សម្តេចតេជោ ហ៊ុន សែន អះអាងថា មានអ្នកចង់ឱ្យយកបញ្ហាព្រំដែនកម្ពុជា-ថៃ ប្ដឹងទៅសហប្រធាននៃកិច្ចព្រមព្រៀងសន្តិភាពទីក្រុងប៉ារីស

សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា បានលើកឡើងថា មានអ្នកដែលចង់ឱ្យយកបញ្ហាព្រំដែនកម្ពុជា-ថៃ ប្ដឹងទៅសហប្រធាននៃកិច្ចព្រមព្រៀងសន្តិភាពទីក្រុងប៉ារីស និងចង់ឱ្យមានការកោះប្រជុំបន្ទាន់នៃប្រទេសហត្ថលេខីអំពីបញ្ហាព្រំដែននេះ។

នេះបើយោងតាមសេចក្តីប្រកាសព័ត៌មាន ស្តីពី លទ្ធផលនៃការបន្តសម័យប្រជុំលើកទី៤ ព្រឹទ្ធសភា នីតិកាលទី៥ នាថ្ងៃទី២៤ ខែតុលា ឆ្នាំ២០២៥។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ឆ្លើយតបទៅនឹងការលើកឡើងខាងលើ សម្តេចតេជោ បានអះអាងថា បញ្ហាព្រំដែនរវាង កម្ពុជា-ថៃ បានដើរហួសពីកិច្ចព្រមព្រៀងសន្តិភាពទីក្រុងប៉ារីសហើយ ពីព្រោះរាជរដ្ឋាភិបាលកម្ពុជា បានយកបញ្ហានេះទៅកាន់តុលាការយុត្តិធម៌អន្តរជាតិ (ICJ) និងក្រុមប្រឹក្សាសន្តិសុខអង្គការសហប្រជាជាតិ ព្រមទាំងវេទិកាអន្តរជាតិដទៃទៀត។

សម្តេច បានបន្តថា កិច្ចព្រមព្រៀងសន្តិភាពទីក្រុងប៉ារីស មិនមានចែងពីការដោះស្រាយ ឬសម្របសម្រួលបញ្ហាព្រំដែនរវាងកម្ពុជា-ថៃឡើយ ហើយខ្លឹមសារសំខាន់ៗ របស់កិច្ចព្រមព្រៀងនេះ បានដាក់បញ្ចូលក្នុងរដ្ឋធម្មនុញ្ញរបស់កម្ពុជាផងដែរ។

តាមសម្ដេចតេជោ បានបន្ថែមថា តាមរយៈកិច្ចប្រជុំនាពេលចុងក្រោយនេះ បញ្ហាព្រំដែនកម្ពុជា-ថៃ បានឈានដល់ដំណាក់កាលស្រុះស្រួល ហើយនឹងឈានទៅការចុះហត្ថលេខាលើកិច្ចព្រមព្រៀងសន្តិភាពមួយ នៅថ្ងៃទី២៦ ខែតុលា ឆ្នាំ២០២៥ខាងមុខនេះ៕

ប្រភព៖ ក្រសួងព័ត៌មាន