Neville រិះគន់តារា Liverpool រូបនេះថាលេងដូចក្មេង ទល់នឹង Man City យប់មិញ

កីឡា៖ លោក Gary Neville បានរិះគន់ការលេងរបស់ ខ្សែប្រយុទ្ធ Florian Wirtz នៅក្នុងការប្រកួតរវាង Liverpool និង Manchester City កាលពីយប់ថ្ងៃទី៩ខែវិច្ឆិកា ឆ្នាំ២០២៥កន្លងទៅនេះ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ពិតណាស់ទាំង Liverpool និង Manchester City សុទ្ធតែជាក្រុមខ្លាំង ដែលធ្វើឲ្យការប្រកួតមួយនេះពិតជាជក់ចិត្តដិតអារម្មណ៍ ដោយក្នុងនេះ ភាគីលោក Pep Guardiola បានយកឈ្នះ Liverpool ក្នុងលទ្ធផល ៣ ទល់នឹង០ រកគ្រាប់បាល់ដោយ Erling Haaland, Nico Gonzalez និង Jeremy Doku។ យ៉ាងណាមិញ បរាជ័យរបស់ Liverpool ដែលជាក្រុមជើងឯក Premier League កាលពីរដូវកាលមុននេះ បានធ្វើឲ្យអ្នកគាំទ្រក៏ដូចជាអ្នកវិភាគបាល់ទាត់ជាច្រើនបានរិះគន់ពីទម្រង់លេងរបស់កូនក្រុមលោក Arne Slot ។

Gary Neville បានរិះគន់ Florian Wirtz តារាឆ្នើមដែល Liverpool ជះលុយទិញមកលើសពី១០០លានដុល្លារ ថារូបគេនៅតែមិនអាចស៊ាំនឹងការលេងនៅ Premier League និងមើលទៅដូចជាកូនក្មេង ខណៈដែលតាំងពីផ្លាស់មកទឹកដី Anfield គឺ Wirtz បញ្ចូនបាល់បានតែ៣គ្រាប់និងមិនទាន់រកគ្រាប់បាល់បានសូម្បីតែ១គ្រាប់។

លោក Neville បាននិយាយថា៖ " Wirtz គឺជាបញ្ហា យើងត្រូវតែស្មោះត្រង់នឹងនិយាយការពិត។ វាគឺជាបញ្ហាមួយ ព្រោះគេមានតម្លៃខ្លួនលើសពី១០០លានផោន ហើយបើនិយាយឲ្យយុត្តិធម៌ទៅ ខ្ញុំធ្លាប់បាននិយាយជាច្រើនសប្តាហ៍ហើយថា Kerkez មើលទៅដូចជាកូនក្មេង ឯថ្ងៃនេះ ខ្ញុំគិតថា Wirtz ដូចជាកូនក្មេងម្ដង។ ពួកយើងបានលើកលែងឲ្យគេច្រើនខែមកហើយ ដោយសារតែការពិតថា គេនៅក្មេង មកពីបរទេស ប៉ុន្តែតម្លៃខ្លួនគេឡើងលើស១០០លាន គឺគេត្រូវតែប្រឹងលេងឲ្យបានល្អជាងនេះ។"