លត់ Barca ក្នុងដីខ្លួនឯងហើយ Bellingham បោះពាក្យដៀមដាមទៅ Yamal មួយល្មមចត់បាយ

កីឡា៖ កាលពីយប់ថ្ងៃទី២៦ខែតុលាកន្លងទៅនេះ ការប្រកួត El Clasico ដ៏ជក់ចិត្តបានធ្វើឡើងនៅឯកីឡដ្ឋាន Santiago Bernabeu ដោយក្នុងនោះ Real Madrid បានយកឈ្នះ Barcelona ២ ទល់នឹង១។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ក្នុងនោះ Kylian Mbappe និង Jude Bellingham រកបានម្នាក់១គ្រាប់ ឲ្យ Real Madrid យកឈ្នះ Barcelona ដែលស៊ុតបានតែ១គ្រាប់ ដោយ Fermin Lopez។

ការប្រកួតនេះជាការប្រកួត El Clasico ដំបូងគេក្រោមការដឹកនាំរបស់លោក Xabi Alonso ហើយវាជាការប្រកួតមួយដ៏ជក់ចិត្ត តែក៏មានហេតុការណ៍តានតឹងជាច្រើន កើតឡើងនៅលើទីលានផងដែរ ដោយបន្ទាប់ពីចប់ការប្រកួត Dani Carvajal ដែលជាប្រធានក្រុម Real Madrid បានហៅ Lamine Yamal មកនិយាយគ្នា ទាក់ទងនឹងការបញ្ចេញមតិរបស់ Yamal បង្ខូចកេរ្តិ៍ឈ្មោះរបស់ Real Madrid ដែលក្រោយមក កីឡាករទាំងសងខាងក៏មានទំនាស់នឹងគ្នា ដោយ Vinicius Jr. និង Raphina សុទ្ធតែចូលមកការពារក្រុមរៀងៗខ្លួន។

Yamal បានចោទ Real Madrid មុនការប្រកួត El Clasico មួយថ្ងៃថាក្រុមនេះពូកែតែខាងលួចនិងខាងត្អូញត្អែ ជាហេតុធ្វើឲ្យមានការជះសាំងទៅលើភ្លើងបែបនេះតែម្ដង។

Bellingham ដែលជាកីឡាករ Real Madrid ឯណោះវិញបានផ្ញើសាររបៀបដៀមដាមទៅកាន់ Yamal បន្ទាប់ពីចប់ការប្រកួតនៅក្នុងបណ្ដាញសង្គម Instagram ថា៖

"ការនិយាយច្រើនគឺពិតជាថោកណាស់...HALA MADRID SIEMPRE!!!🤍"

ប្រភព៖: sportskeeda