អាមេរិក រំពឹងថាថៃនឹងដំណើរការដោះលែងយោធាទាំង១៨រូបយ៉ាងឆាប់រហ័ស ក្រោយចុះកិច្ចព្រមព្រៀងសន្ដិភាពកម្ពុជា-ថៃ

សហរដ្ឋអាមេរិករំពឹងថា ប្រទេសថៃនឹងធ្វើការជាមួយកម្ពុជា ដើម្បីចាប់ផ្តើមការដោះលែងទាហានកម្ពុជា១៨នាក់ភ្លាមៗ បន្ទាប់ពីមេដឹកនាំនៃប្រទេសទាំងពីរបានចុះហត្ថលេខាលើកិច្ចព្រមព្រៀងសន្តិភាពកាលពីថ្ងៃអាទិត្យសប្តាហ៍មុន ក្រោមអធិបតីភាពប្រធានាធិបតីសហរដ្ឋអាមេរិក លោក ដូណាល់ ត្រាំ នៅទីក្រុងគូឡាឡាំពួ ប្រទេសម៉ាឡេស៊ី នេះបើយោងតាមការចុះផ្សាយរបស់ទីភ្នាក់ងារសារព័ត៌មាន Reuters នៅព្រឹកថ្ងៃទី២៨ ខែតុលា ឆ្នាំ២០២៥។

ថ្លែងក្នុងលក្ខខណ្ឌមិនបញ្ចេញឈ្មោះ មន្ត្រីជាន់ខ្ពស់អាមេរិកបាននិយាយថា "ការរំពឹងទុករបស់យើងគឺថាដំណើរការដែលគោរពការប្តេជ្ញាចិត្តពីគ្រប់ភាគីនឹងចាប់ផ្តើមក្នុងពេលឆាប់ៗនេះ ខណៈដែលពួកគេបានចុះហត្ថលេខាលើកិច្ចព្រមព្រៀងសន្តិភាព។"

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

មុនពេលជំនួបដែលលោកប្រធានាធិបតី Trump គ្រោងនឹងជួបជាមួយប្រធានាធិបតីចិន Xi Jinping នៅថ្ងៃព្រហស្បតិ៍នៅឯកិច្ចប្រជុំកំពូលនៃកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) នៅប្រទេសកូរ៉េខាងត្បូង មន្ត្រីអាមេរិកដដែលបាននិយាយថា គោលនយោបាយរបស់សហរដ្ឋអាមេរិកលើកោះតៃវ៉ាន់មិនបានផ្លាស់ប្តូរបន្តិចឡើយ ហើយគោលនយោបាយរបស់សហរដ្ឋអាមេរិកស្តីពីកូរ៉េខាងជើងគឺការរំសាយអាវុធនុយក្លេអ៊ែរ៕

ប្រភព៖ Fresh News