សម្តេចតេជោ ហ៊ុន សែន ប្រកាសប្រឆាំងដាច់ខាតចំពោះសំណើណាក៏ដោយក្នុងការស្នើសុំបើកព្រំដែន កម្ពុជាជាមួយថៃឡើងវិញ

សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជាបានគូសបញ្ជាក់ថា សម្តេចប្រឆាំងដាច់ខាតក្នុងការស្នើណាក៏ដោយចំពោះការសុំបើកច្រកព្រំដែនកម្ពុជា-ថៃឡើងវិញព្រោះថាកុំឱ្យថោកដោយសារការបើកព្រំដែននេះកូនសោរនៅលើដៃថៃ។ ការគូសបញ្ជាក់របស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ ព្រះរាជតំណាងដ៏ខ្ពង់ខ្ពស់បំផុត ព្រះករុណាព្រះបាទ សម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជាក្នុងឱកាសអញ្ជើញបើក "អនុសំវច្ឆរមហាសន្និបាតមន្ត្រីសង្ឃទូទាំងប្រទេស លើកទី៣៣ ឆ្នាំ២០២៥" នាព្រឹកថ្ងៃទី១៨ ខែវិច្ឆិកាឆ្នាំ២០២៥ នៅវិទ្យាស្ថានជាតិអប់រំ។

សម្ដេចតេជោ ហ៊ុន សែន បានថ្លែងបញ្ជាក់ថា ចាប់តាំពីថៃ បិទព្រំដែនមក កម្ពុជាមិនដែលសុំបើកព្រំដែនឡើងវិញនោះទេ ហើយបើថៃនៅតែបន្តបិទទៀតក៏ខ្មែរមិនងាប់ដែរ។ សម្តេចតេជោបានបន្ដថា បន្ទាប់ពីបិទច្រកព្រំដែនកម្ពុជា-ថៃ មកនាយករដ្ឋមន្ត្រីថៃក៏បានប្រកាសជាច្រើនដង រហូតដល់រដ្ឋមន្ត្រីក្រសួងការពារជាតិថៃនិយាយថា និយាយដាច់ខាត មិននិយាយពីការបើកច្រកព្រំដែននោះទេ។ ត្រង់ចំណុចនេះសម្តេចតេជោប្រធានព្រឹទ្ធសភា បានសរសេតបវិញលើបណ្តាញសង្គមហ្វេសប៊ុកថាសូមឱ្យថៃបន្តបិទ១០០ឆ្នាំ ឬ៥០០ឆ្នាំ ក៏គ្មានបញ្ហានោះទេ។ សម្តេចតេជោបានគូសបញ្ជាក់បន្ថែមយ៉ាងដូច្នេះថា៖ «ខ្ញុំសូមប្រឆាំងដាច់ខាតចំពោះសំណើរណាក៏ដោយដែលភាគីកម្ពុជាស្នើសុំបើកច្រកព្រំដែនកម្ពុជា-ថៃឡើងវិញ ព្រោះគេជាអ្នកបិទ យើងទៅសុំបើកកុំធ្វើថោក។ ព្រោះរឿងហ្នឹងយើងបានដឹងទាំងអស់គ្នាហើយ យើងមិនមែនជាអ្នកបិទនោះទេ គឺគេអ្នកបិទ កូនសោរនៅលើគេ ហេតុអ្វីបានជាយើងទៅអង្វរសុំគេ»។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ជាមួយគ្នានោះដែរសម្តេចតេជោក៏បានបញ្ជាក់បន្ថែមថា៖ «ខ្ញូំសូមផ្ញើសារទៅថ្នាក់ដឹកនាំថៃ មិនថាស៊ីវិល ឬទាហានទេ គឺកម្ពុជាមិនធ្វើថោកទៅស្នើសុំថៃបើកច្រកព្រំដែនឡើងវិញនោះទេ»។ សម្តេចតេជោបានលើកឡើងថា កម្ពុជាត្រូវតែពង្រឹងសមត្ថភាពសម្រាប់ការផលិតទំនិញសម្រាប់ផ្គត់ផ្គង់ ហើយរកទីផ្សារផ្សេងសម្រាប់ផ្គត់ផ្គង់ជំនួសទំនិញថៃ។ សម្ដេចតេជោបានសង្កត់ធ្ងន់ថា៖ «ប៉ុន្តែខ្ញុំសូមនិយាយរឿងមួយថាអ្វីកុំទៅជ្រុលហួស រហូតដល់អ្នកវិនិយោគថៃធ្វើការវិនិយោគនៅក្នុងប្រទេសកម្ពុជា មិនព្រមទិញទំនិញ ដែលជាការខុសក្បូន បើគេផលិតទំនិញនៅក្នុងប្រទេសកម្ពុជាគឺត្រូវចាត់ទុកជារបស់កម្ពុជា»៕

ប្រភព៖ ក្រសួងព័ត៌មាន