" គឺឫសគល់វប្បធម៌។ ក្រុមការងារបានបន្ថែមថា៖ "យើងយកវប្បធម៌ពីដូនតារបស់យើង​ មកបង្កើតអ្វីៗដែលថ្មីសម្រាប់ក្មេងៗជំនាន់ក្រោយ"។ ចក្ខុវិស័យចុងក្រោយគឺចង់ឃើញឧបករណ៍ភ្លេងខ្មែរនៅលើឆាកធំៗ ឱ្យការទទួលស្គាល់កាន់តែទូលំទូលាយ។

NeoRoots ក៏សង្កត់ធ្ងន់លើកិច្ចសហការជាមួយសិល្បករជើងចាស់របស់កម្ពុជាផងដែរ។ លោក សុខ​ វិសាល បន្ថែមទៀតថា៖ "សិល្បករជាច្រើនសុទ្ធតែជាសិស្សច្បង សិស្សច្បងពីជំនាន់មុនៗ គឺសុទ្ធតែបានជួយទាំងអស់។ ពួកគេបានជួយលើកស្ទួយ ផ្សព្វផ្សាយ និងជួយឱ្យគេស្គាល់… វាបានជំរុញទឹកចិត្តពួកគេឱ្យធ្វើដូចគ្នា ដូច្នេះយើងមិនមែនធ្វើរឿងនេះដើម្បីតែខ្លួនយើងនោះទេ។ ផ្ទុយទៅវិញ យើងចង់ឱ្យគ្រប់គ្នាចាប់ផ្តើមធ្វើរឿងនេះឱ្យកាន់តែច្រើន"។ ស្មារតីសហការនេះ គឺជាគន្លឹះក្នុងការជំរុញចលនាដ៏ធំទូលាយនៃការអភិរក្ស និងច្នៃប្រឌិតវប្បធម៌។

យើងជឿជាក់ថាគម្រោងនេះនឹងផ្តល់នូវអ្វីដែលថ្មី​ ប្លែក និងជះឥទ្ធិពលសម្រាប់វប្បធម៌ខ្មែរសម័យថ្មីនេះ។ បទចម្រៀងពីមុនដែលបានចេញរួច ដូចជាបទ "ក្រមុំបី Style" ដែលបានជាចង្វាក់រាំវង់ តែតាមបែបសម័យទំនើប ដែលអាចជាគំរូសម្រាប់ផលិតករ និងសិល្បករជំនាន់ក្រោយៗ។ ក្រុមការងារបានព្យាករណ៍ថា៖ "ប្រហែលគោលដៅនាពេលអនាគត អាចជាការបង្កើតបទរាំវង់ ឬអ្វីមួយដែលពាក់ព័ន្ធជាមួយរាំវង់ ឬបំផុសគំនិតផ្អែកលើចង្វាក់រាំវង់ ធ្វើឱ្យក្លាយជាទីពេញនិយមយ៉ាងខ្លាំង (viral) អាចនឹងត្រូវបានរាំ​គ្រប់ទីកន្លែង ដែលអាចក្លាយជាតន្ត្រី Pop ដ៏ពេញនិយមសម្រាប់ពិភពលោក"។

តាមពិតទៅ តាមរយៈគម្រោងនេះ​ Klapyahandz​ បានក្លាយខ្លួនជា "ស្ពានតភ្ជាប់រវាងមនុស្សជំនាន់ចាស់ និងមនុស្សជំនាន់ថ្មី"។ ដោយរក្សាទុកនូវមរតកបុរាណ​ បូកផ្សំនឹងតន្ត្រីសម័យថ្មី NeoRoots បានកំពុងបង្កើតអត្តសញ្ញាណតន្ត្រីប្លែកមួយ ដែលឱ្យតម្លៃដល់អតីតកាល ផ្សាភ្ជាប់ជាមួយអនាគត។

ជាពិសេសនិងជាលើកទី១ ដែលសិល្បករ KlapYaHandz ទាំងអស់រួមគ្នាយ៉ាងស្វះស្វែងធ្វើការលើគម្រោងដ៏មានន័យមួយនេះ ហើយក៏មានការសម្ដែងផ្ទាល់លើឆាកប្រគំតន្ត្រីផងដែរ! យើងពិតជាអន្ទះសារក្នុងការចែករំលែកបទពិសោធនៃការសម្តែងផ្ទាល់ដ៏ពិសេសនេះជាមួយអ្នកទាំងអស់គ្នាណាស់!  កុំភ្លេចកត់ចំណាំថ្ងៃទុកផងណា៎‌!

ព្រឹត្តិការណ៍ពិសេស៖ NeoRoots Vol.1 – Inherit (Live Show) កាលបរិច្ឆេទ: ថ្ងៃទី ៣១ ខែ តុលា ឆ្នាំ ២០២៥ វេលាម៉ោង ៦:០០ ល្ងាច ទីតាំង: T.Y. Media E-Sports Center

កក់សំបុត្រឥតគិតថ្លៃទីនេះ: https://bookme.plus/invite_guests/263995888ffa369491977e15174ce6ff?utm_source=email 

លោក សុខ​ វិសាល៖​​ “នេះជាការងាររបស់យើងក្នុងនាមជាសិល្បករ។" លោកក៏បានបន្ដទៀតថា៖ “ពេលខ្លះយើងចង់នាំយកមកវិញនូវអ្វីរំលឹកពួកគេពីវប្បធម៌របស់យើង។​ នេះជាការងាររបស់យើង!”

គម្រោង NeoRoots សូមអញ្ជើញសាធារណជនទាំងអស់ចូលរួមក្នុងដំណើរដ៏រំភើបនៃការធ្វើឱ្យវប្បធម៌រស់រវើកឡើងវិញនេះ ដោយជាស្ពានឆ្ពោះទៅរកអនាគតដ៏រស់រវើកសម្រាប់តន្ត្រីខ្មែរ ដែលនឹងបន្លឺឡើងឆ្លងកាត់ពីមួយជំនាន់ទៅមួយជំនាន់ និងគ្មានដែនកំណត់។

ទស្សនានិងចែករំលែកវីដេអូសម្ភាសន៍ពិស្ដារ៖
https://www.facebook.com/reel/1347086083621580

អំពីគម្រោង NeoRoots: គម្រោង NeoRoots គឺជាគំនិតផ្តួចផ្តើមមួយដើម្បីលើកកម្ពស់ និងធ្វើឱ្យតន្ត្រី និងឧបករណ៍បុរាណខ្មែររស់រវើកឡើងវិញ ដោយបញ្ចូលឧបករណ៍ទាំងនោះក្នុងផលិតកម្មតន្ត្រីថ្មីៗ សម្រាប់អ្នកស្ដាប់សម័យទំនើប។ បេសកកម្មរបស់គម្រោងទាំងមូល គឺការអភិរក្សបេតិកភណ្ឌវប្បធម៌ ទន្ទឹមនឹងការជំរុញភាពច្នៃប្រឌិតក្នុងចំណោមសិល្បករ និងការចូលរួមរបស់យុវជនជំនាន់ក្រោយ។