SDF ទទួលបានពានរង្វាន់បរធនបាលរូបវន្តបុគ្គលឯករាជ្យឆ្នើម ប្រចាំឆ្នាំ២០២៤ ក្នុងកម្មវិធី “វេទិកាបរធនបាលកិច្ច”

ភ្នំពេញ៖ ថ្ងៃទី៣១ ខែតុលា ឆ្នាំ២០២៥ សណ្ឋាគារ សុខា ភ្នំពេញ៖ មូលនិធិអភិវឌ្ឍន៍ជំនាញ (SDF) បានទទួលពានរង្វាន់ បរធនបាលរូបវន្តបុគ្គលឯករាជ្យឆ្នើម សម្រាប់បរធនបាលកិច្ចសាធារណៈ ប្រចាំឆ្នាំ ២០២៤ ក្នុងកម្មវិធី “វេទិកាបរធនបាលកិច្ច” ដែលរៀបចំឡើងដោយក្រសួងសេដ្ឋកិច្ច និងហិរញ្ញវត្ថុ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ពានរង្វាន់នេះ ត្រូវបានផ្តល់ជូនត្រឹម តែ ៣ ​ប៉ុណ្ណោះ សម្រាប់ បរធនបាលរូបវន្តបុគ្គលឯករាជ្យឆ្នើម ដែលជាការទទួលស្គាល់ចំពោះ ភាពសកម្មក្នុងប្រតិបត្តិការ ឯករាជ្យភាព តម្លាភាព ប្រសិទ្ធភាព និងភាពទទួលខុសត្រូវខ្ពស់ ក្នុងការគ្រប់គ្រងមូលនិធិសាធារណៈ តាមរយៈ SDF ដែលបង្ហាញពីបែបផែនបរធនបាលសាធារណៈដែលមានទំនុកចិត្តខ្ពស់ ក្នុងការលើកកម្ពស់ការអភិវឌ្ឍធនធានមនុស្ស ការបង្កើនសមត្ថភាពអនុវត្ត ព្រមទាំង សមត្ថភាពប្រកួតប្រជែងរបស់ប្រទេសកម្ពុជា ឱ្យកាន់តែប្រសើរឡើង។

មិនត្រឹមតែប៉ុណ្ណោះ ពានរង្វាន់នេះ បានបញ្ជាក់ពីសមិទ្ធផល និងភាពជោគជ័យថ្មីមួយបន្ថែមទៀត ក្នុងការអនុវត្តបេសកកម្មរបស់ SDF ដើម្បីចូលរួមចំណែកអភិវឌ្ឍធនធានមនុស្ស​ និងសេដ្ឋកិច្ចកម្ពុជា និងជាពិសេស គឺផ្តល់ទំនុកចិត្តកាន់តែខ្ពស់ជូនវិស័យឯកជន ក៏ដូចជាដៃគូអភិវឌ្ឍន៍នានា ក្នុងការចូលរួមវិនិយោគលើកការអភិវឌ្ឍជំនាញ បង្កើនមូលធនមនុស្ស ប្រកបដោយគុណភាព ដើម្បីរក្សាបាននូវភាពធន និងការប្រកួតប្រជែង​ក្នុងទីផ្សារ។

គួររម្លឹកផងដែរថា៖ SDF ត្រូវបានបង្កើតឡើងជា បរធនបាលកិច្ចសាធារណៈ (National Trust Fund) ក្រោមការគ្រប់គ្រងរបស់ក្រសួងសេដ្ឋកិច្ច និងហិរញ្ញវត្ថុ និងក្រសួងស្ថាប័នពាក់ព័ន្ធពីវិស័យសាធារណៈ និងវិស័យឯកជន ក្នុងគោលបំណងចម្បងជំរុញភាពជាដៃគូពិតប្រាកដ រវាងឧស្សាហកម្ម (វិស័យឯកជន) និងគ្រឹះស្ថានបណ្ដុះបណ្ដាល (រដ្ឋ ឯកជន និងអង្គការ) ដើម្បីលើកកម្ពស់ការអភិវឌ្ឍជំនាញ ឱ្យត្រូវតាមតម្រូវការឧស្សាហកម្ម និងទីផ្សារការងារ សំដៅជំរុញកំណើនសេដ្ឋកិច្ចជាតិ និងបង្កើនប្រាក់ចំណូលជូនប្រជាពលរដ្ឋ និងធុរកិច្ច ស្របតាមចក្ខុវិស័យរបស់រាជរដ្ឋាភិបាល ក្នុងការប្រែក្លាយកម្ពុជា ទៅជាប្រទេសចំណូលខ្ពស់ក្នុងឆ្នាំ ២០៥០ ផងដែរ៕